ཤཱ་རིའི་བུ་དེ་ལྟར་ཚུལ་ཁྲིམས་སྤྱོད་པའི་བྱང་ཆུབ་སེམས་དཔའི་བསམ་པ་ཆོས་བཅུ་པོ་དེ་དག་འདུས་པར་འགྱུར་རོ། །དེ་ཆོས་བཅུ་པོ་དེ་དག་ལ་རབ་ཏུ་གནས་ནས་དགེ་བའི་ཆོས་རྣམས་ཡང་དག་པར་སྒྲུབ་བོ། །དགེ་བའི་ཆོས་གང་ཞེ་ན། འདི་ལྟ་སྟེ། ལེགས་པར་སྤྱོད་པ་གསུམ་པོ་འདི་དག་ཉིད་དེ་ལུས་དང་ངག་དང་ཡིད་ཀྱིས་ལེགས་པར་སྤྱོད་པའོ། །ལེགས་པར་སྤྱོད་པ་གསུམ་པོ་དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་དེའི་བྱང་ཆུབ་གང་དང་འབྲེལ་པའི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་ལོ། །འདི་ལ་དེའི་ཆོས་ཉིད་ནི་འདི་ཡིན་ཏེ། དེ་ལ་འདི་སྐད་ཅེས་བྱའོ། །སངས་རྒྱས་དག་གིས་བསྔགས་པ་ཡི། །དགེ་བའི་ལས་རྣམས་ལུས་ཀྱིས་བྱེད། གང་ལས་ཐོས་པ་རྙེད་འགྱུར་བའི། །སློབ་དཔོན་ལ་ཡང་རིམ་གྲོ་བྱེད། །སེམས་ཅན་ཐམས་ཅད་དོན་གྱི་ཕྱིར། །བྱམས་པའི་སེམས་ལྡན་ཕྲག་དོག་མེད། །ཆོས་ལས་བརྩམས་ཏེ་གང་ཟག་ལ། །རི་མོ་དག་ནི་རབ་ཏུ་བྱེད། །ངག་ནི་ཤིན་ཏུ་སྡོམ་གྱུར་ཏེ། །དེ་ནི་མི་སྙན་ཚིག་མི་སྨྲ། །འདི་ནི་འདུན་དང་ལྡན་པའི་མཚན། །ནམ་དུའང་ངག་རྩུབ་མི་སྨྲའོ། །ཡིད་ནི་དགེ་བའི་ཡིད་དུ་འགྱུར། །ནམ་དུའང་སྡིག་པ་མི་འདོད་དོ། །བྱམས་སེམས་གུས་དང་བཅས་པ་ཡི། །བསམ་པ་ཉིད་ཀྱིས་རྟག་ཏུ་ལྟ། །རྒྱལ་བས་བསྟན་པ་ཐོས་གྱུར་ནས། །ཆོས་འདི་ལ་ནི་གུས་དང་བཅས། །ཆོས་ལ་གུས་པར་བྱས་པས་ན། །མྱུར་དུ་བྱང་ཆུབ་རྣམ་འཚང་རྒྱ། །ཆོས་བཅུ་པོ་དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང་བསྙེན་བཀུར་བྱེད་དེ། ཐ་ན་ཆུ་རྫ་གང་ཙམ་ཡང་འབུལ་ལོ། །གཞན་ཡང་ཤྭ་རིའི་བུ་བྱང་ཆུབ་སེམས་དཔའ་སེམས་བསྐྱེད་པ་བཅུ་བསྐྱེད་དེ། བཅུ་གང་ཞེ་ན། ཀྱེ་མའོ་ལུས་འདི་ནི་ན་བ་སྟེ། ཁམས་ནི་སྦྲུལ་གདུག་པ་བཞིན་དུ་རྟག་པར་ཕན་ཚུན་མི་འཕྲོད་པའོ། །སྡུག་བསྔལ་མང་བའོ། །ཉེས་པ་མང་བའོ། །སྨྱོ་བ་དང་། འབྲས་དང་། ཕོལ་མིག་དང་། མེ་དབལ་དང་། གཡན་པ་དང་། རླུང་དང་། མཁྲིས་པ་དང་། བད་ཀན་གྱིས་གང་སྟེ། ནད་དང་འདྲ། ཕོལ་མིག་དང་འདྲ། ཟུག་རྔུ་དང་འདྲ། ཆུ་བོ་དང་འདྲ། གནོད་པ་དང་འདྲ། གཡོ་བ།