།མི་བྱེད་པ་བྱས་པ་ནི་གང་དག་དགེ་སྦྱོང་དུ་གྱུར་ནས་ལེགས་པར་བྱ་བ་མི་བྱེད་པའོ། །འབྲེལ་བར་བྱས་པ་ནི་ཇི་ལྟར་ཚེ་འདི་ལས་ཤི་ནས་ཚེ་རབས་གཞན་དུ་སྐྱེ་བར་འགྱུར་བའོ། །ཡང་རྣམ་པ་གསུམ་སྟེ། བསམ་གཏན་དང་འབྲེལ་བ་དང་། བསམ་གཏན་དང་འབྲེལ་བ་མ་ཡིན་པ་དང་། རྣམ་པར་སྨིན་པ་དང་འབྲེལ་བ་མ་ཡིན་པའོ། །དེ་ལ་བསམ་གཏན་དང་འབྲེལ་བ་ཞེས་བྱ་བ་ནི་ཇི་ལྟར་བསམ་གཏན་དང་པོའི་ས་ནས། བསམ་གཏན་གཉིས་པའི་སར་འབྲེལ་བ་ཡིན་ཏེ། བསམ་གཏན་གསུམ་པའམ། བཞི་པར་མ་ཡིན་ནོ། །བསམ་གཏན་དང་འབྲེལ་བ་མ་ཡིན་པ་ནི་སྦྱིན་པ་དང་། ཚུལ་ཁྲིམས་ལ་སོགས་པའོ། །རྣམ་པར་སྨིན་པ་དང་འབྲེལ་བ་མ་ཡིན་ཞེས་བྱ་བ་ནི་ཇི་ལྟར་དགྲ་བཅོམ་པ་ཟག་པ་ཟད་པའི་རྣམ་པར་སྨིན་པ་མྱོང་བར་འགྱུར་བར་ངེས་པ། ཚེ་དང་འབྲེལ་བ་མེད་པ་ཡིན་ཏེ། དེ་ལྟར་འཇིག་རྟེན་ལས་ཀྱི་དྲ་བ་དང་འབྲེལ་བ་རྒྱ་མཚོ་ལྟ་བུ་འདི་ཀུན་ཕན་ཚུན་རག་ལས་ཤིང་སྐྱེ་བའི་རིམ་པའི་ལས་ཀྱི་རྣམ་པར་སྨིན་པར་འགྱུར་ཏེ། འདི་ལ་བྱེད་པ་པོའམ་ཚོར་བ་པོའམ་འདོད་རྒྱལ་གྱི་ལས་ནི་གང་ཡང་མེད་དོ་སྙམ་མོ། །དགེ་སློང་དེ་དེ་ལྟར་སེམས་པ་ན་བདུད་ཀྱི་སྡེ་རྣམ་པར་འཇིག་པར་བྱེད་ཅིང་དགེ་བའི་ཆོས་སྒྲུབ་པར་བྱེད་དོ། །སེམས་ཅན་དམྱལ་བ་བསྡུས་གཞོམ་གྱི་ལས་ཀྱི་རྣམ་པར་སྨིན་པ་ཆེན་པོ་ཡང་རྗེས་སུ་མཐོང་སྟེ། ཇི་ལྟར་ན་སེམས་ཅན་དམྱལ་བ་བསྡུས་གཞོམ་གྱི་གཞིར་སྐྱེ་བར་འགྱུར་སྙམ་ན་དེས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་དང་། ལས་ཀྱི་ཉེར་བསྡོགས་པ་དང་། ལས་ཀྱི་མཇུག་དང་། ལས་མངོན་པར་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་བསྡུས་གཞོམ་གྱི་འཁོར་དུ་སྐྱེ་བར་འགྱུར་བ་མཐོང་ངོ་། །དེར་སེམས་ཅན་དམྱལ་བ་གཞིའི་གནོད་པ་འདི་དག་འབྱུང་སྟེ། འདི་ལྟ་སྟེ། ཤིང་ལྗོན་པའི་ཁྲོད་དུ་བྱ་རྒོད་མཆུ་རབ་ཏུ་འབར་བ་དག་གིས་བཟུང་ནས་རྒྱུ་མ་བྲུས་ཏེ་ཟ་བར་བྱེད་དོ། །ཆུ་བོ་ཕུར་བུས་གང་བ་ཞེས་བྱ་བ་ན། ཕུར་བུ་རིང་པོ་རབ་ཏུ་འབར་བ་དེར་བཅུག་ནས་གཤིན་རྗེའི་མིས་ཡང་རལ་གྲི་རབ་ཏུ་འབར་བ་མང་པོ་དག་གིས་གསོད་པར་བྱེད་དོ།