།གཞན་ཡང་ལྷས་ཡུལ་ཕྱོགས་གཞན་རྣམས་སུ་མཐོང་བར་གྱུར་པ་ལ་གང་དག་ཇི་ལྟར་འདོད་པ་བཞིན་དུ་ལྷ་དང་ལྷ་མོའི་ཚོགས་རྣམས་ཀྱིས་ལེགས་པར་གང་བས་རྒོད་པ་དང་འགྱིང་བ་དང་རྩེ་འཇོ་བས་རྣམ་པ་སྣ་ཚོགས་པའི་བདེ་བ་བལྟ་བར་དགའ་བ་རྣམས་སོ། །ཇི་སྐད་དུ་བཤད་པའི་ཡུལ་ཕྱོགས་དེ་དག་རྣམས་ཐམས་ཅད་ལ་གསར་དུ་སྐྱེས་པའི་ལྷ་དེས་དང་པོ་མཐོང་བ་ཡིན་པས་ལྷ་མོ་དེ་དག་རྣམས་དང་ལྷན་ཅིག་ཏུ་རྩེ་བར་བྱེད་ཅིང་བག་མེད་པས་རྒྱུ་བར་བྱེད་དོ། །གཞན་ཡང་ཡུལ་ཕྱོགས་གཞན་དག་རྣམས་སུ་ཡང་མི་ངོམས་པའི་འདོད་པའི་སྲེད་པ་རྣམས་ཀྱིས་ཉེ་བར་འགྲོ་སྟེ། གང་ན་བདུད་རྩིའི་རང་བཞིན་གྱི་ས་ཕྱོགས་ཡོད་པ་དེར་ཟས་དོན་དུ་གཉེར་བར་བྱ་བའི་ཕྱིར་ཉེ་བར་འགྲོ་བར་བྱེད་དོ། །དེ་དེར་ཇི་ལྟར་ལེགས་པར་བྱས་པའི་ལས་དང་འདྲ་བར་ཟ་བར་བྱེད་དོ། །དེ་ཉེ་བར་ཟོས་ནས་ཀྱང་ཡུལ་གྱི་མེས་བསྲེགས་པར་གྱུར་པས་གང་ན་བཏུང་བའི་ཆུ་ཀླུང་ཡོད་པ་དེར་ལྷན་ཅིག་སྤྱོད་པའི་འཁོར་དང་བཅས་ནས་ཉེ་བར་འགྲོའོ། །དེའི་འཁོར་དེ་དག་རྣམས་ཉིད་དང་རྒྱ་ཆེན་པོའི་སྲེད་པའི་རླབས་རྣམས་ཀྱིས་ཁྱེར་བར་གྱུར་པ་ན་བདུད་རྩི་འདི་དག་རྣམས་དང་ཕྲད་པར་གྱུར་ཏེ། དེ་ནས་དེ་དག་བཏུང་བའི་ས་གཞིར་སོང་ནས་རྣམ་པ་སྣ་ཚོགས་པའི་ནོར་བུའི་སྣོད་རྣམས་སུ་མྱོས་བྱེད་དེ་དག་འཐུང་བར་བྱེད་དོ། །དེ་ཕྱིར་ཞིང་ཉིད་ཀྱང་མྱོས་བྱེད་ཀྱིས་རངས་པར་གྱུར་པ་ནི་མར་ཀུན་ཏུ་བླུགས་པར་གྱུར་པ་ཉིད་ཀྱི་མེ་འགྲན་ཟླ་མེད་པར་གྱུར་པ་བཞིན་དུ་འདིའི་ཡུལ་གྱི་སྲེད་པ་རྣམས་ཀྱང་རབ་ཏུ་འབར་བར་འགྱུར་རོ། །དེ་ཡང་ཡུལ་དེ་དག་རྣམས་ཀྱིས་ཀུན་ཏུ་རྨོངས་པར་གྱུར་ནས་ཕྱིར་ཞིང་ཉིད་ཀྱང་ལྷའི་བུ་མོ་དེ་དག་ཉིད་དང་ལྷན་ཅིག་ཏུ་གར་དང་རབ་ཏུ་དགའ་བར་ཡང་བྱེད་དོ། །དེ་དག་དེ་བཞིན་དུ་གནས་དེར་རྩེད་མོ་རྣམས་བྱས་ནས། སླར་ཡང་གང་ན་པད་མའི་རྫིང་བུ་ཡོད་པར་གྱུར་པ་དེར་ཉེ་བར་འགྲོ་བར་བྱེད་དོ། །ཆུ་ལ་རྩེ་བར་བྱ་བར་འདོད་པའི་དབང་དུ་བྱས་ནས་ཐམས་ཅད་ལ་ཡང་རིག་པར་བྱས་ཏེ། གང་ན་པད་མའི་རྫིང་བུ་དེ་ཡོད་པ་དེར་ཀུན་ཏུ་ཉེ་བར་འགྲོའོ། །གཞན་ཡང་དེ་ཡུལ་རྣམས་ཀྱིས་རྒྱགས་པར་གྱུར་ནས་དེ་དག་རྣམས་དང་ལྷན་ཅིག་ཏུ་ཆུའི་རྩེད་མོ་བྱེད་པར་འགྱུར་རོ། །ལྷའི་བུ་མོ་དེ་དག་རྣམས་ཉིད་དང་ལྷའི་བདེ་བ་མཆོག་ཏུ་དཔེ་མེད་པ་རྣམས་མངོན་སུམ་དུ་ཉེ་བར་ལོངས་སྤྱོད་པ་བྱེད་དོ། །དེ་གཞན་ཡང་དེ་ཁོ་ན་བཞིན་དུ་རྒྱགས་པས་རྒྱགས་པར་གྱུར་ནས་རྣ་བ་ཚིམ་པར་བྱ་འདོད་པས་འགྲན་གྱི་དོ་མེད་པའི་ཡུལ་གྱིས་ཀུན་ཏུ་ཁྲིད་པའི་ཕྱིར་རྔ་སྐད་ཡན་ལག་ལྔ་པ་ཉན་པར་འདོད་དོ། །དེ་ནས་གཞན་ཡང་དེ་དག་རྣམས་ཉིད་ཀྱི་དཀྱིལ་དུ་སོང་ནས་ལྷ་དེ་གཅིག་པུ་གླུ་ལེན་ནོ།