།དེ་ནས་ལྷ་གང་དག་ལེགས་པར་བྱས་པའི་ལས་ཀྱིས་དེར་སྐྱེས་པ་དེ་དག་རྣམས་འདི་ལྟར་འགྱུར་ཏེ། སྔ་ན་མེད་པའི་གླུའི་སྒྲ་དེ་དག་ཐོས་པའི་དཔེ་མེད་པ་དེ་དག་གིས་དྲངས་པར་གྱུར་པས། ཀླུང་དུ་སྐྱེས་པའི་ཤིང་རིན་པོ་ཆེ་བདུན་གྱི་རང་བཞིན་གྱི་ལྗོན་ཤིང་རྣམས་ཀྱི་ནགས་དེ་དག་གི་ནང་གང་ན་ཡོད་པ་དེར་ལེགས་པར་ཉེ་བར་འགྲོ་བར་བྱེད་དོ། །དེ་ནས་ལྷ་གཞན་གང་དག་ལྷའི་རིགས་དེ་ནས་འཆི་འཕོས་པར་གྱུར་ནས་རཱ་ཛ་ནི་ན་རྒྱུ་བའི་ས་དེར་སྐྱེས་པར་གྱུར་པའི་ལྷ་གསར་དུ་སྐྱེས་པ་དེ་དག་ལྷ་རྫས་ཀྱི་ཕྲེང་བས་ཀུན་ཏུ་བརྒྱན་པའི་ལྷའི་བུ་མོ་གང་ཡིན་པ་དེ་དག་རྣམས་ཀྱིས་མངོན་པར་མཐོང་ཞིང་། རྗེ་དཔོན་དེ་མངོན་པར་མཐོང་བར་གྱུར་ནས་ཀྱང་མངོན་པར་རྒྱུག་གོ། །ལྷའི་རིགས་དེར་ལས་ཀྱི་འབྲས་བུ་རྣམ་པར་སྨིན་པ་འདི་དག་ནི་ཇི་ལྟར་སྲོག་གཅོད་པ་དང་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་རྣམ་པར་སྤངས་པས་དེ་ལ་སྐྱེ་བར་འགྱུར་བ་ཡིན་ནོ། །འདོད་པ་ལ་ལོག་པར་གཡེམ་པ་རྣམ་པར་སྤངས་པས་དེ་དག་རྣམས་ཀྱི་ལྷ་མོ་ནི་གཞན་ལ་མི་འཕོའོ། །མ་སྤངས་པ་དེ་དག་རྣམས་ཀྱི་ནི་ལྷ་མོ་རྣམས་ནི་གཞན་ལ་ཀུན་ཏུ་ཉེ་བར་འཕོ་བར་འགྱུར་རོ། །རྒྱལ་ཆེན་བཞིའི་རིས་ཀྱི་ལྷ་དང་སུམ་ཅུ་རྩ་གསུམ་པ་རྣམས་ནི་ལྷ་གང་དག་གིས་འདོད་པ་ལ་ལོག་པར་གཡེམ་པ་ཡོངས་སུ་མ་སྤངས་པར་གྱུར་པ་རྣམས་ནི། དེ་ལས་འཆི་འཕོ་བར་གྱུར་པ་ན་ལྷ་གཞན་དེ་དག་ལྷ་མོ་རྣམས་ཀྱི་ནང་དུ་སྐྱེའོ། །དེ་དག་རྣམས་ཀྱིས་ཀྱང་འོད་ཉམས་པར་གྱུར་པའི་མར་མེ་དང་འདྲ་བའི་ཚེ་འགག་པར་འགྱུར་བ་སྤངས་ནས་གསར་དུ་སྐྱེས་པའི་ལྷ་དེ་དག་ལ་སྟེན་པར་བྱེད་དོ། །དེ་དང་ལྷན་ཅིག་ཏུ་རྩེ་བར་བྱེད་དགའ་བར་བྱེད་ཡོངས་སུ་སྤྱོད་པར་བྱེད་དོ། །དེ་ནས་འཆི་འཕོ་བར་གྱུར་པའི་ལྷ་གང་ཡིན་པ་འདི་ལ་འཆི་འཕོ་བར་འགྱུར་བས་བྱས་པའི་ཕྲག་དོག་གིས་དེ་ལ་སྡུག་བསྔལ་སྐྱེ་བར་འགྱུར་རོ། །འདི་ནི་དམྱལ་བའི་ཡང་སྡུག་བསྔལ་ཆེན་པོ་ཡིན་ཏེ། སེམས་ཀྱི་སྐྱོན་ཕུལ་དུ་ཕྱིན་པ་དེས་དམྱལ་བར་སྐྱེ་བར་འགྱུར་རོ། །ལྷ་དེ་འཆི་འཕོ་བ་དེའི་འབྲས་བུ་རྣམ་པར་སྨིན་པ་འདི་ནི་འཐབ་བྲལ་བའི་ལྷ་རྣམས་ལ་མེད་པ་ཡིན་ཏེ། དེ་དག་ནི་ཕལ་ཆེར་འདོད་པ་ལ་ལོག་པར་གཡེམ་པ་རྣམས་མ་སྤངས་པ་རྣམས་དེ་དག་ཏུ་སྐྱེ་བར་འགྱུར་རོ།