ལས་རྣམས་གསུམ་ནི་ཤིན་ཏུ་ཡོངས་དག་པར། །མཚུངས་མེད་བདེ་བར་གཤེགས་པའི་སྐུ་ཚོལ་ལོ། །ཕྱོགས་བཅུ་འགྲོ་བ་ཀུན་ལ་བྱམས་པ་དང་། །སྙིང་རྗེ་རྒྱ་ཆེར་བསྐྱེད་ནས་སྦྱིན་པ་བྱིན། །འདོད་ལ་ལོག་པར་གཡེམ་པ་རྟག་སྤོང་ཞིང་། །ནམ་མཁའ་ལྟ་བུ་མཆོག་གི་སྐུ་ཚོལ་ལོ། །གསེར་ལྟར་དག་ཅིང་མཛེས་པའི་གྲོས་རྣམས་ནི། །དཔག་ཏུ་མེད་པ་གང་གཱའི་བྱེ་མ་སྙེད། །སྦྱིན་པའི་ཕ་རོལ་ཕྱིན་པ་རབ་སྤྱོད་ཅིང་། །རྒྱལ་བའི་སྲས་ཀྱིས་འཇིག་རྟེན་མཆོག་ལ་ཕུལ། །གཡག་གི་རྔ་མ་བཞིན་དུ་ཚུལ་ཁྲིམས་སྲུང་། །ཡན་ལག་ཉིང་ལག་བཅད་ཀྱང་དགྲ་ལ་བཟོད། །བརྩོན་འགྲུས་ཀྱི་ནི་ཕ་རོལ་ཕྱིན་སྤྱོད་ཅིང་། །སངས་རྒྱས་སྐུ་ལ་སྨོན་པས་ཡོངས་མི་སྐྱོ། །ཤེས་རབ་ཐབས་དགའ་རྒྱ་ཆེན་བསམ་གཏན་པ། །བསམ་གཏན་སྤྱོད་ཡུལ་དགའ་རྒྱལ་རྣམ་པར་ལྟ། །ཆོས་དབྱིངས་དམ་པ་བདེ་བར་གཤེགས་པའི་སྐུ། །དེ་འདྲར་བདག་གྱུར་ཅེས་ནི་དེ་ལ་སྨོན། །སྲིད་པར་འགྲོ་བ་དག་ཏུ་དགེ་བྱེད་ཅིང་། །མི་མཆོག་གིས་ནི་བྱང་ཆུབ་མཚུངས་མེད་ཐོབ། །དག་པ་དྲི་མེད་གཙང་ཞིང་རྡུལ་བྲལ་བ། །ནམ་མཁའ་འདྲ་བ་ཡངས་པའི་སྐུ་ཐོབ་བོ། །རང་བཞིན་སྟོང་སྟེ་བདག་དང་སེམས་ཅན་བྲལ། །མཚན་མ་མེད་ཅིང་སྒྲ་དང་བྲལ་བ་ཐོབ། །མིག་གི་ཡུལ་ཀུན་ལས་ནི་རབ་འདས་པ། །དེ་འདྲའི་སྐུ་ནི་ཐུབ་པས་ཡང་དག་ཐོབ། །གཟོད་མ་ནས་སྟོང་མ་བྱས་མ་བྱུང་བ། །གཟུགས་དང་སྒྲ་བྲལ་ཡིད་ཀྱང་རྣམ་དག་པ། །དེ་བཞིན་གཤེགས་སྐུ་མི་གཡོ་གང་མཐོང་བ། །དེས་ནི་ཕྱོགས་བཅུའི་བདེ་བར་གཤེགས་པ་མཐོང་། །ཇི་ལྟར་སྒྱུ་མ་སྤྲུལ་པ་སྣ་ཚོགས་ལུས། །རྟ་དང་གླང་པོ་བུད་མེད་སྐྱེས་པའི་གཟུགས། །བྱིས་པ་སླུ་བ་བརྫུན་ཞིང་ཕྱིན་ཅི་ལོག །དེ་བཞིན་སྟོབས་བཅུ་རྣམས་ལ་བལྟ་བར་བྱོས། །གང་དག་འདས་པའི་བདེ་གཤེགས་དཔག་མེད་དང་། །མ་བྱོན་རྒྱལ་བ་དེ་བཞིན་གང་སྣང་དག །ཆོས་ཉིད་གཅིག་གྱུར་མཉམ་པ་མེད་པའི་སྐུ། །ཆོས་ཀྱི་དབྱིངས་ཀྱི་ཀླས་ཤིང་ནམ་མཁའ་འདྲ། །དེ་ལྟར་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས། ངོ་མཚར་དང་། རྨད་དུ་འདུ་ཤེས་སྐྱེད་དོ། །ཤཱ་རིའི་བུ་ཇི་ལྟར་ན། བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་དབྱངས་བསམ་གྱིས་མི་ཁྱབ་པ་ལ་མངོན་པར་དད།