བློ་ཤིན་ཏུ་ལོང་བར་གྱུར་པའི་ཕྱིར་ཐོས་པ་མ་ཡིན། མཐོང་བ་མ་ཡིན། གཞན་དག་རྣམས་ཀྱི་དྲུང་ན་ཉན་པ་ཡང་མ་ཡིན་ནོ། །དེ་ལ་འདི་སྙན་དངགས་སྡེབ་པར་བྱེད་པར་འདོད་པས་ཀྱང་ངེས་པར་འཆིང་བར་འགྱུར་རོ། །རབ་ཏུ་གནས་པར་བྱེད་དོ། །གཞན་དག་རྣམས་ཀྱང་རྣམ་པ་སྣ་ཚོགས་པའི་ཚིག་གི་རྐང་པ་རྗོད་པ་རྣམས་ཀྱིས་ཉེ་བར་འབྲེལ་བར་བྱེད་དོ། །ཇི་ལྟར་སྐྱེ་བར་འགྱུར་བ་དེ་བཞིན་དུ་དེ་ཉིད་ཀྱིས་དོན་དེ་དག་རྣམས་དངོས་སུ་མཐོང་བར་གྱུར་ནས་དེ་དག་གིས་སྐྱེས་བུ་ངན་པ་དེ་དེ་བཞིན་དུ་འཇོམས་པར་འགྱུར་རོ། །རང་གི་སེམས་ཀྱིས་ཀུན་ནས་སློང་བས་ཡོངས་སུ་བསྡེབས་པའི་རྫུན་དེ་དག་རྣམས་ཀྱི་སྐྱོན་དེས་ལུས་ཞིག་ནས་ཤི་བའི་འོག་ཏུ་ཐབས་མིན་པའི་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །སྙན་དངགས་སྡེབ་པར་བྱེད་པའི་སྐྱོན་གྱིས་གཞན་ཡང་སྐྱོན་ཆེན་པོར་འགྱུར་རོ། །ཐོས་པ་ངན་པ་སྙན་དངགས་སྡེབ་པར་བྱེད་པ་རྣམས་ཀྱི་ནི་འདི་ལྟ་སྟེ། ཐོས་པ་ངན་པ་སྙན་དངགས་སྡེབ་པ་ལ་མངོན་པར་དགའ་བར་གྱུར་པས་སྙན་དངགས་གཞན་དག་རྣམས་རྙེད་པ་ཡང་ཉན་པར་བྱེད་དོ། །དེས་དེ་དག་རྣམས་ཐོས་ནས་ཀྱང་རང་གི་རྣམས་སྒྲུབ་པའི་དོན་དུ་རབ་ཏུ་ཞེ་སྡང་བར་བྱེད་པ་དང་། སྔོན་གྱི་སྙན་དངགས་པ་རྣམས་ལ་འཕྱ་བར་བྱེད་དོ། །མཛེས་པར་གྱུར་པའི་སྙན་དངགས་ལ་རབ་ཏུ་ཞེ་སྡང་བར་བྱེད་པའི་དགེ་སྦྱོང་ངན་པ་དེ་ནི་དེ་ལྟར་བསམ་གཏན་སྒོམ་པས་སྟོང་པར་གྱུར་ནས་གནོད་སེམས་མངོན་པར་འཕེལ་བར་འགྱུར་རོ། །དྲི་མ་ཅན་གྱི་ལས་རྣམས་ནི་ཀུན་ནས་རབ་ཏུ་བསགས་པར་འགྱུར་ལ། འདིའི་དཀར་པོའི་ཆོས་རྣམས་ནི་ཟད་པར་འགྱུར་བས་འཇིག་རྟེན་ཕ་རོལ་ཏུ་བདེ་བར་བྱེད་པའི་གྲོགས་ཚངས་པ་མཚུངས་པར་སྤྱོད་པ་རྣམས་དེ་ལྟར་གཤེ་བར་བྱེད་དོ། །ཐོས་པ་ངན་པ་སྙན་དངགས་སྡེབ་པར་བྱེད་པ་རྟག་ཏུ་བག་མེད་པ་ལ་སེམས་པ་རྣམས་ལ་ནི་གཞན་ཡང་སྐྱོན་ཆེན་པོ་ཡོད་དེ། ཐོས་པ་ངན་པ་སྙན་དངགས་རྣམས་སྡེབ་པ་ལ་ཆེད་ཆེར་བྱེད་པ་རྣམས་ནི་ཉིན་མེད་མཚན་མེད་དུ་དེ་ལ་བློ་བཟོད་བླགས་མེད་པར་གྱུར་ནས་སྙན་དངགས་སྡེབ་པ་ལ་ཤིན་ཏུ་ཆེད་ཆེ་བར་འགྱུར་རོ། །དེ་དམ་པའི་ཆོས་སེམས་པར་བྱེད་པ་ཉིད་མ་ཡིན་ནོ། །སྒོམ་པར་མི་བྱེད་དོ། །ཉོན་མོངས་པ་རབ་ཏུ་ཞི་བར་བྱ་བའི་ཆེད་དུ་མི་འཇུག་གོ། །དེ་ཉན་པ་ལ་བློ་ཞུགས་པར་གྱུར་ན་ཡང་དམ་པའི་ཆོས་འབྱུང་བར་དོན་མེད་དེ་ཕྱིར་ལོག་ནས་འགྲོའོ།