Degé Kangyur volume 39, F.77.b

འདུས་མ་བྱས་དང་བྲལ་བའི་སྒོ་ནས་ཡང་དག་པར་འདུ་བར་འགྱུར་བ་ཡིན་ནོ། །​ཡི་གེ་མངོན་པར་བསྒྲུབ་པ་བསྟན་པ་དང་། ངག་གི་ལས་སུ་བརྗོད་པ་གང་དག་གིས་འདུས་བྱས་སྟོན་པར་འགྱུར་བ་དེ་ལ་ཡང་ཡི་གེ་མངོན་པར་བསྒྲུབ་པ་བསྟན་པ་གང་ཡིན་པ་དང་། ངག་གི་ལས་སུ་བརྗོད་པ་གང་ཡིན་པ་འདི་གཉི་ག་ཡང་ཆོས་ཉིད་ཇི་ལྟ་བ་བཞིན་རང་བཞིན་གྱིས་མཉམ་པ་ཉིད་ཡིན་པས་ཡོད་པ་མ་ཡིན་ནོ། །​ཡོད་པ་མ་ཡིན་པ་ལ་ནི་བརྗོད་པ་དེ་ཡང་ཡང་དག་པ་ཉིད་དུ་མི་འགྱུར་ལ་ཡི་གེར་གདགས་པ་ཡང་ཡང་དག་པ་ཉིད་མ་ཡིན་ནོ། །​ངག་གི་ལས་སུ་བརྗོད་པ་ཡང་ཡང་དག་པ་མ་ཡིན་ནོ་ཞེས་བྱ་བ་འདི་ནི་དབྱེར་མེད་པའི་ཚིག་བླ་དགས་ཡིན་ནོ། །​ལྷག་པ་མེད་པ་ཞེས་བྱ་བ་འདི་ནི་སྒྲོ་འདོགས་པ་མེད་པའི་ཚིག་བླ་དགས་ཡིན་ནོ། །​ཆོས་ཀྱི་ཚུལ་འདི་ནི་བསྟན་དུ་མེད་པ་ཡིན་ལ་ཆོས་ཐམས་ཅད་ཀྱང་ཡང་དག་པ་ཡང་མ་ཡིན། ཡང་དག་པ་མ་ཡིན་པ་ཡང་མ་ཡིན་ནོ། །​དེ་ཅིའི་ཕྱིར་ཞེ་ན། འདི་ལྟར་ཆོས་ཐམས་ཅད་ནི་ཉེ་བར་ཞི་བའི་རང་བཞིན་ཡིན་ནོ། །​ཡི་གེས་བསྟན་པ་དང་། ཚིག་ཏུ་བརྗོད་པ་དང་། མཐོང་བ་དང་། དམིགས་པའི་ཆོས་དེ་དག་ནི་རང་བཞིན་མེད་པ་སྟེ། འདི་ལྟར་ཆོས་ཐམས་ཅད་ནི་མ་བྱས་པ། མཉམ་པ་མེད་པ། མི་མཉམ་པ་མེད་པ། མ་ཞི་བ། ཉེ་བར་མ་ཞི་བ། རབ་ཏུ་མ་ཞི་བའོ། །​ཆོས་རྣམས་ནི་ཞི་བའི་མཚན་ཉིད་དང་། ཉེ་བར་ཞི་བའི་མཚན་ཉིད་དུ་ཉེ་བར་མི་གནས་རབ་ཏུ་མི་གནས་སོ། །​ཆོས་ཐམས་ཅད་ནི་འགྱུར་བ་མེད་པ་ཡིན་པས་དེ་དག་གང་དུ་ཡང་རྣམ་པར་གཞག་པར་མི་འགྱུར་རོ། །​ཆོས་རྣམས་ནི་རྣམ་པར་མི་གནས་པའི་ཕྱིར་གང་དུ་ཡང་བགྲང་བ་མ་ཡིན་ན་ཆོས་སུ་བགྲང་བར་སྟོན་པའི་རྗོད་པ་གང་གིས་བགྲང་བར་འགྱུར། ངག་གི་ལས་ཡི་གེར་གདགས་པ་ཐམས་ཅད་ནི་ཡུལ་ན་མི་གནས། ཕྱོགས་ན་མི་གནས་པ་སྟེ། ཡི་གེ་དང་ངག་གི་ལས་ནི་གང་ནས་ཀྱང་མི་འོང་། གང་དུ་ཡང་མི་འགྲོ་ལ། ཆོས་གང་གི་མཐར་གཏོགས་པ་ཡང་མ་ཡིན། དབུས་སུ་གཏོགས་པ་ཡང་མ་ཡིན་ནོ། །​ཡི་གེའི་ལས་ཐམས་ཅད་ནི་ལས་མེད་པ། ཡི་གེ་མེད་པ། རྩོལ་བ་མེད་པའོ། །​ངག་གི་ལས་ཐམས་ཅད་ཀྱང་ཡི་གེ་མེད་པ། རྩོལ་བ་མེད་པའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh46.html?part=UT22084-039-002-535#UT22084-039-002-535