།དེ་བཞིན་དུ་ལྷ་རྣམས་ལས་གཅིག་གི་གཟུགས་བརྙན་ཡང་བརྒྱ་སྟོང་དུ་མ་རྣམས་སུ་རིན་པོ་ཆེའི་རང་བཞིན་གྱི་ས་གཞི་དེ་དག་རྣམས་ལ་ཤིན་ཏུ་ཡོངས་སུ་གསལ་བར་མཐོང་ངོ་། །དེ་ལ་ལྷ་གང་དག་ལེགས་པར་བྱས་པའི་ལས་རྣམས་ཟད་པར་གྱུར་པ་རྣམས་ཀྱི་ནི་དེའི་གཟུགས་བརྙན་གཅིག་ཁོ་ན་རིན་པོ་ཆེའི་ས་གཞི་གཅིག་ཁོ་ན་ལ་མཐོང་གི་གཞན་དུ་ནི་མ་ཡིན་ནོ། །ལྷ་གང་དག་ཡིད་ཆེས་རབ་ཏུ་གསལ་བར་གྱུར་པ་རྣམས་ཀྱིས་རྣམ་པ་དེ་ལྟ་བུའི་རྒུད་པ་རྣམས་ཇི་ལྟ་བ་བཞིན་དུ་མངོན་པར་མཐོང་ནས་ལེགས་པར་བྱས་པའི་ལས་རྣམས་ཡོངས་སུ་ཟད་པ་ནི་ལྷ་འདི་དག་ལ་ངེས་པར་འབྱུང་ངོ་། །འདི་དག་གི་རྒུད་པ་རྣམས་ནི་འོངས་པར་གྱུར་ཏོ། །ཞེས་རྗོད་པར་བྱེད་དོ། །དེ་ལ་འདི་དག་ནི་འཕྲུལ་དགའ་བའི་ལྷ་རྣམས་ཀྱི་རྒུད་པ་བཞི་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་དེས་ཚིགས་སུ་བཅད་པ་གསུངས་པ། ཇི་ལྟར། འཇིག་རྟེན་ཕུན་སུམ་ཚོགས་རྒྱུ་བ། །རྒུད་པ་རྟོགས་པ་མ་ཡིན་ནོ། །ཇི་ལྟར་ཉིན་མོ་མཐར་ནི་འཛད། །ཕུན་ཚོགས་མཐའ་ནི་རྒུད་པ་ཡིན། །ཇི་ལྟ་ཇི་ལྟར་ཕུན་ཚོགས་པ། །དེ་ལྟར་རྒུད་པའང་སྡིག་པ་ཅན། །འདོད་པའི་ལས་ནི་ངོམས་པ་མེད། །ངོམས་པ་མེད་པས་ཡོངས་སུ་སྲེག །གང་ཞིག་རྟག་ཏུ་ཕུན་ཚོགས་འདོད། །བདེ་བ་རྟག་པར་འདོད་བྱེད་པ། །དེ་ནི་སྲེད་པས་བཅོམ་ནས་ཀྱང་། །གང་ཕྱིར་དེ་ལ་བདེ་བླག་འབབ། །འདོད་པ་སྤྱད་པས་ཚིམ་མེད་པའི། །ལྷ་གང་དམྱལ་བར་ལྟུང་བ་ནི། །ཐམས་ཅད་མེ་ཡིས་བསྐོར་ཡིན་པར། །དེ་ནི་དེ་བཞིན་གཤེགས་པས་གསུངས། །མི་གང་དམྱལ་བར་རབ་ཏུ་འགྲོ། །དེ་བཞིན་བརྒྱ་ཕྲག་དུ་ཡང་སྟེ། །དེ་ནི་རྣམ་ཡངས་སྡིག་ཅན་གྱི། །བྱ་བར་མཁས་པས་ཤེས་པར་གྱིས། །དེ་ལྟར་འཕྲུལ་དགའ་བའི་ལྷ་རྣམས་ཀྱི་རྒུད་པ་བཞི་པ་ཡིན་ནོ། །གཞན་ཡང་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་རྒུད་པ་ཡང་བཞི་ཁོ་ན་ཡོད་དེ། ཇི་ལྟར་གང་གི་ཚེ་ལྷ་རྣམས་ཀྱི་ལེགས་པར་བྱས་པ་ཟད་པར་གྱུར་པ་ན་དེ་དེ་ལ་གོམས་པར་གྱུར་པས་འཆི་འཕོ་བའི་དུས་དེའི་ཚེ་ན་ཡང་དེ་རྣམས་ལ་ཕྲེང་བ་རྣམས་ཀྱིས་ཁྱབ་པ་རབ་ཏུ་འབྱུང་བར་འགྱུར་རོ། །འདི་ལྟ་སྟེ། རྣམ་པ་སྣ་ཚོགས་པའི་མེ་ཏོག་གི་ཕྲེང་བ་དང་ལྡན་པར་འགྱུར་ཏེ། ལྷ་རྣམས་ལྷ་རྫས་ཀྱི་མ་རྙིངས་པའི་མེ་ཏོག་རྣམས་ཀྱིས་ཉེ་བར་བརྒྱན་པར་གྱུར་ཏོ།