Degé Kangyur volume 36, F.393.b

།དེ་ལ་འགྲོ་བ་མེད་ཅིང་ཕྱིར་ལྡོག་མེད་པ་སྟེ། །​བརྗོད་དུ་མེད་པའི་ཡུལ་ལ་འང་རབ་ཏུ་འཇུག །​བརྗོད་དུ་མེད་པའི་ཞིང་དུ་རྣམ་པར་རྒྱུ། །​བརྗོད་དུ་མེད་པའི་བསྐལ་པ་ཟད་པར་བྱེད། །​ཚུལ་གྱི་རྣམ་པ་བརྗོད་དུ་མེད་པ་སྟེ། །​བརྗོད་དུ་མེད་པས་དེ་བཞིན་ཉིད་ཀྱང་འཐོབ། །​ཡེ་ཤེས་བརྗོད་དུ་མེད་པའང་རབ་ཏུ་འབྱུང་། །​སྐད་ཅིག་རེ་རེར་བརྗོད་དུ་མེད་པ་སྟོན། །​རེ་རེའི་ཚིག་གིས་བརྗོད་དུ་མེད་པ་ཡི། །​སངས་རྒྱས་བརྗོད་དུ་མེད་པ་རབ་ཏུ་ཤེས། །​བྱང་ཆུབ་དུས་གཅིག་མངོན་པར་སངས་རྒྱས་པ། །​ཐ་དད་དུས་སུ་ཁོང་དུ་ཆུད་པར་བྱེད། །​དེ་དག་སྐྲ་རྩེ་འཇུག་པ་བརྗོད་དུ་མེད། །​ཤིན་ཏུ་ཕྲ་ལ་འཇུག་པའང་བརྗོད་དུ་མེད། །​རབ་ཏུ་རྒྱ་ཆེའི་རྒྱུད་ཀྱང་བརྗོད་དུ་མེད། །​སངས་རྒྱས་རྣམ་པར་མཐོང་བ་འང་བརྗོད་དུ་མེད། །​སངས་རྒྱས་རིགས་ལ་གང་བཞུགས་དེ་དག་གིས། །​ཚུལ་གཅིག་ཉིད་ཀྱང་བརྗོད་དུ་མེད་པ་སྟེ། །​དེ་བས་ཞིང་རྒྱུད་བརྗོད་དུ་མེད་པ་ལ། །​རྫོགས་པར་འཚང་རྒྱའི་དོན་དུ་ཀུན་ཏུ་འཇུག །​ཞིང་དང་སེམས་ཅན་དེ་བཞིན་གཤེགས་པ་རྣམས། །​ཐ་དད་ཁམས་བསྒྱུར་བརྗོད་དུ་མེད་པ་དག །​བརྟན་པས་ཤེས་པ་བརྗོད་དུ་མེད་པ་སྟེ། །​དུས་གསུམ་འཛིན་པ་བརྗོད་དུ་མེད་པ་ཡིན། །​ཤིན་ཏུ་རྒྱས་པ་ཆེན་པོའི་མདོ། །སངས་རྒྱས་ཕལ་པོ་ཆེ་ཞེས་བྱ་བ་ལས་སེམས་ཀྱི་རྒྱལ་པོས་དྲིས་ནས་གྲངས་ལ་འཇུག་པ་བསྟན་པའི་ལེའུ་ཞེས་བྱ་སྟེ། སུམ་ཅུ་དྲུག་པའོ།​། །​།དེ་ནས་བྱང་ཆུབ་སེམས་དཔའ་སེམས་ཀྱི་རྒྱལ་པོས་བྱང་ཆུབ་སེམས་དཔའ་དེ་དག་ལ་སྨྲས་པ། ཀྱེ་རྒྱལ་བའི་སྲས་དག་གང་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མི་མཇེད་འདིའི་བསྐལ་པ་ཇི་ཙམ་པ་དེ་ནི་དེ་བཞིན་གཤེགས་པ་ཚེ་དཔག་ཏུ་མེད་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཡོད་པའི་ཉིན་ཞག་གཅིག་གོ