།བདག་གིས་སེམས་ཅན་རྣམས་བརྗོད་དུ་མེད་པའི་ཆོས་རིན་པོ་ཆེ་ལ་སྦྱར་བར་བྱའོ། །བདག་གིས་ཕན་མ་བཏགས་ཀྱང་སེམས་ཅན་འགའ་ལ་ཡང་ཆོས་ཀྱི་སེར་སྣ་བསྐྱེད་པར་མི་བྱའི་སེར་སྣ་མེད་པར་བྱའོ། །བདག་གིས་གཏོང་བ་དང་ལྡན་ཞིང་སྦྱིན་བདག་མཆོག་ཆོས་ཀྱི་སྦྱིན་བདག་དེ་བཞིན་གཤེགས་པའི་དོན་ཐམས་ཅད་མཁྱེན་པའི་མཛད་པ་ཡང་བྱའོ། །བདག་གིས་སེམས་ཅན་རྣམས་ཀྱི་ཁུར་ཆེན་པོ་ཡང་ཡོངས་སུ་དོར་བར་བྱའོ། །བདག་གིས་སེམས་ཅན་རྣམས་ཆུ་བོ་ཆེན་པོ་ལས་བསྒྲལ་བར་བྱ་བའི་ཕྱིར་ཆོས་ཀྱི་གྲུ་བཅའ་བར་ཡང་བྱའོ། །བདག་གིས་སེམས་ཅན་རྣམས་བདེ་བ་ཐམས་ཅད་ཉེ་བར་སྒྲུབ་པ་ལ་དགོད་པར་བྱའོ་སྙམ་དུ་སེམས་ཚད་མེད་པ་བསྐྱེད་པར་བྱའོ། །དེ་ལྟར་ན་བྱང་ཆུབ་སེམས་དཔས་མྱུར་དུ་བྱམས་པས་མངོན་པར་བསྒྲུབས་པའི་བློས་ཆོས་ཁྱད་པར་ཅན་རྗེས་སུ་རྟོགས་པར་ཡང་འགྱུར། གཟུངས་རྣམ་པར་དབྱེ་བ་མངོན་པར་བསྒྲུབ་པ་བསྟན་པའི་མདོ་འདི་ལ་ཡོངས་སུ་སྨིན་པར་ཡང་འགྱུར། སྐྱེ་བ་ཟློག་པར་ཡང་འགྱུར། ཕས་ཀྱིས་རྒོལ་བ་ཐམས་ཅད་ཀྱིས་མི་འཕྲོགས་པར་ཡང་འགྱུར། བདུད་ཐམས་ཅད་ཕམ་པར་བྱས་ནས། ཕས་ཀྱིས་རྒོལ་བ་ཐམས་ཅད་ཆོས་དང་འཐུན་པས་ཚར་གཅོད་པར་ཡང་འགྱུར། རྩོད་པ་ཉེ་བར་ཞི་བ་ཕུན་སུམ་ཚོགས་པར་ཡང་འགྱུར་རོ། །བཀོད་པ་མཐའ་ཡས་གཟུངས་འདི་ནི་དེ་བཞིན་གཤེགས་པས་ལེགས་པར་ཡོངས་སུ་བཟུང་ཞིང་ཡིད་ལ་མཛད་པ་ཡིན་ནོ། །བཀོད་པ་མཐའ་ཡས་འདི་ལྟ་སྟེ་དཔེར་ན་བྱང་ཆུབ་སེམས་དཔའ་སྲིད་པ་ཐ་མ་པ་ནི་སུམ་ཅུ་རྩ་གསུམ་པའི་ལྷ་རྣམས་དང་། འཐབ་བྲལ་བ་རྣམས་དང་། འཕྲུལ་དགའ་བ་རྣམས་དང་། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་དབུས་དགའ་ལྡན་གྱི་གནས་ན་གནས་ཤིང་ལྷ་ཐམས་ཅད་ཀྱིས་ལྷག་པར་བགྲོད་པར་བྱ་བ་དང་། སེམས་ཅན་ཐམས་ཅད་ཀྱིས་མངོན་པར་དགའ་བར་བྱ་བ་ཡིན། བསོད་ནམས་ཆེན་པོས་ཡོངས་སུ་ཟིན་པའི་དགེ་བའི་རྩ་བ་ཀུན་ཏུ་སྨིན་པ་ཡིན། སྲིད་པ་གཅིག་ལུས་པའི་བསོད་ནམས་ཀྱི་ཕུང་པོ་དང་། ཚུལ་ཁྲིམས་ཀྱི་ཕུང་པོ་དང་། ཐམས་ཅད་ལས་ཁྱད་པར་དུ་འཕགས་པའི་གཏོང་བ་ཕུན་སུམ་ཚོགས་པ་རྣམ་པར་དག་པ་དང་། ཤེས་རབ་ཀྱི་ཕུང་པོ་དང་ལྡན་པ་ཡིན།