།དེ་ལ་འབྲས་བུ་ལྔ་གང་ཞེ་ན། འདི་ལྟ་སྟེ། སློབ་པའི་འབྲས་བུ་ཐོབ་པ་དང་། མི་སློབ་པའི་འབྲས་བུ་ཐོབ་པ་དང་། རང་སངས་རྒྱས་ཀྱི་འབྲས་བུ་ཐོབ་པ་དང་། ཕྱིར་མི་ལྡོག་པའི་བྱང་ཆུབ་སེམས་དཔའི་སའི་འབྲས་བུ་ཐོབ་པ་དང་། ཐམས་ཅད་མཁྱེན་པའི་ཡེ་ཤེས་ཀྱི་འབྲས་བུ་ཐོབ་པ་སྟེ། འབྲས་བུ་ལྔ་པོ་དེ་དག་གོ། །ཀླུའི་བདག་པོ་ཐམས་ཅད་མཁྱེན་པའི་སེམས་ཀྱི་ཤིང་ལྗོན་པ་དེའི་སྣང་བ་ནི་དེ་ལྟ་བུའོ། །ས་བོན་ནི་དེ་ལྟ་བུའོ། །རྩ་བ་ནི་དེ་ལྟ་བུའོ། །སྡོང་པོ་ནི་དེ་ལྟ་བུའོ། །ཡལ་ག་ནི་དེ་ལྟ་བུའོ། །ལོ་མ་ནི་དེ་ལྟ་བུའོ། །མེ་ཏོག་ནི་དེ་ལྟ་བུའོ། །འབྲས་བུ་ནི་དེ་ལྟ་བུའོ། །ཀླུའི་བདག་པོ་དེ་ལྟ་བས་ན་བྱང་ཆུབ་སེམས་དཔའ་ཐམས་ཅད་མཁྱེན་པའི་ཤིང་ལྗོན་པ་འདི་ལྟ་བུ་ཡོངས་སུ་འཛིན་པར་འདོད་པས་ཐམས་ཅད་མཁྱེན་པའི་སེམས་མི་བརྗེད་པར་བྱ་སྟེ། ཀླུའི་བདག་པོ་གང་གིས་ཐམས་ཅད་མཁྱེན་པའི་སེམས་ཤིན་ཏུ་བཟུང་བ་དེས་གང་དག་ཡོངས་སུ་ཟིན་པར་མ་གྱུར་པའི་ཡོན་ཏན་ཕུན་སུམ་ཚོགས་པ་དེ་དག་ངས་མ་མཐོང་ངོ་། །ཀླུའི་བདག་པོ་འདི་ལྟ་སྟེ། དཔེར་ན་གང་གིས་ཤིང་གང་གིས་ས་བོན་བཟུང་བར་གྱུར་པ་དེས་དེའི་རྩ་བ་དང་། སྡོང་པོ་དང་། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་རྣམས་ཀྱང་བཟུང་བ་ཡིན་ནོ། །ཀླུའི་བདག་པོ་དེ་བཞིན་དུ་གང་གིས་ཐམས་ཅད་མཁྱེན་པའི་སེམས་ཤིན་ཏུ་བཟུང་བ་དེས་བྱང་ཆུབ་ཀྱི་ཕྱོགས་ཀྱི་ཆོས་རྣམས་བཟུང་བ་ཡིན་ནོ། །ཀླུའི་བདག་པོ་དེ་ལྟ་བས་ན་ཐམས་ཅད་མཁྱེན་པའི་ཡེ་ཤེས་ཀྱི་འབྱུང་གནས་བྱང་ཆུབ་སེམས་དཔའི་ཡོན་ཏན་ལ་འཇུག་པའི་ཆོས་ཀྱི་སྒོའི་ལེའུ་འདི་ཟུང་ཤིག །ཆོངས་ཤིག །ལྷོགས་ཤིག །འཁོར་ལ་ཡང་རྒྱ་ཆེར་ཡང་དག་པར་རབ་ཏུ་ཤོད་ཅིག །ཁྱོད་ཀྱིས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་ཐམས་ཅད་མཁྱེན་པའི་ཡེ་ཤེས་ཀྱི་འབྱུང་གནས་ཀྱི་ལེའུ་འདི་བཤད་པ་ན་འཁོར་དེ་ལས་ཀླུ་བདུན་ཁྲི་ཉིས་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དགེ་བའི་རྩ་བ་བསྐྲུན་པའི་ཀླུ་གཞོན་ནུ་རྣམས་དང་། ཀླུའི་བུ་མོ་རྣམས་དང་། ཀླུའི་རྒྱལ་པོ་རྣམས་ནི་རྗེས་སུ་འཐུན་པའི་བཟོད་པ་རབ་ཏུ་ཐོབ་པར་གྱུར་ཏོ།