ཚོང་དུས་དག་ཏུ་སོང་ནས་རྙེད་པ་དང་བཀུར་སྟིའི་རྒྱུས་བདག་གི་ཚུལ་ཁྲིམས་དང་ཡོན་ཏན་སྙིང་པོར་བྱས་ཏེ་བརྗོད་པར་ནི་མི་བྱེད་དོ། །བློ་རྣམ་པ་སྣ་ཚོགས་པར་གཡེང་བར་བྱེད་པ་ཡང་མ་ཡིན་ནོ། །བརྐམ་ཞིང་ཆགས་པ་ཡང་མ་ཡིན་ནོ། །གྲོང་དང་ཐག་ཉེ་བར་གནས་པར་བྱེད་པས་དགའ་བར་འགྱུར་བ་མ་ཡིན་ནོ། །སྔོན་གྱི་གཉེན་བཤེས་དང་མཛའ་བོ་རྣམས་དང་འཚོག་ཅིང་བལྟ་བའི་དོན་དང་། དེའི་ཁྱིམ་དུ་འཇུག་པ་བློ་ལ་མང་དུ་རྒྱུ་བར་མི་འགྱུར་རོ། །ཡོད་པ་མ་ཡིན་པའི་ཡོན་ཏན་རྣམས་རྗོད་པར་མི་བྱེད་ལ་ཡོད་པའི་ཡོན་ཏན་རྣམས་ཡང་རྗོད་པར་མི་བྱེད་དོ། །ཡོད་པའི་ཡོན་ཏན་རྣམས་སྤོང་བར་ཡང་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་ཡོན་ཏན་དང་སྐྱོན་རྣམས་སྟོན་པར་གྱུར་ནས་རྒྱབ་ཀྱི་ཤ་སྦྱིན་པར་བྱེད་པ་ཡང་མ་ཡིན་ནོ། །མཐོང་བ་དུག་ཅན་བཞིན་དུ་རྣམ་པ་དུ་མར་ཡང་བུད་མེད་ཀྱི་འགྲོ་བ་རྣམས་ཡོངས་སུ་སྤོང་བར་བྱེད་དོ། །དེ་དང་ལྷན་ཅིག་ཏུ་སྨྲ་གླེང་བྱེད་པས་གནས་པའི་རང་བཞིན་ཅན་ཡང་མ་ཡིན་ནོ། །ལྗོན་ཤིང་དང་། ནགས་དང་། མེ་ཏོག་ཀུན་ཏུ་རྒྱས་པ་རྣམས་སུ་རྒྱུ་བའི་རང་བཞིན་ཅན་མ་ཡིན་ནོ། །བདག་དགའ་བར་འགྱུར་བའི་ཡིད་དོན་དུ་གཉེར་བས་ཉེ་བར་བགྲོད་པ་མ་ཡིན་ནོ། །དགའ་བར་འགྱུར་བའི་བྱའི་སྒྲ་ཀུན་ཏུ་སྒྲོགས་པ་རྣམས་ལ་ཉན་པའི་འདོད་ཆགས་ཀྱི་སྐྱོན་གྱི་འཇིགས་པས་གང་གི་ཕྱིར་དེའི་སྙིང་གིས་སེམས་པ་དང་རྣ་བ་དང་ཡིད་གཏོད་པར་བྱེད་པ་མ་ཡིན། སྒྲ་དེ་དག་རྣམས་གང་ཡིན་པའི་སྐྱོན་གྱིས་འཇིགས་པས་བྱ་རྣམས་ཀྱི་སྒྲ་དང་གཞན་གྱི་སྒྲ་རྣམས་ཀྱང་ཉན་པར་མི་བྱེད། ཆུ་ཀླུང་གི་སྒྲས་གང་བའི་ཡུལ་ཕྱོགས་སུ་སྒོམ་པར་མི་བྱེད། སྒྲའི་སྐྱོན་གྱིས་ཡིད་འཕྲོགས་པར་མི་འགྱུར་རོ། །དྲི་དང་ལྡན་པའི་མེ་ཏོག་མང་བ་དང་། འཁྲི་ཤིང་རྣམས་དང་། ལྗོན་ཤིང་རྣམས་ཤིན་ཏུ་ཕལ་ཆེ་བ་དང་། ཉེ་བར་བསམ་གཏན་བྱེད་པ་དང་། ཉེ་བར་འགྲོ་བ་དང་། ཉེ་བར་འགྲོ་བ་ཡང་མ་ཡིན་ཏེ། ཡིད་དུ་འོང་ཞིང་ཡིད་དུ་འོང་བར་གྱུར་པའི་དྲི་རྣམས་ལ་ཡང་སྣ་ཕྱོགས་པར་འགྱུར་བའི་སྐྱོན་གྱིས་ཡིད་ཁྱེར་བའི་ཕྱིར་རོ། །སྒྲོ་རྣམས་རྣམ་པར་བཀྲ་བར་གྱུར་པས་དགའ་བའི་ཁ་དོག་སྣ་ཚོགས་པའི་བྱ་རྣམས་འདོད་ཆགས་ལ་ཆེད་ཆེར་བྱེད་པར་གྱུར་པའི་ངང་ངུར་དང་། ཤང་ཤང་ཏེའུ་དང་། རྨ་བྱ་རྣམས་ཀྱང་ལྟ་བར་བྱེད་པས་རྣམ་པར་རྒྱུ་བ་མ་ཡིན་ནོ། །