འདི་ལྟ་སྟེ་མི་གནས་པས་ཉེ་བར་བཅོམ་པ་ཉིད་དོ། །མི་གནས་པས་ཉེ་བར་བཅོམ་པ་ནི་གང་གི་ཕྱིར་དགེ་སྦྱོང་ངམ་བྲམ་ཟེ་རྣམས་གང་དག་ཡིན་ཡང་རུང་སྟེ། དེ་དག་རྣམས་ནི་བློ་གྲོས་དམན་པ་རྣམས་ཡིན་ནོ། །མི་གནས་པས་ཉེ་བར་བཅོམ་པར་གྱུར་པའི་སྐྱོན་དེས་སེམས་ཆགས་པར་བྱེད་དོ། །མི་གནས་པ་དེ་ཉིད་ཀྱིས་ཀུན་ཏུ་འཁོར་བར་བྱེད་དེ། དགེ་འདུན་གྱི་ཀུན་དགའ་ར་བ་དང་གཙུག་ལག་ཁང་དང་གྲོང་དང་ཡུལ་དང་གྲོང་ཁྱེར་དང་གཞན་དག་ཏུ་ཡང་རུང་སྟེ། རྟག་ཏུ་ཡང་ལེ་ལོ་ཅན་དུ་འགྱུར་རོ། །དེ་དང་དེ་ཉིད་ལ་དགའ་བར་འགྱུར་རོ། །དེ་ཞི་བའི་དགོན་པ་རྣམས་དང་ཞི་བའི་གནས་གཞན་དག་རྣམས་སུ་ཡང་མངོན་པར་དགའ་བར་མི་འགྱུར་རོ། །ལེགས་པར་འགྲོ་བའི་རང་བཞིན་ཅན་མ་ཡིན་ཏེ། འགྲོན་ལམ་དུ་འགྲོ་བའི་དབང་དུ་བྱས་པ་ན་ཡང་དེ་ནི་རབ་ཏུ་བྱུང་བ་ཡང་མ་ཡིན་ལ་ཁྱིམ་པ་ཡང་མ་ཡིན་ནོ། །དེ་ཐམས་ཅད་དུ་རིགས་མཚུངས་པར་འགྱུར་རོ། །ཡུལ་ཕྱོགས་གཅིག་པོ་དེ་ཉིད་ལ་གནས་པས་ཀྱང་དུས་འདའ་བར་བྱེད་དོ། །དེ་གང་གི་དོན་དུ་རབ་ཏུ་བྱུང་བར་གྱུར་པའི་བསམ་གཏན་གྱིས་བདེ་བར་གནས་པར་བྱ་བ་དེ་ཉིད་ནི་མི་བྱེད་དེ། ཀུན་ཏུ་གནས་པའི་སྐྱོན་གྱིས་ཉེ་བར་བཅོམ་པའི་ཕྱིར་རོ། །གང་ཡང་མི་ཚུགས་པའི་སྐྱོན་དེ་རིག་པར་གྱུར་ནས་དགེ་སྦྱོང་ངམ་བྲམ་ཟེའམ་གཞན་ཡང་དེ་དང་རང་བཞིན་འདྲ་བ་དག་ལ་སྦྱིན་པ་པོ་དང་སྦྱིན་བདག་རྣམས་ཁ་དྲག་པར་འགྱུར་རོ། །འདི་དང་ཕྲད་པའི་དོན་དུ་ཐམས་ཅད་དུ་ཉེ་བར་འོང་བར་ཡང་མི་འགྱུར་རོ། །འདི་ལ་གང་སྦྱིན་པ་པོ་དང་སྦྱིན་བདག་རྣམས་དབང་དུ་མི་འགྱུར་བར་དབང་ཆེན་པོར་འགྱུར་རོ། །འདི་དག་གི་ཚིག་ཉན་པར་མི་འགྱུར་ཞིང་། དེ་གཙོ་བོར་བྱས་ནས་སྦྱིན་པ་རྣམས་གཏོང་བར་མི་བྱེད་དོ། །ཤིན་ཏུ་སེམས་སྟོབས་ཡང་བར་གྱུར་པ་འདུག་པའི་ས་མི་ཟིན་པས་ཉེ་བར་བཅོམ་པ་རྟག་ཏུ་འཕྲད་པར་བྱེད་པ་རྟག་ཏུ་ཞབས་འབྲིང་བྱེད་པ་ཡིན་ནོ། །དེ་ཀུན་ཏུ་གནས་པས་ཉེ་བར་བཅོམ་པའི་སྐྱོན་གྱིས་ཉེ་བར་བཅོམ་པར་གྱུར་པ་ལ་བཞད་གད་དུ་བྱེད་དོ། །ཁྱིམ་པ་དག་ཕན་ཚུན་དུ་གླེང་བརྗོད་ཀྱང་བྱེད་དེ། ཇི་ལྟར་དགེ་སྦྱོང་ངམ་བྲམ་ཟེ་ཆེ་གེ་མོ་ཞེས་བྱ་བ་གར་ཡང་མི་ཆགས་པས་ཉེ་བར་བཅོམ་པས་དེ་དང་དེ་ཉིད་ལ་དགའོ།