།ཡང་དག་པ་མ་ཡིན་པའི་རྣམ་པར་རྟོག་པ་རྣམས་ནི་ཡང་དག་པའི་རྣམ་པར་རྟོག་པས་སོ། །བདེ་བའི་རྣམ་པར་རྟོག་པ་རྣམས་ནི་སྡུག་བསྔལ་གྱི་རྣམ་པར་རྟོག་པས་སོ། །སྟོང་པ་མ་ཡིན་པའི་རྣམ་པར་རྟོག་པ་རྣམས་ནི་སྟོང་པའི་རྣམ་པར་རྟོག་པས་སོ། །བདག་གི་རྣམ་པར་རྟོག་པ་རྣམས་ནི་བདག་མེད་པའི་རྣམ་པར་རྟོག་པས་སོ། །དེ་ལྟར་ཡང་དག་པར་གྱུར་པའི་གཉེན་པོར་གྱུར་པ་རྣམས་ཀྱི་གཉེན་པོའི་རྣམ་པར་རྟོག་པར་འགྱུར་བ་དེ་རྣམས་ཀྱིས་ཡོངས་སུ་སྤོང་བར་བྱེད་དོ། །རྐྱེན་ལས་བྱུང་བའི་ཡང་ཤིན་ཏུ་ཕྲ་བའམ་རགས་པའམ་བར་མ་ཡང་ཡོངས་སུ་སྤོང་བར་བྱེད་དོ། །དེ་ཐམས་ཅད་ལ་གནས་སྐབས་ཐམས་ཅད་དུ་མི་དགེ་བའི་རྐྱེན་རྣམས་དམ་པའི་ཆོས་ཐོས་ནས་སྤོང་བར་བྱེད་ཀྱི་མ་ཐོས་པར་ནི་མ་ཡིན་ནོ། །དམ་པའི་ཆོས་བསྒྲགས་པ་ནི་བདེ་ལེགས་རྣམས་ཐམས་ཅད་ཀྱི་གཞིར་གྱུར་པ་ལྟ་བུ་ཡིན་ནོ། །ཡང་དམ་པའི་ཆོས་བསྒྲགས་པ་ལ་ཡོན་ཏན་གཞན་ཡོད་དོ། །འདི་ཡང་གང་ཞེ་ན་འདི་ལྟ་སྟེ། བག་ཡོད་པར་གྱུར་པའོ། །གང་གི་ཚེ་རྣམ་པར་རྟོག་པ་རྣམས་ཡོངས་སུ་སྤོང་བར་བྱེད་པ་དེའི་ཚེ་བག་ཡོད་པར་འགྱུར་རོ། །དེས་ནི་བདེ་ལེགས་རྣམས་ཐམས་ཅད་འཐོབ་པར་འགྱུར་རོ། །བག་མེད་པ་དེ་ཡང་གང་གིས་མེད་པར་འགྱུར་བ་ཡིན་ན། དམ་པའི་ཆོས་བསྒྲགས་པ་འབའ་ཞིག་གིས་ཡིན་ཏེ། གང་གི་ཕྱིར་བག་མེད་པའི་སྐྱོན་རྣམས་ཐོས་ནས་ཡོངས་སུ་སྤོང་བར་བྱེད་དོ། །དམ་པའི་ཆོས་བསྒྲགས་པ་ལས་གྱུར་པས་བག་ཡོད་པ་དེའི་དབང་པོ་ལྔ་པོ་རྣམས་དབང་དུ་འགྱུར་རོ། །དབང་པོ་ལྔ་ཀུན་ཏུ་བསྡུས་པ་དེའི་བློ་ནི་ཚུལ་བཞིན་མ་ཡིན་པ་ཡིད་ལ་བྱེད་པས་གནོད་པར་མི་འགྱུར་རོ། །རྟག་པར་རྒྱུན་དུ་ཡང་ཚུལ་བཞིན་ཡིད་ལ་བྱེད་པ་སྟེན་པར་བྱེད་དོ། །དེས་ཚུལ་བཞིན་ཡིད་ལ་བྱེད་པ་དེ་མགུ་བར་བྱས་པར་གྱུར་ན་མཆོག་ཏུ་བདེ་བར་གྱུར་པ་རྣམས་འཐོབ་པར་འགྱུར་རོ། །གང་གི་ཕྱིར་བག་མེད་པའི་རྩ་བ་ལས་ཉོན་མོངས་པའི་ཚོགས་རྣམས་ཐམས་ཅད་ཡིན་ནོ། །དེ་བཞིན་དུ་བག་ཡོད་པའི་གཞི་ལས་ཀྱང་རྣམ་པར་བྱང་བའི་ཕྱོགས་རྣམས་ཡོད་དོ། །དེའི་ཕྱིར་བག་མེད་པ་རྣམས་ཀྱི་གཉེན་པོར་གྱུར་པ་ཡིན་པས་དམ་པའི་ཆོས་ཅི་ནས་ཀྱང་བསྒྲགས་པར་བྱ་བ་ཁོ་ན་ཡིན་ནོ། །ཡང་དང་ཡང་དུ་བསྒོམ་པར་བྱའོ། །ལན་མང་དུ་བྱའོ།