།ཁྱིམ་བདག་ཇི་ལྟར་ན་དེ་བཞིན་གཤེགས་པས་རོའི་ཁམས་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ལྕེའི་ཁམས་ཀྱི་སྤྱོད་ཡུལ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། འདི་ལྟ་སྟེ། རོ་ཞིམ་པ་ཉིད་དང་། རོ་མི་ཞིམ་པ་ཉིད་དང་། རོ་འདོད་པ་ཉིད་དང་། རོ་མི་འདོད་པ་ཉིད་དང་། རོ་ཡི་གར་འོང་བ་ཉིད་དང་། རོ་ཡི་གར་མི་འོང་བ་ཉིད་དང་། རོ་ཡིད་དུ་འོང་བ་ཉིད་དང་། རོ་ཡིད་དུ་མི་འོང་བ་ཉིད་དང་། རོའི་ངོ་བོ་དགའ་བ་ཉིད་དང་། རོའི་ངོ་བོ་མི་དགའ་བ་ཉིད་དང་། རོའི་ངོ་བོ་ལེགས་པ་ཉིད་དང་། རོའི་ངོ་བོ་མ་ལེགས་པ་ཉིད་དང་། ཁ་བ་འཛིན་པ་དང་། ཚ་བ་འཛིན་པ་དང་། སྐྱུར་བ་འཛིན་པ་དང་། མངར་བ་འཛིན་པ་དང་། རོ་བ་ཚྭ་ཅན་ཉིད་ནས་རོ་བསྐ་བ་ཉིད་དང་། ལན་ཚྭའི་རོ་དང་། རོ་གང་དག་སྣོད་ན་ཡོད་པ་དང་། རྩ་བ་ལ་ཡོད་པ་དང་། སྙིང་པོ་ལ་ཡོད་པ་དང་། སྙིང་པོ་མེད་པ་ལ་ཡོད་པ་དང་། ཤུན་པ་ལ་ཡོད་པ་དང་། དར་བ་ལ་ཡོད་པ་དང་། ལོ་མ་ལ་ཡོད་པ་དང་། མེ་ཏོག་ལ་ཡོད་པ་དང་། འབྲས་བུ་ལ་ཡོད་པའི་བར་གྱི་རོ་གང་དག་ཡོད་པ་འདི་ནི་རོའི་ཁམས་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་རོའི་ཁམས་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་ཞིང་། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་རོའི་ཁམས་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་ལ་དགེ་བའི་རྩ་བ་བསྐྱེད་ནས། རོའི་ཁམས་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པ་དེ། དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁྱིམ་བདག་གཞན་ཡང་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། རྒྱུ་གང་དང་རྐྱེན་གང་དག་གིས་རོའི་ཁམས་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པའི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གལ་ཏེ་མི་རྟག་པར་རྗེས་སུ་ལྟ་བར་གནས་པ་ནས། དེ་བཞིན་དུ་སྦྱར་ཏེ་ཕྱིར་རྒོལ་བར་རྗེས་སུ་ལྟ་བར་གནས་པའི་བར་དེ།