འཁྲུག་པ་མང་པོ་ཅན་ཆགས་པ་དང་ཁོང་ཁྲོ་བ་དང་། སྡུག་པ་དང་མི་སྡུག་པས་རྣམ་པར་བཅིངས་པ། མྱ་ངན་དང་སྨྲེ་སྔགས་འདོན་པའི་རྗེས་སུ་སྤྱོད་པ། སྲེད་པའི་སྒྲོག་གིས་བཅིངས་པ། མ་རིག་པའི་ཐིབས་པོས་ཀུན་ནས་ཡོག་པའི་ནང་ན་མི་མཐུན་པར་གྱུར་པ་ཡིན་གྱིས་དེ་དག་བདག་གིས་ཁམས་གསུམ་པའི་གནས་ཐམས་ཅད་ལས་དབེན་པའི་མྱ་ངན་ལས་འདས་པ་བསྒྲིབས་པ་མེད་པ་ལ་རབ་ཏུ་དགོད་པར་བྱའོ། །ཀྱེ་མ་སེམས་ཅན་འདི་དག་ནི་བདག་དང་བདག་གི་ལ་མངོན་པར་ཞེན་ཞིང་ཕུང་པོའི་གནས་ལས་མ་འཕགས་པ་ཕྱིན་ཅི་ལོག་བཞི་ལ་རབ་ཏུ་ཞུགས་པ། སྐྱེ་མཆེད་དྲུག་གི་གྲོང་སྟོང་པ་ལ་ཤིན་ཏུ་གནས་པ་འབྱུང་བ་ཆེན་པོ་བཞིའི་སྦྲུལ་གྱིས་གཙེ་བ་ཕུང་པོའི་གཤེད་མ་དང་ཆོམ་པོས་ཤིན་ཏུ་བཅོམ་པ། གཞལ་དུ་མེད་པའི་སྡུག་བསྔལ་མྱོང་བར་གྱུར་པ་ཡིན་གྱིས་དེ་དག་བདག་གིས་བདེ་བའི་དམ་པ་གནས་ཐམས་ཅད་དང་བྲལ་བ་འདི་ལྟ་སྟེ། བསྒྲིབས་པ་མེད་པ་ཐམས་ཅད་མཁྱེན་པའི་མྱ་ངན་ལས་འདས་པ་ལ་རབ་ཏུ་དགོད་པར་བྱའོ། །ཀྱེ་མ་སེམས་ཅན་འདི་དག་ནི་དམའ་བ་དང་ཞན་པ་དང་ཞུམ་པ་ལ་མོས་ཤིང་ཐམས་ཅད་མཁྱེན་པའི་ཡེ་ཤེས་དམ་པའི་སེམས་མི་ལྡོག་པས་ཐེག་པ་ཆེན་པོས་འབྱུང་བ་ཡོད་ཀྱང་ཉན་ཐོས་དང་། རང་སངས་རྒྱས་ཀྱི་བློ་ཅན་ཡིན་གྱིས་དེ་དག་བདག་གིས་སངས་རྒྱས་ཀྱི་ཆོས་རྒྱ་ཆེན་པོའི་བློ་གྲོས་དང་བསམ་པ་ཡངས་པའི་ཐེག་པ་ཆེན་པོ་བླ་ན་མེད་པ་ལ་ཐམས་ཅད་མཁྱེན་པའི་ཡེ་ཤེས་ཡོངས་སུ་བསྟན་པས་རབ་ཏུ་དགོད་པར་བྱའོ་སྙམ་མོ། །ཀྱེ་རྒྱལ་བའི་སྲས་དག །དེ་ལྟར་ཚུལ་ཁྲིམས་ཀྱི་སྟོབས་དང་མཐུ་དེ་ལྟ་བུ་དང་ལྡན་པའི་བྱང་ཆུབ་སེམས་པས་སྙིང་རྗེ་དང་བྱམས་པ་མངོན་པར་བསྒྲུབ་པ་ལ་མཁས་པ། སེམས་ཅན་ཐམས་ཅད་ཀྱིས་མ་བཅོལ་པའི་བཤེས་གཉེན་དུ་གྱུར་པ། སེམས་ཅན་ཐམས་ཅད་ཡོངས་སུ་མ་བཏང་བ། བྱ་བ་དང་མི་བྱ་བ་མངོན་པར་བསྒྲུབ་པ་ལ་མཁས་པ།