།ཇི་ལྟར་ནམ་མཁའ་ནམ་མཁའ་ཞེས་ཀྱང་བྱ་ལ་ནམ་མཁའ་ནི་བརྗོད་པར་བྱ་བའང་མ་ཡིན་ནོ། །དེ་བཞིན་དུ་སྟོང་པ་སྟོང་པ་ཞེས་ཀྱང་བྱ་ལ་སྟོང་པ་ཉིད་བརྗོད་པར་བྱ་བ་མ་ཡིན་ནོ། འདི་ལྟ་སྟེ། མིང་ཙམ་དུ་ཐ་སྙད་འདོགས་པ་འདི་ནི་ཆོས་ཐམས་ཅད་ལ་འཇུག་པ་སྟེ། མིང་དེ་ཡང་ཡུལ་ན་མི་གནས། ཕྱོགས་ན་མི་གནས་སོ། །ཇི་ལྟར་མིང་ཡུལ་ན་མི་གནས། ཕྱོགས་ན་མི་གནས་པ་དེ་བཞིན་དུ་ཆོས་ཀྱི་མིང་གིས་ཐ་སྙད་དུ་འདོགས་པའི་ཆོས་དེ་ཡང་ཡུལ་ན་མི་གནས། ཕྱོགས་ན་མི་གནས་ཏེ། དེ་ལྟར་དེ་བཞིན་གཤེགས་པས་ཆོས་ཐམས་ཅད་མཁྱེན་ཏོ། །ཐོག་མ་ནས་མ་སྐྱེས་མ་བྱུང་བར་དེ་ལྟར་མཁྱེན་པས་དེ་ལྟར་རྣམ་པར་གྲོལ་ཏེ་བཅིངས་པ་ཡང་མེད། གྲོལ་བ་ཡང་མེད་ན་དེ་བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ་ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ །ཤཱ་རིའི་བུ་བྱང་ཆུབ་ནི་ནམ་མཁའ་དང་མཉམ་སྟེ། ནམ་མཁའ་ནི་མཉམ་པ་ཡང་མ་ཡིན་མི་མཉམ་པའང་མ་ཡིན་ནོ། །བྱང་ཆུབ་ཀྱང་མཉམ་པ་འང་མ་ཡིན། མི་མཉམ་པ་འང་མ་ཡིན་ཏེ། ཇི་ལྟར་ཆོས་རྣམས་ཡང་དག་པར་ཡོངས་སུ་གྲུབ་པ་མེད་པ་དེ་མཉམ་པའམ་མི་མཉམ་པ་ཞེས་བརྗོད་པ་མ་ཡིན་ནོ། །དེ་ལྟར་ཤཱ་རིའི་བུ་དེ་བཞིན་གཤེགས་པས་ཆོས་ཐམས་ཅད་མཉམ་པ་འང་མ་ཡིན། མི་མཉམ་པར་ཡང་མ་ཡིན་པར་མངོན་པར་རྫོགས་པར་སངས་རྒྱས་སོ། །ཇི་ལྟར་ཆོས་རྡུལ་ཙམ་ཡང་མཉམ་པར་བྱས་པ་ཡང་མ་ཡིན། མི་མཉམ་པར་བྱས་པ་ཡང་མ་ཡིན་པ་དེ་ལྟར་མངོན་པར་རྫོགས་པར་སངས་རྒྱས་སོ། །ཆོས་ཇི་སྙེད་པ་དེ་དག་ཡང་དག་པའི་ཡེ་ཤེས་ཀྱིས་ཤེས་སོ། །ཡང་དག་པའི་ཡེ་ཤེས་གང་ཞེ་ན། ཆོས་མ་བྱུང་བ་རྣམས་འབྱུང་བ་དང་། བྱུང་ནས་འཇིག་པར་འགྱུར་བ་དེ་དག་ནི་བདག་པོ་མེད་པར་འབྱུང་། བདག་པོ་མེད་པར་འཇིག་སྟེ། རྐྱེན་གྱིས་འབྱུང་བ་དང་། འཇིག་པར་འགྱུར་ཞིང་འདི་ལ་འཇུག་པ་འམ། ལྡོག་པ་གང་ཡང་མེད་དེ། ལམ་གཅད་པའི་ཕྱིར་དེ་བཞིན་གཤེགས་པ་ཆོས་སྟོན་ཏོ། །ལམ་གཅད་པ་འདི་སེམས་ཅན་རྣམས་ཀྱིས་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ་ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ །ཤཱ་རིའི་བུ་བྱང་ཆུབ་དེ་ནི་ཇི་ལྟ་བ་བཞིན་གྱི་གནས་སོ། །བྱང་ཆུབ་ཇི་ལྟ་བར་གཟུགས་ཀྱང་དེ་བཞིན་ཏེ་དེ་བཞིན་ཉིད་ཀྱིས་མི་འབྱུང་ངོ་།