དེ་ནས་ཀླུའི་རྒྱལ་པོ་ཚིབ་པའི་བུས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། ལྷ་དང་བཅས་པའི་འཇིག་རྟེན་དོན་སླད་དུ། །འཇིག་རྟེན་དོན་མཛད་རྣམ་འདྲེན་ལ་ཞུ་བ། །སྤྱད་པ་སྤྱོད་ཚེ་སུག་ལས་ཅི་བགྱིས་པས། །མ་རྟོགས་རྟོགས་ནས་རྒྱལ་བ་རྣམ་འདྲེན་འགྱུར། །ཚིབ་པའི་བུ་དེས་རྒྱལ་ལ་མངོན་ཞུས་ནས། །ཉོན་མོངས་ཐམས་ཅད་བསལ་བས་ལུང་བསྟན་པ། །དགེ་བའི་ལས་ཀྱིས་འབྲས་བུ་ཡིད་འོང་ཞིང་། །ཉོན་མོངས་བཅོམ་པས་དེས་ན་རྒྱལ་ཞེས་བྱ། །དེ་ནི་འགྲོ་ཀུན་ཚེ་དང་སངས་རྒྱས་ལ། །མཆོག་ཏུ་དང་བ་དག་གིས་སེམས་ཀྱང་ཤེས། །དེ་ཡིས་ལས་ཀྱི་ལམ་དེ་བྱས་པས་ན། །འགྲོ་བའི་རྟག་པ་རྒྱལ་བ་དག་ཏུ་འགྱུར། །དེ་ཡིས་རྒྱལ་བའི་བཤད་པ་ཐོས་ནས་སུ། །འགྲོ་བ་ཐམས་ཅད་ལ་ནི་དད་པར་བྱས། །དེ་ཚེ་དེ་ཡིས་དགེ་བ་བྱས་པས་ན། །འདི་ཡི་སྨོན་ལམ་བཏབ་ལྟར་བདག་འགྱུར་རོ། །དེ་ནས་འཇིག་རྟེན་མགོན་པོས་དེ་ལུང་བསྟན། །མི་མཆོག་སངས་རྒྱས་སུ་ནི་འགྱུར་བ་སྟེ། །སྲོག་ཆགས་བྱེ་བ་སྟོང་ཕྲག་ཐར་བྱེད་ཅིང་། །སྤྱད་པ་སྤྱོད་ཚེ་རྒྱལ་བ་མངོན་པར་བསྟོད། །སྟོན་པའི་གསུང་གིས་ཀླུ་དེ་དགའ་གྱུར་ནས། །སངས་རྒྱས་ལ་ནི་དད་བསྐྱེད་མངོན་བསྟོད་པ། །འགྲོ་བ་ཐར་མཛད་སངས་རྒྱས་ཕྱག་འཚལ་ལོ། །བསམ་ཡས་བདེ་གཤེགས་ཁྱོད་ལ་ཕྱག་འཚལ་ལོ། །དེ་ནས་ཀླུའི་རྒྱལ་པོ་ནག་པོས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། དྲང་སྲོང་ཆེན་པོ་སྐྱབས་མཆོག་དཔག་ཏུ་མེད། །སྐྱོན་དང་བྲལ་ཞིང་ཡོན་ཏན་མཆོག་བརྙེས་པ། །སྟོབས་བཅུའི་འཇིགས་པས་རྣམ་གནོན་ཁྱོད་ལ་ནི། །བྱང་ཆུབ་ཞི་སྤྱོད་མཁས་པ་རབ་གནས་ཞུ། །དེས་པའི་ཉོན་མོངས་ཇི་ལྟར་བསལ་བ་དང་། །རྒྱལ་བའི་མཆོག་ཉིད་ཇི་ལྟར་བསྒོམ་པར་བགྱི། །བདུད་ཀྱི་སྤྱོད་ཡུལ་དེ་དག་ཇི་ལྟར་སྤང་། །སངས་རྒྱས་སྤྱོད་ཡུལ་དག་ལ་ཇི་ལྟར་སྤྱད། །རྒྱལ་བ་ལ་ནི་ཀླུ་དེས་ཞུས་པ་དང་། །ཇི་ལྟར་བདེ་གཤེགས་སྤྱོད་ཡུལ་སྤྱད་པ་དང་། །ཇི་ལྟར་བདུད་ཀྱི་སྤྱོད་ཡུལ་སྤང་བ་དག །ལམ་གཉིས་ཤིན་ཏུ་མཁྱེན་པས་རབ་ཏུ་བསྟན། །སྟོན་པ་ལ་ནི་ཀླུ་བདག་དེས་ཞུས་ནས། །དེ་ཡི་བསམ་པ་ཐུགས་ཆུད་ལུང་བསྟན་པ། །མི་མཁས་གང་དག་སེམས་ཅན་འདུ་ཤེས་སྤྱོད། །དེ་དག་ནག་པོའི་རྩ་ལག་སྤྱོད་ཡུལ་སྤྱོད།