Degé Kangyur volume 46, F.233.b

།བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་བདག་དང་གཞན་ལ་གདུང་བ་མེད་པ་ཞེས་བྱ་བའི་ཚིག་བླ་དགས་སོ། །​བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་གཞན་ལ་མི་སྨོད་པ་ཞེས་བྱ་བའི་ཚིག་བླ་དགས་སོ། །​བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་གཞན་ལ་སྟེན་པ་ཞེས་བྱ་བའི་ཚིག་བླ་དགས་སོ། །​བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་གཞན་གྱི་ལྟུང་བ་མི་གླེང་བ་ཞེས་བྱ་བའི་ཚིག་བླ་དགས་སོ། །​བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་ཉེས་པ་ཐམས་ཅད་ལས་འབྱིན་པ་ཞེས་བྱ་བའི་ཚིག་བླ་དགས་སོ། །​བུ་མོ་བྱང་ཆུབ་སེམས་དཔའི་རབ་ཏུ་འབྱུང་བ་ནི་གཞན་ལ་རག་ལས་པ་ཡིན་ཏེ། བྱང་ཆུབ་སེམས་དཔས་གཞན་ལ་རག་མ་ལས་པར་བྱའོ། །​བུ་མོས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའི་རབ་ཏུ་འབྱུང་བ་གཞན་ལ་རག་ལས་པ་ལགས། འཇམ་དཔལ་གྱིས་སྨྲས་པ། བུ་མོ་རབ་ཏུ་འབྱུང་བ་ནི་ཚུལ་ཁྲིམས་ལ་རག་ལས་པ་ཡིན་ཏེ། ཚུལ་ཁྲིམས་འཆལ་པ་ལ་ནི་རབ་ཏུ་འབྱུང་བ་ཅི་ཡང་མེད་དོ། །བུ་མོ་རབ་ཏུ་འབྱུང་བ་ནི་ཏིང་ངེ་འཛིན་ལ་རག་ལས་པ་ཡིན་ཏེ། བརྗེད་ངས་པ་ལ་ནི་རབ་ཏུ་འབྱུང་བ་ཅི་ཡང་མེད་དོ། །​བུ་མོ་རབ་ཏུ་འབྱུང་བ་ནི་ཤེས་རབ་ལ་རག་ལས་པ་ཡིན་ཏེ། ཤེས་རབ་འཆལ་པ་ལ་ནི་རབ་ཏུ་འབྱུང་བ་ཅི་ཡང་མེད་དོ། །​བུ་མོ་རབ་ཏུ་འབྱུང་བ་ནི་རྣམ་པར་གྲོལ་བ་ལ་རག་ལས་པ་ཡིན་ཏེ། སེམས་རྣམ་པར་མ་གྲོལ་བ་ལ་ནི་རབ་ཏུ་འབྱུང་བ་ཅི་ཡང་མེད་དོ། །​བུ་མོ་རབ་ཏུ་འབྱུང་བ་ནི་རྣམ་པར་གྲོལ་བའི་ཡེ་ཤེས་མཐོང་བ་ལ་རག་ལས་པ་ཡིན་ཏེ། རྣམ་པར་གྲོལ་བའི་ཡེ་ཤེས་མཐོང་བ་མེད་པ་ལ་ནི་རབ་ཏུ་འབྱུང་བ་ཅི་ཡང་མེད་དོ། །​བུ་མོས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའི་རབ་ཏུ་འབྱུང་བ་གཞན་ལ་རག་ལས་པ་མ་མཆིས་པ་ལགས། འཇམ་དཔལ་གྱིས་སྨྲས་པ། བུ་མོ་བྱང་ཆུབ་སེམས་དཔའ་ནི་གཞན་གྱི་དྲིང་མི་འཇོག་པས་ན་གཞན་ལ་རག་ལས་པ་མེད་པ་སྟེ། རང་གི་ཀུན་ཤེས་པའི་ཡེ་ཤེས་ཀྱིས་འདིས་གང་ཅི་ཤེས་པ་དེ་བདག་གིས་ཀྱང་ཤེས་ལ། འདི་གང་ཅི་སྨྲ་བ་དེ་བདག་ཀྱང་སྨྲའོ་ཞེས་གཞན་དག་གི་ངོར་མི་ལྟ་བས་ན། གཞན་ལ་རག་ལས་པ་མེད་པ་ཡིན་ནོ། །​འཇམ་དཔལ་གཞོན་ནུར་གྱུར་པས་རབ་ཏུ་འབྱུང་བའི་ལེའུའི་ཆོས་ཀྱི་རྣམ་གྲངས་འདི་བཤད་པ་ན། ལེགས་པར་བཤད་པའི་ཕྱིར་བྱང་ཆུབ་སེམས་དཔའ་ལྔ་བརྒྱས་རང་རང་གི་གོས་དང་རྒྱན་ཐམས་ཅད་ལུས་ལས་ཕུད་དེ།



The English translation of this folio by 84000 - Translating the words of the Buddha can be found at:
https://read.84000.co/translation/toh96.html?part=UT22084-046-002-614#UT22084-046-002-614