Degé Kangyur volume 47, F.64.b

བ་ཆེན་པོ་ངུ་འབོད་ཀྱི་ཉིན་ཞག་གཅིག་གོ། །​ཉིན་ཞག་གི་ཚད་དེས་ཞེས་བྱ་བ་ནས་ལོའི་བར་དུའོ། །​སེམས་ཅན་དམྱལ་བ་ཆེན་པོ་ངུ་འབོད་ཀྱི་ཚེའི་ཚད་ནི་ལོ་ཉིས་སྟོང་ངོ་། །​དགའ་ལྡན་གྱི་ལྷ་རྣམས་ཀྱི་ཚེའི་ཚད་གང་ཡིན་པ་དེ་ནི། ངུ་འབོད་གཏུམ་པོའི་ཉིན་ཞག་གཅིག་གོ། །​ཉིན་ཞག་དེས་ཞེས་བྱ་བ་ནས་ལོའི་བར་དུ་སྟེ། ཚེའི་ཚད་ལོ་བཞི་སྟོང་ངོ་། །​འཕྲུལ་དགའི་ལྷ་རྣམས་ཀྱི་ཚེའི་ཚད་གང་ཡིན་པ་དེ་ནི། སེམས་ཅན་དམྱལ་བ་ཆེན་པོ་ཚ་བའི་ཉིན་ཞག་གཅིག་གོ། །​ཉིན་ཞག་གི་ཚད་དེས་ཞེས་བྱ་བ་ནས་ལོའི་བར་དུའོ། །​སེམས་ཅན་དམྱལ་བ་ཆེན་པོ་ཚ་བ་རྣམས་ཀྱི་ཚེའི་ཚད་ནི་ལོ་བརྒྱད་སྟོང་ངོ་། །​གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཚེའི་ཚད་གང་ཡིན་པ་དེ་ནི་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་ཉིན་ཞག་གཅིག་གོ། །​ཉིན་ཞག་གི་ཚད་དེས་ཞེས་བྱ་བ་ནས་ལོའི་བར་དུའོ། །​སེམས་ཅན་དམྱལ་བ་ཆེན་པོ་རབ་ཏུ་ཚ་བའི་ཚེའི་ཚད་ནི་ལོ་དྲུག་སྟོང་ངོ་། །​སེམས་ཅན་དམྱལ་བ་ཆེན་པོ་བསྡུས་གཞོམ་གྱི་ཚེའི་ཚད་ནི་བསྐལ་པ་ཕྱེད་དེ། དུས་མ་ཡིན་པར་འཆི་བ་ཡང་ཡོད། སེམས་ཅན་དམྱལ་བ་ཆེན་པོ་མནར་མེད་པའི་ཚེའི་ཚད་ནི་བསྐལ་པ་སྟེ། དུས་མ་ཡིན་པར་འཆི་བ་ཡང་ཡོད། འདི་ལྟ་སྟེ་དཔེར་ན། ཡུལ་མ་ག་དྷཱའི་ཁལ་གསུམ་བྲེ་བཞིའི་ཕྲག་ཉི་ཤུ་ལ། ཏིལ་ཁལ་དྲུག་ཅུ་རྩ་བཞི་སྟེ། དེ་ལས་ལོ་བརྒྱ་འདས་ཤིང་མིས་ཏིལ་འབྲུ་གཅིག་བོར་ཏེ། རྣམ་གྲངས་དང་ཐབས་དེ་ལྟ་བུས་ཡུལ་མ་ག་དྷཱའི་ཏིལ་ཁལ་དྲུག་ཅུ་རྩ་བཞི་ལས་ཟད་པར་གྱུར་ཀྱང་སེམས་ཅན་དམྱལ་བ་ཆེན་པོ་ཆུ་བུར་ཅན་གྱི་ཚེའི་ཚད་ནི་དེ་ལྟར་མི་ཟད་དོ། །​སེམས་ཅན་དམྱལ་བ་ཆེན་པོ་ཆུ་བུར་ཅན་གྱི་ཚེའི་ཚད་ཉི་ཤུ་གང་ཡིན་པ་དེ་ནི་སེམས་ཅན་དམྱལ་བ་ཆེན་པོ་ཆུ་བུར་རྡོལ་གྱི་ཚེའི་ཚད་གཅིག་ཡིན་ནོ། །​སེམས་ཅན་དམྱལ་བ་ཆེན་པོ་ཆུ་བུར་རྡོལ་གྱི་ཚེའི་ཚད་ཉི་ཤུ་གང་ཡིན་པ་དེ་ནི་སེམས་ཅན་དམྱལ་བ་ཆེན་པོ་སོ་ཏམས་ཏམས་ཀྱི་ཚེའི་ཚད་གཅིག་ཡིན་ནོ། །​སེམས་ཅན་དམྱལ་བ་ཆེན་པོ་སོ་ཏམས་ཏམས་ཀྱི་ཚེའི་ཚད་ཉི་ཤུ་གང་ཡིན་པ་དེ་ནི་ཀྱི་ཧུད་ཟེར་གྱི་ཚེའི་ཚད་གཅིག་གོ། །​ཀྱི་ཧུད་ཟེར་གྱི་ཉི་ཤུ་གང་ཡིན་པ་དེ་ནི་ཨ་ཆུ་ཟེར་གྱི་གཅིག་གོ། །​ཨ་ར་ཌེའི་ཉི་ཤུ་གང་ཡིན་པ་དེ་ནི་མེ་ཏོག་དྲི་ཞིམ་ལྟར་གས་པའི་གཅིག་གོ། །​མེ་ཏོག་དྲི་ཞིམ་ལྟར་གས་པའི་ཉི་ཤུ་



The English translation of this folio by 84000 Translating the words of the Buddha can be found at:
https://read.84000.co/translation/toh99.html?part=UT22084-047-001-2678#UT22084-047-001-2678