སྐྱེ་བོ་རྣམས་ཐམས་ཅད་ཀྱི་ཡང་མ་དང་ཕ་དག་ཏུ་རུང་བར་འགྱུར་རོ། །ཀུན་གྱིས་འདྲུལ་འཇུག་བྱ་བར་ཡང་འགྱུར་རོ། །སྐྱེས་བུ་དམ་པ་བཟོད་པ་དང་ལྡན་པར་ཡང་འགྱུར་རོ། །དེའི་ཕྱིར་ཁྲོ་བ་གཞན་འདི་ནི་བཙན་དུག་དང་མཚོན་ཆ་དང་རླུང་ཚུབ་དང་མཚུངས་པའི་ཁྲོ་བ་གང་ཡིན་པ་རྣམས་བཟོད་པས་ཞི་བར་བྱེད་དོ། །མཐོལ་བར་བྱེད་པ་དང་བཟོད་པར་བྱེད་པ་དང་སྡོམ་པར་ཡང་བྱེད་དོ། །བཟོད་པ་དེ་ཡང་སྐྱེས་བུ་དམ་པ་དགེ་བར་འདོད་པ་རྣམས་ཀྱིས་ཡིད་ལ་བྱ་སྟེ། རིན་པོ་ཆེ་བཞིན་དུ་ཡོངས་སུ་སྐྱོངས་ཤིག །དེ་ཡང་ཕ་རོལ་ཁྲོ་བས་རྣམ་པར་བསྲེགས་པ་རྣམས་དང་ཁྲོ་བའི་མུན་པ་ན་ཀུན་ནས་གནས་པ་དེ་དག་རྣམས་ལ། དམ་པའི་ཆོས་ཀྱི་སྒྲོན་མ་རབ་ཏུ་སྦོར་བར་བྱེད་པ་དང་། དམུས་ལོང་རྣམས་ཀྱི་ནི་མིག་ཏུ་གྱུར་པའོ། །དམ་པའི་ཆོས་ཀྱིས་ཕོངས་པ་རྣམས་ལ་ནི་ཆོས་ཀྱི་རྫས་སོ། །ལོག་པའི་ལྟ་བས་དབུལ་བ་རྣམས་ནི་འཇོམས་པར་བྱེད་པ་ཡིན་ནོ། །མ་དང་ཕས་སྤངས་པ་རྣམས་ལ་ནི་མ་དང་ཕར་གྱུར་པ་ཡིན་ནོ། །ཁྲོ་བའི་ཆུར་རབ་ཏུ་བྱིང་བར་གྱུར་པ་རྣམས་ཀྱི་རྐྱལ་བར་གྱུར་པས་རྟག་ཏུ་ཕན་འདོགས་པར་བྱེད་པ་ཡིན་ནོ། །ངན་སོང་དུ་རབ་ཏུ་ལྟུང་བ་རྣམས་ལ་ནི་ལག་པ་བརྐྱང་བས་ཤིན་ཏུ་བརྟན་པོས་ལེགས་པར་འདྲེན་པར་བྱེད་པའོ། །སེམས་ཅན་ཁྲོ་བས་ཟིན་པས་དམྱལ་བའི་མེ་མདག་ཏུ་རབ་ཏུ་ལྷུང་བར་གྱུར་པ་རྣམས་ལ་ནི་ཆུའི་བྱ་བ་བྱེད་པ་ཡིན་ནོ། །ཡི་དགས་ཀྱི་འཇིག་རྟེན་དུ་རབ་ཏུ་རྒྱུགས་པར་གྱུར་པའི་སྐྱེས་བུ་ཕྲག་དོག་དང་ལྡན་པ་རྣམས་བཀྲེས་པ་དང་སྐོམ་པའི་སྡུག་བསྔལ་གྱིས་རྣམ་པར་བཅོམ་པ་རྣམས་ལ་ནི་ཟས་དང་སྐོམ་བཞིན་དུ་བྱེད་པ་ཡིན་ནོ། །དུད་འགྲོའི་འགྲོ་བ་དང་རབ་ཏུ་འབྲེལ་བ་དང་ལྡན་པའི་སེམས་ཅན་རྣམས་ཕན་ཚུན་དུ་གསོད་པར་མངོན་པར་དགའ་བ་རྣམས་ལ་ནི་གསོན་པ་ལེགས་པར་སྦྱིན་པར་བྱེད་པ་རྣམས་བཟོད་པ་བསྟེན་ཅིང་བསྒོམས་ལ་ལན་མང་དུ་བྱས་པ་ལས་ཡིན་པས། དེའི་ཕྱིར་ངན་སོང་གི་འཇིགས་པས་འཇིགས་པར་གྱུར་པའི་སྐྱེས་བུ་དགེ་བ་རྣམས་ཀྱིས་རབ་ཏུ་བརྩོན་པ་མཆོག་གིས་ཡིད་ལ་བྱའོ། །དེ་ནས་དུས་དེའི་ཚེ་ན་རྨ་བྱའི་བདག་པོ་དེས་གཙུག་ལག་གི་ཚིགས་སུ་བཅད་པ་བརྗོད་པ།