ཁོང་དུ་ཆུད་པར་བྱ་ན་གལ་ཏེ་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་དེ་མངོན་པར་བསྒྲུབ་པའི་སྒོར་གཞུག་པ་མཛད་དུ་ཟིན་ན། དེ་ཉིད་དེའི་མཐའ་ལས་བརྒལ་བའི་མྱ་ངན་ལས་འདས་པར་འགྱུར་ཏེ། སེམས་ཅན་ཐམས་ཅད་ཀྱི་དགོས་པ་འང་རྒྱུན་གཅད་པར་འགྱུར་རོ། །དེ་ལྟར་སངས་རྒྱས་བཅོམ་ལྡན་འདས་དེ་དག་ནི། བྱང་ཆུབ་སེམས་དཔའ་དེ་ལ་ཡེ་ཤེས་མངོན་པར་བསྒྲུབ་པའི་ལས་གང་གིས་སྐད་ཅིག་གཅིག་ཏུ་མངོན་པར་བསྒྲུབ་པས་ཀྱང་ཐོག་མ་སེམས་བསྐྱེད་པ་ཕྱིན་ཅད་ས་བདུན་པ་ལ་ཞུགས་ཤིང་། རྗེས་སུ་སོང་བ་ཡོངས་སུ་རྩོམ་པའི་བར་སྔ་མ་དེ་དག་གིས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆ་དང་ཁྲག་ཁྲིག་གི་ཆ་དང་། ཁྲག་ཁྲིག་བརྒྱའི་ཆ་དང་། ཁྲག་ཁྲིག་སྟོང་གི་ཆ་དང་། ཁྲག་ཁྲིག་བརྒྱ་ཕྲག་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཆར་ཡང་ཉེ་བར་མི་འགྲོའོ། །གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོ་བ་ནས་བསྒྲུན་བཙམ་གྱི་བར་དུ་འང་མི་ཆོག་པ་དེ་སྙེད་དུ་ཚད་མེད་པའི་ཡེ་ཤེས་མངོན་པར་བསྒྲུབ་པ་ལས་ཉེ་བར་བསྒྲུབ་པ་མཛད་དོ། །ཀྱེ་རྒྱལ་བའི་སྲས་དག །དེ་ཅིའི་ཕྱིར་ཞེ་ན། སྔོན་ཅད་ལུས་གཅིག་གིས་མངོན་པར་བསྒྲུབས་པས་སྤྱོད་པ་མངོན་པར་བསྒྲུབ་པར་གྱུར་གྱི་འདི་ལ་གནས་པའི་བྱང་ཆུབ་སེམས་དཔའ་རྣམས་ནི་ལུས་རྣམ་པར་ཕྱེ་བ་ཚད་མེད་པས་བྱང་ཆུབ་སེམས་དཔའི་སྤྱོད་པའི་མཐུ་ཡོངས་སུ་སྡུད་དེ། དབྱངས་མངོན་པར་བསྒྲུབ་པ་ཚད་མེད་པ་དང་། ཡེ་ཤེས་མངོན་པར་བསྒྲུབ་པ་ཚད་མེད་པ་དང་། སྐྱེ་བ་མངོན་པར་བསྒྲུབ་པ་ཚད་མེད་པ་དང་། ཞིང་ཡོངས་སུ་སྦྱང་བ་ཚད་མེད་པ་དང་། སེམས་ཅན་ཡོངས་སུ་སྨིན་པར་བྱ་བ་ཚད་མེད་པ་དང་། སངས་རྒྱས་མཆོད་ཅིང་བསྙེན་བཀུར་བ་ཚད་མེད་པ་དང་། ཆོས་ཀྱི་ཚུལ་ཁོང་དུ་ཆུད་པ་ཚད་མེད་པ་དང་། མངོན་པར་ཤེས་པ་མངོན་པར་བསྒྲུབ་པའི་སྟོབས་དང་ཤུགས་ཚད་མེད་པ་དང་། འཁོར་གྱི་དཀྱིལ་འཁོར་ཚད་མེད་པ་རྣམ་པར་ཕྱེ་བ་དང་། ཚད་མེད་པའི་རྗེས་སུ་སོང་བའི་ལུས་དང་། ངག་དང་ཡིད་ཀྱི་ལས་ཀྱིས་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་མཐུ་མི་སྒུལ་བའི་ཚུལ་གྱིས་ཡང་དག་པར་སྒྲུབ་བོ།