Degé Kangyur volume 47, F.33.b

བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །​ཁྱིམ་བདག་ཇི་ལྟར་ན་དེ་བཞིན་གཤེགས་པས་ལུས་ཀྱི་ཁམས་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། ཟིན་པའི་འབྱུང་བ་ཆེན་པོའི་རྒྱུར་བྱས་པ་དང་བ་གང་ཡིན་པ་ནི། ལུས་ཀྱི་རྣམ་པར་སྨིན་པ་སྟེ། ལུས་གང་གི་རེག་བྱ་སྣང་བར་འགྱུར་ཞིང་། རེག་བྱ་ཡང་ཐོགས་པ་དང་། ལུས་གང་རེག་བྱ་ལ་ཐོགས་པ་དང་། ལུས་གང་ལ་རེག་བྱ་ཡང་ཐོགས་པ་དང་། ལུས་གང་གིས་རེག་བྱ་ལ་རེག་པར་གྱུར་པ་དང་། རེག་པ་དང་རེག་པར་འགྱུར་བ་དང་། རེག་བྱ་ལ་རེག་པར་བྱ་བའི་ཕྱིར་རྟག་ཏུ་ཐ་མི་དད་ཅིང་རུང་བའི་ལུས་གང་ཡིན་པ་དང་། ཁམས་བཅྭ་བརྒྱད་དག་ལས་ལུས་ཀྱི་ཁམས་གང་ཡིན་པ་དང་། སྐྱེ་མཆེད་བཅུ་གཉིས་དག་ལས་ལུས་ཀྱི་སྐྱེ་མཆེད་གང་ཡིན་པ་དང་། དབང་པོ་ཉི་ཤུ་རྩ་གཉིས་དག་ལས་ལུས་ཀྱི་དབང་པོ་གང་ཡིན་པ་སྟེ། དེ་ནི་ལུས་ཀྱང་ཡིན། དེ་ནི་ལུས་ཀྱི་ཁམས་ཀྱང་ཡིན། དེ་ནི་ལུས་ཀྱི་སྐྱེ་མཆེད་ཀྱང་ཡིན། དེ་ནི་ལུས་ཀྱི་དབང་པོ་ཡང་ཡིན། དེ་ནི་སྒོ་ཡང་ཡིན། དེ་ནི་དཀར་བ་ཡང་ཡིན། དེ་ནི་རྒྱུན་ཀྱང་ཡིན། དེ་ནི་མཚོ་ཡང་ཡིན། དེ་ནི་རྒྱ་མཚོ་ཡང་ཡིན། དེ་ནི་ཀློང་ཡང་ཡིན། །​དེ་ནི་སྣང་བ་ཡང་ཡིན། དེ་ནི་ཆུ་འབྱུང་ཡང་ཡིན། དེ་ནི་ཁྲིད་བྱེད་ཀྱང་ཡིན། དེ་ནི་འདྲེན་བྱེད་ཀྱང་ཡིན། དེ་ནི་ཞིང་ཡང་ཡིན། དེ་ནི་གཞི་ཡང་ཡིན། དེ་ནི་དངོས་པོ་ཡང་ཡིན། དེ་ནི་སྦུབས་ཀྱང་ཡིན། དེ་ནི་གསང་བ་ཡང་ཡིན། དེ་ནི་ཕ་རོལ་གྱི་འགྲམ་མ་ཡིན་པ་ཡང་ཡིན། དེ་ནི་བདུད་ཀྱི་སྣོད་ཀྱང་ཡིན། དེ་ནི་བདག་གི་དངོས་པོར་འཇུག་པ་ཡང་ཡིན། དེ་ནི་གྲོང་སྟོང་པར་འཇུག་པ་ཡང་ཡིན། དེ་ནི་མངོན་པར་ཤེས་པར་བྱ་བ་ཡང་ཡིན། དེ་ནི་ཡོངས་སུ་ཤེས་པར་བྱ་བ་ཡང་ཡིན། དེ་ནི་སྤང་བར་བྱ་བ་ཡང་ཡིན་ཏེ། དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་རྟོགས་པ་དང་། ཡང་དག་པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་ལུས་ཀྱི་ཁམས་ཤེས་པའོ། །​དེ་བཞིན་གཤེགས་པ་ལུས་ཀྱི་ཁམས་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་



The English translation of this folio by 84000 Translating the words of the Buddha can be found at:
https://read.84000.co/translation/toh99.html?part=UT22084-047-001-2616#UT22084-047-001-2616