Degé Kangyur volume 47, F.23.b

པར་ལན་གསུང་བ་ནས། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །​ཁྱིམ་བདག་ཇི་ལྟར་ན་དེ་བཞིན་གཤེགས་པས་མིག་གི་རྣམ་པར་ཤེས་པའི་ཁམས་ཤེས་པ་འགོག་པར་འགྱུར་བའི་ལམ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། ཤེས་པ་གང་གིས་མིག་གི་རྣམ་པར་ཤེས་པ་ཡོངས་སུ་ཤེས། ཁོང་དུ་ཆུད་མངོན་སུམ་དུ་བྱས་པའི་འགོག་པ་ཤེས་པ་དེ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གལ་ཏེ་རོ་མྱང་བ་མེད་པར་རྗེས་སུ་ལྟ་བའམ། གལ་ཏེ་ཉེས་དམིགས་སུ་རྗེས་སུ་ལྟ་བར་གནས་པའམ། གལ་ཏེ་ངེས་པར་འབྱུང་བར་རྗེས་སུ་ལྟ་བར་གནས་པ་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །​དེ་བཞིན་གཤེགས་པས་མིག་གི་རྣམ་པར་ཤེས་པའི་ཁམས་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །​ཁྱིམ་བདག་ཇི་ལྟར་ན་དེ་བཞིན་གཤེགས་པས་རྣ་བའི་ཁམས་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། ཟིན་པའི་འབྱུང་བ་ཆེན་པོའི་རྒྱུར་བྱས་པ་གང་ཡིན་པ་དང་། དང་བ་གང་ཡིན་པ་ནི་རྣ་བའི་རྣམ་པར་སྨིན་པ་སྟེ། གང་གི་རྣ་བ་ལ་སྒྲར་སྣང་བར་འགྱུར་ཞིང་། རྣ་བ་གང་སྒྲ་ལ་ཐོགས་པ་དང་། རྣ་བ་གང་ལ་སྒྲ་ཐོགས་པ་དང་། རྣ་བ་གང་གིས་སྒྲ་ཐོས་པར་གྱུར་པ་དང་། ཐོས་པ་དང་། ཐོས་པར་འགྱུར་བ་དང་། སྒྲ་དག་ཐོས་པར་བྱ་བའི་ཕྱིར་ཡང་རྟག་ཏུ་ཐ་མི་དད་ཅིང་རུང་བའི་རྣ་བ་གང་ཡིན་པ་དང་། ཁམས་བཅྭ་བརྒྱད་དག་ལས་རྣ་བའི་ཁམས་གང་ཡིན་པ་དང་། སྐྱེ་མཆེད་བཅུ་གཉིས་དག་ལས་རྣ་བའི་སྐྱེ་མཆེད་གང་ཡིན་པ་དང་། དབང་པོ་ཉི་ཤུ་རྩ་གཉིས་དག་ལས་རྣ་བའི་དབང་པོ་གང་ཡིན་པ་སྟེ། དེ་ནི་རྣ་བ་ཡང་ཡིན། དེ་ནི་ཁམས་ཀྱང་ཡིན། དེ་ནི་རྣ་བའི་སྐྱེ་མཆེད་ཀྱང་ཡིན། དེ་ནི་རྣ་བའི་དབང་པོ་ཡང་ཡིན། དེ་ནི་སྒོ་ཡང་ཡིན། དེ་ནི་དཀར་བ་ཡང་ཡིན། དེ་ནི་རྒྱུན་ཀྱང་ཡིན། དེ་ནི་མཚོ་ཡང་ཡིན། དེ་ནི་རྒྱ་མཚོ་ཡང་ཡིན། དེ་ནི་ཀློང་ཡང་ཡིན། དེ་ནི་སྣང་བ་ཡང་ཡིན། དེ་ནི་ཆུ་འབྱུང་ཡང་



The English translation of this folio by 84000 Translating the words of the Buddha can be found at:
https://read.84000.co/translation/toh99.html?part=UT22084-047-001-2596#UT22084-047-001-2596