རྣམ་ཤེས་ཡིད་ཀྱིས་རབ་ཏུ་ཕྱེ་བ་མིན། །ཆོས་ཉིད་གང་ཡིན་སངས་རྒྱས་བཅོམ་ལྡན་འདས། །དུས་གསུམ་སྟོང་ཞིང་མཚན་ཡང་མ་སྐྱེས་པ། །རྟག་ཏུ་སྒྱུ་མའི་རང་བཞིན་རྣམ་པར་གྲོལ། །དེ་ལ་བགྲང་བས་རབ་ཏུ་ཕྱེ་བ་མེད། །སངས་རྒྱས་འབྱུང་གང་ཆོས་ཉིད་འབྱུང་བ་མེད། །དེ་ལ་ཕུང་པོ་ཡོད་མིན་ཁམས་མི་འབྱུང་། །ཆོས་དེ་གནས་པ་མི་གཡོ་སྟོན་པ་མེད། །དེ་ནི་མིག་ལྔའི་གནས་ཀྱང་མ་ཡིན་ནོ། །གང་ཞིག་བདག་གིས་སངས་རྒྱས་བལྟ་སྙམ་སེམས། །དེས་ནི་གཞར་ཡང་སངས་རྒྱས་མཐོང་མི་འགྱུར། །འདྲེན་པ་མཐོང་བ་མེད་པ་མཐོང་བ་སྟེ། །དཔེར་ན་ནམ་མཁའ་ལ་ནི་བྱ་རྗེས་བཞིན། །བཟང་པོ་གང་ཁྱོད་ཅུང་ཟད་སངས་རྒྱས་ལྟ། །དེ་ཀུན་དོན་གཅིག་ཡིན་པར་ཤེས་པར་གྱིས། །ང་དང་གཞན་གང་ཡིན་པ་དེ་ཀུན་མཚུངས། །བར་སྣང་མཐོང་དང་འདྲ་བར་མཉམ་པ་ཡིན། །དེ་དག་ཏིང་འཛིན་མཉམ་ཞིང་ཤེས་རབ་མཉམ། །དེ་དག་རྣམ་པར་གྲོལ་བར་མཉམ་པ་ཡིན། །རྣམ་གྲོལ་ཡེ་ཤེས་མཐོང་དང་སྟོབས་དང་ནི། །རྒྱལ་བའི་ཡོན་ཏན་ཀུན་གྱིས་མཉམ་པ་ཡིན། །དེ་དག་སྟོང་དོན་གོ་འཕང་གནས་པར་མཉམ། །ཐམས་ཅད་ཆགས་པ་མེད་པའི་ཆོས་ཉིད་གནས། །ཀུན་ཀྱང་སྒྱུ་མའི་རང་བཞིན་རྣམ་པར་གྲོལ། །དེ་དག་འབྱུང་བ་མེད་པར་འབྱུང་བ་ཡིན། །བཟང་པོ་རྒྱལ་བ་གཅིག་ལ་མཆོད་བྱེད་ན། །ཕྱོགས་བཅུའི་སངས་རྒྱས་ལ་ནི་མཆོད་འགྱུར་ཏེ། །འདི་ལྟར་དེ་དག་ང་ཡི་ཆོས་དབྱིངས་དང་། །ཐ་དད་བྱ་བ་ནམ་ཡང་ཡོད་མ་ཡིན། །དེ་དག་ཐམས་ཅད་ཡོན་བཞེས་སྦྱོང་བར་མཛད། །ཀུན་ལ་ཕུལ་བ་འང་འབྲས་བུ་ཆེ་བར་འགྱུར། །དེ་ཀུན་ཆོས་ཉིད་དག་པ་མཉམ་པ་བརྙེས། །སངས་རྒྱས་རྣམས་ལ་ཐ་དད་བྱ་བ་འང་མེད། །རྒྱལ་བ་ཡང་དག་གང་ཡིན་བཤད་བྱ་ཡིས། །རྩེ་གཅིག་སེམས་དང་དྲན་པ་ཉེར་གཞག་ཅིང་། །ཆོས་ཚུལ་རྟོགས་པ་རྣམ་པར་ལྟ་བས་དེ། །ལེགས་པར་ངེས་བསམས་སེམས་ཀྱིས་ང་ལས་ཉོན། །བཟང་པོ་དེ་ཀུན་མ་བསྐྱེད་ཡང་དག་མིན། །ཕྱིན་ཅི་ལོག་གིས་དེ་ཀུན་མཐོང་བར་ཟད། །གལ་ཏེ་དངོས་པོའི་ངོ་བོ་ཡང་དག་ན། །དངོས་པོ་ཐམས་ཅད་དུ་ནི་ཟད་མི་འགྱུར། །དེ་ཕྱིར་ཤིན་ཏུ་མ་སྐྱེས་ཡང་དག་མིན།