བདག་གིས་སེམས་ཅན་ཐམས་ཅད་བསྐུལ་བར་བྱའོ་སྙམ་དུ་བྱམས་པ་སྒོམ་པ་དང་། བདག་གིས་སེམས་ཅན་ཐམས་ཅད་ཡོངས་སུ་མྱ་ངན་ལས་བཟླའོ་སྙམ་དུ་བྱམས་པ་སྒོམ་པ་སྟེ། བཟང་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱམས་པ་སྒོམ་པ་ཡིན་ནོ། །བཟང་པོ་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཡིན་ཏེ། བཞི་གང་ཞེ་ན། ངན་སོང་དུ་སྐྱེས་པ་རྣམས་བདེ་འགྲོའི་ལམ་ལ་འགོད་པའི་སྙིང་རྗེ་དང་། སྡིག་པའི་ལས་དང་ལྡན་པ་རྣམས་དགེ་བའི་ཆོས་ལ་སྦྱོར་བའི་སྙིང་རྗེ་དང་། ཐེག་པ་དམན་པ་ལ་མོས་པ་རྣམས་ཐེག་པ་ཆེན་པོ་ཡང་དག་པར་ལེན་དུ་འཇུག་པའི་སྙིང་རྗེ་དང་། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླའོ་སྙམ་པའི་སྙིང་རྗེ་ནི་བཞི་པ་ཡིན་ཏེ། བཞི་པོ་དེ་དག་ཡིན་ནོ། །བཟང་པོ་བྱང་ཆུབ་སེམས་དཔའ་ཆོས་བཞི་དང་ལྡན་ན་མངོན་པར་ཤེས་པ་འཐོབ་པར་འགྱུར་ཏེ། བཞི་གང་ཞེ་ན། ལུས་དང་སེམས་ཡང་བ་དང་། སྒྱུ་མའི་རང་བཞིན་དུ་རྣམ་པར་འབྱེད་པ་དང་། སེམས་ཅན་ཐམས་ཅད་ལ་གུས་པ་དང་། རིམ་གྲོའི་སེམས་བསྐྱེད་པ་དང་། ཞི་གནས་ལ་རྩེ་གཅིག་ཏུ་གྱུར་པས་རྣམ་པར་གཡེང་བ་མེད་པ་ཡིན་ནོ། །བཟང་པོ་བྱང་ཆུབ་སེམས་དཔའ་ཆོས་བཞི་དང་ལྡན་ན་སོ་སོ་ཡང་དག་པར་རིག་པ་འཐོབ་པར་འགྱུར་ཏེ། བཞི་གང་ཞེ་ན། དོན་ལ་རྟོན་པ་ཡིན་གྱི་ཚིག་འབྲུ་ལ་མི་རྟོན་པ་དང་། ཆོས་ལ་རྟོན་པ་ཡིན་གྱི་གང་ཟག་ལ་མི་རྟོན་པ་དང་། ཆོས་ཐམས་ཅད་བདག་མེད་པའི་ངེས་པའི་ཚིག་དང་། ཡི་གེ་མི་ཟད་པར་ཤེས་ནས་ཆགས་པ་མེད་ཅིང་ཐོགས་པ་མེད་པར་སྟོན་པས་སྟོན་པར་བྱེད་པ་སྟེ་བཞི་པོ་དེ་དག་ཡིན་ནོ། །བཟང་པོ་བྱང་ཆུབ་སེམས་དཔའ་ཆོས་བཞི་དང་ལྡན་ན་གཟུངས་འཐོབ་པར་འགྱུར་ཏེ། བཞི་གང་ཞེ་ན། མང་དུ་ཐོས་པས་ངོམས་མི་ཤེས་པ་དང་། མང་དུ་ཐོས་པ་རྣམས་ལ་ཆོས་བཞིན་དུ་གུས་པར་བསྙེན་བཀུར་བྱེད་པ་དང་། རྟག་ཏུ་གཞན་དག་ལ་ཆོས་སྟོན་པར་བརྩོན་པ་དང་། ཚིག་དང་ཡི་གེ་ཐམས་ཅད་གཏན་ལ་དབབ་པའི་ཕྱིར་དེ་བཞིན་གཤེགས་པས་དགོངས་ཏེ་གསུངས་པ་ལ་འཇུག་པ་ཡིན་ནོ། །བཟང་པོ་བྱང་ཆུབ་སེམས་དཔའ་ཆོས་བཞི་དང་ལྡན་ན་བཟོད་པ་འཐོབ་པར་འགྱུར་ཏེ།