།དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས་བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང་བསོད་སྙོམས་དང་། གཟིམས་ཆ་དང་སྙུན་གྱི་རྐྱེན་སྨན་དང་ཡོ་བྱད་དག་ཀྱང་འབུལ་ཞིང་བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་ཚོགས་རྣམས་ལ་ཡང་ཡང་དག་པར་མཆོད་པ་བྱེད་དེ། དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་བསྙེན་བཀུར་བ་བྱེད་ཅིང་དེ་དག་གིས་ཆོས་བསྟན་པ་ཡང་རིམ་གྲོར་ཉན་ཅིང་ལེན་ཏོ། །འཛིན་ཏོ་ཐོས་ནས་ཀྱང་ཅི་ཚུལ་དུ་ནན་ཏན་གྱིས་ཡང་དག་པར་སྒྲུབ་བོ། །དེ་དག་ལས་ཕལ་ཆེར་དེ་བཞིན་གཤེགས་པ་དེ་དག་གི་བསྟན་པ་ལ་རབ་ཏུ་འབྱུང་སྟེ། ཕྱིར་ཞིང་དེའི་བསམ་པ་དང་ལྷག་པའི་བསམ་པ་དང་མོས་པ་མཉམ་པ་ཉིད་ཀྱང་རྣམ་པར་དག་པར་འགྱུར་ཏེ། བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པའི་བྱང་ཆུབ་སེམས་དཔའ་དེ་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང་། བསྐལ་པ་ཁྲག་ཁྲིག་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་བསམ་པ་དང་ལྷག་པའི་བསམ་པ་དང་། མོས་པའི་བསམ་པ་མཉམ་པ་ཉིད་རབ་ཏུ་གནས་སོ། །དེའི་དགེ་བའི་རྩ་བ་དེ་དག་ཐམས་ཅད་ཀྱང་ཡོངས་སུ་དག་ཅིང་ཤིན་ཏུ་འོད་གསལ་བར་འགྱུར་རོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། གསེར་གྱི་ས་ལེ་སྦྲམ་དེ་ཉིད་མགར་བ་མཁས་པས་རྒྱན་དུ་བྱས་པ་ནི། དེ་མ་ཡིན་པའི་གསེར་གྱི་ས་ལེ་སྦྲམ་གཞན་རྒྱན་དུ་མ་བྱས་པས་མི་འཕྲོགས་ཤིང་མི་ཐུབ་པ་ཡིན།