།ཁྱིམ་བདག་ཇི་ལྟར་ན་དེ་བཞིན་གཤེགས་པས་གནས་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། ལུས་ཀྱིས་ཉེས་པར་སྤྱད་པའི་རྣམ་པར་སྨིན་པ་མི་འདོད་པ། མི་སྡུག་པ་ཡིད་དུ་མི་འོང་བ་འགྲུབ་པ་གང་ཡིན་པ་དེ་ནི་གནས་ཡིན་ཞིང་སྐབས་ཡིན་ནོ། །ངག་གིས་ཉེས་པར་སྤྱད་པ་དང་། ཡིད་ཀྱིས་ཉེས་པར་སྤྱད་པའི་རྣམ་པར་སྨིན་པ་མི་འདོད་པ། མི་སྡུག་པ་ཡིད་དུ་མི་འོང་བ་འགྲུབ་པ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །ལུས་ཀྱིས་ཉེས་པར་སྤྱད་པས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་བ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །ངག་གིས་ཉེས་པར་སྤྱད་པ་དང་། ཡིད་ཀྱིས་ཉེས་པར་སྤྱད་པའི་རྣམ་པར་སྨིན་པས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་བ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །ལུས་ཀྱིས་ལེགས་པར་སྤྱད་པའི་རྣམ་པར་སྨིན་པ་འདོད་པ། སྡུག་པ་ཡིད་དུ་འོང་བ་འགྲུབ་པ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །ངག་གིས་ལེགས་པར་སྤྱད་པ་དང་། ཡིད་ཀྱིས་ལེགས་པར་སྤྱད་པའི་རྣམ་པར་སྨིན་པ་འདོད་པ། སྡུག་པ་ཡིད་དུ་འོང་བ་མངོན་པར་འགྲུབ་པ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །ལུས་ཀྱིས་ལེགས་པར་སྤྱད་པའི་རྣམ་པར་སྨིན་པས། ལུས་ཞིག་ནས་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར་བ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །ངག་གིས་ལེགས་པར་སྤྱད་པ་དང་། ཡིད་ཀྱིས་ལེགས་པར་སྤྱད་པའི་རྣམ་པར་སྨིན་པས་ལུས་ཞིག་ནས་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར་བ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །འདི་ན་སོ་སོའི་སྐྱེ་བོ་ལ་ལས་བསམས་བཞིན་དུ་མ་སྲོག་དང་ཕྲལ་བ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །འདི་ན་སོ་སོའི་སྐྱེ་བོ་ལ་ལས་བསམས་བཞིན་དུ་ཕ་སྲོག་དང་ཕྲལ་བ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །འདི་ན་སོ་སོའི་སྐྱེ་བོ་ལ་ལས་བསམས་བཞིན་དུ་དེ་བཞིན་གཤེགས་པའི་ཉན་ཐོས་དགྲ་བཅོམ་པ་སྲོག་དང་ཕྲལ་བ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །འདི་ན་སོ་སོའི་སྐྱེ་བོ་ལ་ལས་ཉན་ཐོས་ཀྱི་དགེ་འདུན་འཐུན་པ་ཕྱེ་བ་གང་ཡིན་པ་ཡང་གནས་ཡིན་ཞིང་སྐབས་ཡིན་ནོ། །