འདི་ལྟ་སྟེ་དཔེར་ན་སྐྱུ་རུ་ར་འབྲུ་གཅིག་བླངས་པ་བཞིན་དུ་འཇིག་རྟེན་གྱི་ཁམས་གཞན་དུ་འཕངས་ཀྱང་བྱང་ཆུབ་སེམས་དཔའ་དེའི་སྟོབས་ཡོངས་སུ་ཉམས་པར་མི་འགྱུར་བ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལྟར་རྒྱ་ཆེ་བ་འདི་ལྟར་ཡངས་པ་འདི་ཆུའི་ཕུང་པོ་ནས་བཟུང་སྟེ། སྲིད་པའི་རྩེ་མོའི་བར་དུ་ལག་མཐིལ་དུ་བཞག་ལ་བསྐལ་པར་འདུག་ཅིང་སྤྱོད་ལམ་ཐམས་ཅད་ཀྱང་སྟོན་པ་དེ་ལྟ་བུའི་སྟོབས་དང་ལྡན་པའི་བྱང་ཆུབ་སེམས་དཔའ་སྟོབས་སྙེམས་པ་དང་། ཁྲོ་བ་དང་། རྒྱགས་པ་ལྷུར་བྱེད་པའི་སེམས་ཅན་རྣམས་ལ་སྟོབས་སྙེམས་པ་དང་། ཁྲོ་བ་དང་། རྒྱགས་པ་གཞིལ་བའི་ཕྱིར་ཆོས་སྟོན་ཏོ། །དེ་རྫུ་འཕྲུལ་གྱི་རྐང་པ་དེ་དག་གིས་བྱིན་གྱི་རླབས་ཀྱི་ཡེ་ཤེས་འཐོབ་སྟེ། བྱིན་གྱི་རླབས་ཀྱི་ཡེ་ཤེས་དེས་གང་བྱིན་གྱིས་བརླབས་པ་དེ་དེ་བཞིན་དུ་འགྱུར་ཏེ། གལ་ཏེ་རྒྱ་མཚོ་ཆེན་པོ་ཕྱུགས་རྗེས་ཀྱི་ཆུ་ཙམ་དུ་བྱིན་གྱིས་བརླབས་ན་དེ་ཕྱུགས་རྗེས་ཀྱི་ཆུ་ཙམ་དུ་གནས་སོ། །གལ་ཏེ་ཕྱུགས་རྗེས་རྒྱ་མཚོ་ཆེན་པོ་ཙམ་དུ་གྱུར་ཅིག་ཅེ་ན་ཡང་དེ་རྒྱ་མཚོ་ཆེན་པོར་འགྱུར་རོ། །གལ་ཏེ་སྲེག་པའི་བསྐལ་པ་ཆུའི་ཕུང་པོར་གྱུར་ཅིག །ཅེས་བྱིན་གྱིས་བརླབས་ན་ཡང་དེ་དེ་བཞིན་དུ་ཆུའི་ཕུང་པོར་འགྱུར་རོ། །ཆུས་འཇིག་པ་ཡང་མེས་འཇིག་པར་གྱུར་ཅིག་ཅེས་བྱིན་གྱིས་བརླབས་ན་དེ་དེ་བཞིན་དུ་འགྱུར་རོ། །དེ་བཞིན་དུ་སྦྱར་ཏེ། ཐ་མ་དང་། རབ་དང་། འབྲིང་གི་ཆོས་རྣམས་ཀྱིས་གང་དང་གང་བྱིན་གྱིས་བརླབས་པའི་བྱིན་གྱི་བརླབས་དེ་དང་དེ་ཐམས་ཅད་དེ་བཞིན་དུ་འགྱུར་ཏེ། གཞན་དུ་མ་ཡིན་ནོ། །དེའི་བྱིན་གྱི་རླབས་དེ་ནི་དགེ་སྦྱོང་ངམ། བྲམ་ཟེའམ། ལྷའམ། བརྒྱ་བྱིན་ནམ། བདུད་དམ། ཚངས་པའམ། འཇིག་རྟེན་འདི་ན་གང་གིས་ཀྱང་ཆོས་དང་འཐུན་པས་བསྒུལ་བའམ། བསྐྱོད་པའམ། མི་སྣང་བར་བྱེད་མི་ནུས་ཏེ། སངས་རྒྱས་བཅོམ་ལྡན་འདས་རྣམས་ནི་མ་གཏོགས་སོ། །དེ་བྱིན་གྱི་རླབས་ཀྱི་སྟོབས་བསྐྱེད་པ་དེས་དགའ་བ་དང་མཆོག་ཏུ་དགའ་བ་རྒྱ་ཆེན་པོ་སྣ་ཚོགས་ལྷུར་བྱེད་པའི་སེམས་ཅན་རྣམས་ལ་ཆོས་སྟོན་ཏོ། །དེའི་རྫུ་འཕྲུལ་གྱི་རྐང་པ་དེ་དག་ཀྱང་ཉམས་པ་མེད་པའོ། །བདག་ཉིད་དབང་བའོ། །བདུད་དང་ཉོན་མོངས་པའི་ཡུལ་ལས་ཤིན་ཏུ་འདས་པའོ།