Degé Kangyur volume 47, F.114.a

བདག་གིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐབས་ཅིག་ཏུ་བར་སྣང་ལས་གཤེགས་པ་མཐོང་སྟེ། འདི་ལྟ་སྟེ་དཔེར་ན། ངང་པའི་རྒྱལ་པོ་ཆེན་པོ་ལྟ་བུར་མཐོང་ནས། སྲོག་ཆགས་ཁྲི་དག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་ཏེ་རྣམ་པར་དག་གོ། །​གང་དག་སྔོན་གྱི་སངས་རྒྱས་བཅོམ་ལྡན་འདས་རྣམས་ལ་སྤྱད་པའི་སྲོག་ཆགས་ཁྲི་དག་གིས་ནི། བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་མཐོང་ནས། བྱང་ཆུབ་ཏུ་སེམས་བསྐྱེད་དེ། དེ་དག་བྱང་ཆུབ་ཏུ་སེམས་བསྐྱེད་མ་ཐག་ཏུ་མི་སྐྱེ་བའི་ཆོས་ལ་བཟོད་པ་ཐོབ་བོ། །​སྔོན་སེམས་མ་བསྐྱེད་པའི་སྲོག་ཆགས་ཁྲི་དག་གིས་ནི་བྱང་ཆུབ་ཏུ་སེམས་བསྐྱེད་དོ། །​ཉན་ཐོས་དག་གིས་འདུལ་བའི་སྲོག་ཆགས་བརྒྱད་ཁྲི་དག་ནི་ཉན་ཐོས་ཀྱི་རྫུ་འཕྲུལ་མཐོང་ནས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་ཏེ་རྣམ་པར་དག་གོ། །​ལྷའི་བུ་ཁྲི་དག་གིས་ནི་བཅོམ་ལྡན་འདས་ཀྱི་རྫུ་འཕྲུལ་མཐོང་ནས། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་ཏེ་རྣམ་པར་དག་གོ། །​གཟུགས་ན་སྤྱོད་པའི་ལྷའི་བུ་ཁྲི་དག་གིས་ནི། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་ཏེ་རྣམ་པར་དག་པ་ནས། ཕྱིར་མི་འོང་བའི་འབྲས་བུ་ཐོབ་པའི་བར་དུ་གྱུར་ཏོ། །​དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་དྲི་ཟའི་རྒྱལ་པོའི་བུ་གཙུག་ཕུད་ལྔ་པ་ལ་སྨྲས་པ། གཙུག་ཕུད་ལྔ་པ་དེ་བཞིན་གཤེགས་པ་ལ་བཀུར་སྟི་གྱིས་ཤིག །​དྲི་ཟའི་རྒྱལ་པོའི་བུ་གཙུག་ཕུད་ལྔ་པས་དེ་ལྟར་འཚལ་ལོ་ཞེས་ལྷ་རྣམས་ཀྱི་དབང་པོ་བརྒྱ་བྱིན་གྱི་ལྟར་མཉན་ཏེ། དྲི་ཟ་ས་ཡ་ཕྲག་དྲུག་དག་དང་ལྷན་ཅིག་ཏུ་རྒྱུད་ཀྱི་དབྱངས་དང་། གླུའི་དབྱངས་ཀྱིས་དེ་བཞིན་གཤེགས་པ་ལ་བཀུར་སྟི་བྱེད་དོ། །​རོལ་མོའི་སྒྲ་དང་གླུ་སྒྲ་དེ་དག་གིས་རྒྱ་མཚོ་ཆེན་པོའི་ཀླུའི་རྒྱལ་པོ་དེ་དག་རབ་ཏུ་དགའ་ཞིང་བདེ་བ་དང་ཡིད་བདེ་བ་སྐྱེས་ནས་རང་རང་གི་གནས་ནས་བྱུང་ངོ་། །​དེ་དག་བྱུང་བས་རྒྱ་མཚོ་ཆེན་པོ་ན་འབྱུང་པོ་ཆེན་པོ་དག་གི་གནས་རྣམ་པར་འཁྲུགས་སོ། །​ཀླུའི་རྒྱལ་པོ་མཛེས་པ་ལ་སོགས་པ་ཀླུ་དུང་ཕྱུར་ཕྲག་བརྒྱད་དག་བཅོམ་ལྡན་འདས་ལ་བལྟ་བའི་ཕྱིར་རྒྱ་མཚོ་ཆེན་པོ་ནས་



The English translation of this folio by 84000 Translating the words of the Buddha can be found at:
https://read.84000.co/translation/toh99.html?part=UT22084-047-001-2777#UT22084-047-001-2777