དེ་དག་ནི་བསྐལ་པར་ཡང་བསྟན་པར་སླ་བ་མ་ཡིན་ནོ། །དེ་ལ་འདི་སྐད་ཅེས་བྱ་སྟེ། ས་ནི་ལག་མཐིལ་ལྟ་བུར་མཉམ་པར་གནས་པར་གྱུར། འདབ་མ་བརྒྱ་པ་རྒྱས་པ་འོད་དང་ལྡན་པ་བྱུང་། ལྷ་རྣམས་བརྒྱ་སྟོང་བྱང་ཆུབ་སྙིང་པོར་རབ་ཏུ་འདུད། །སེང་གེ་སྒྲ་ཡི་མཚན་མ་དང་པོ་འདི་འདིར་མཐོང་། །སྟོང་གསུམ་ཤིང་བརྒྱ་དག་དང་རི་རྣམས་དུ་མ་དང་། རི་ཡི་རྒྱལ་པོ་ལྷུན་པོ་བྱང་ཆུབ་སྙིང་པོར་འདུད། །སྟོབས་བཅུའི་གན་དུ་སོང་སྟེ་བརྒྱ་བྱིན་ཚངས་པ་འདུད། །འདི་ཡང་མི་ཡི་སེང་གེ་བྱང་ཆུབ་སྙིང་པོར་རོལ། །སྐུ་ལས་འོད་ཟེར་བརྒྱ་སྟོང་དག་ནི་རབ་བཀྱེ་སྟེ། །རྒྱལ་བའི་ཞིང་མཆོག་ཁྱབ་ནས་ངན་སོང་གསུམ་པོ་ཞི། །དེ་ནས་སྐད་ཅིག་ཡུད་ཙམ་མི་ཁོམ་སྐམས་པར་གྱུར། །སེམས་ཅན་གང་ལའང་ཐ་བ་རྒྱགས་སྡང་གནོད་པ་མེད། །འདི་ཡང་མི་ཡི་སེང་གེ་གདན་ལ་བཞུགས་པའི་རོལ། །ཉི་ཟླ་ནོར་བུ་མེ་དང་གློག་དང་ལྷ་ཡི་འོད། །འོད་དང་ལྡན་པའི་རླབས་ཀྱིས་ཟིལ་མནན་ལམ་མེ་མིན། །འགྲོ་བ་གང་གིས་ཀྱང་ནི་སྟོན་པའི་གཙུག་མི་མཐོང་། །འདི་ཡང་མི་ཡི་སེང་གེ་གདན་ལ་བཞུགས་པའི་རོལ། །ཕྱག་གི་མཐིལ་གྱིས་རེག་ནས་ས་ཡང་རྣམ་དྲུག་གཡོས། །དེ་ཡི་བདུད་ཀྱི་སྡེ་རྣམས་ཤིང་བལ་བཞིན་དུ་དཀྲུགས། །བདུད་ནི་མདའ་ཐོགས་ས་ལ་རི་མོ་གང་འདྲི་བ། །འདི་ཡང་མི་ཡི་སེང་གེ་གདན་ལ་རོལ་པ་ལགས། །མངོན་པར་རྫོགས་པར་བྱང་ཆུབ་པའི་ལེའུ་ཞེས་བྱ་བ་སྟེ་ཉི་ཤུ་རྩ་གཉིས་པའོ།། །།དེ་ནས་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་བསྐོར་བ་བྱས་ཏེ། ལྷའི་ཙན་དན་གྱི་ཕྱེ་མའི་ཆར་མངོན་པར་ཕབ་ནས། ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་བསྟོད་དོ། །འཇིག་རྟེན་གསལ་བར་མཛད་པ་བྱུང་། །འཇིག་རྟེན་མགོན་པོ་འོད་མཛད་པ། །འཇིག་རྟེན་ལྡོངས་པར་གྱུར་པ་ལ། །ཉོན་མོངས་སྤངས་པ་མིག་སྦྱིན་པ། །ཁྱོད་ནི་གཡུལ་ལས་རྣམ་པར་རྒྱལ། །བསོད་ནམས་དག་གིས་དགོངས་པ་རྫོགས། །དཀར་པོའི་ཆོས་རྣམས་ཀུན་དུ་རྫོགས། །ཁྱོད་ནི་འགྲོ་བ་ཚིམ་མཛད་འགྱུར། །སྡིག་པ་མི་མངའ་འདམ་ལས་རྒལ། །གཽ་ཏ་མ་ནི་ཐང་ལ་བཞུགས། །སེམས་ཅན་གཞན་དག་རླུང་ཆེན་གྱིས། །ཁྱེར་བ་རྣམས་ཀྱང་སྒྲོལ་བར་འགྱུར། །ཤེས་རབ་ཆེན་པོ་ཁྱོད་འཕགས་ཏེ། །འཇིག་རྟེན་དག་ན་ཟླ་མ་མཆིས། །