Degé Kangyur volume 46, F.235.a

འབྲུ་མར་སྒྲོན་མ་མུན་པར་བྱུང་བ་ན། །​མུན་པ་ཕྱོགས་སུ་འདོང་བ་མེད་པ་ལྟར། །​ཤེས་རབ་ཀྱིས་ནི་མུན་པ་མེད་གྱུར་ན། །​ཉོན་མོངས་ཟད་གྱུར་མེད་ཅིང་འབྱུང་བའང་མེད། །​ཇི་ལྟར་སྨན་པས་ནད་པ་གསོ་བ་ན། །​དེ་ཡི་ཁམས་ནི་འཇིག་པར་མི་བྱེད་ཀྱང་། །​དེ་ཡི་གློ་བུར་ནད་ནི་ཞི་བར་འགྱུར། །​ནད་རྣམས་གཞན་ཡང་འབྱུང་བ་མེད་པ་ལྟར། །​དེ་བཞིན་སྨན་པའི་དམ་པ་འཇམ་དབྱངས་ཀྱིས། །​རིགས་པའི་ཚུལ་མཁྱེན་སྦྱོར་བ་སྣ་ཚོགས་ཀྱིས། །​སེམས་ཅན་ཉོན་མོངས་ཉེ་བར་ཞི་མཛད་ཀྱང་། །​ཆོས་རྣམས་རྣམ་པར་འཇིག་པར་མཛད་པ་མེད། །​ཕུང་པོ་འདི་དང་ཁམས་རྣམས་འདི་དག་དང་། །​སྐྱེ་མཆེད་འདི་རྣམས་གཞན་དུ་འགྱུར་བ་མེད། །​གང་དག་སྔོན་ཆད་ཉེས་ལྡན་དུག་བཅས་པ། །​དེ་དག་དེ་ནི་དུག་མེད་འགྱུར་བ་མེད། །​དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་གྱིས་ཚིགས་སུ་བཅད་པ་དེ་དག་སྨྲས་ནས། ཡང་འཇམ་དཔལ་གཞོན་ནུར་གྱུར་པའི་རྐང་པ་ལ་མགོ་བོས་ཕྱག་བྱས་ཏེ། ཡང་འཇམ་དཔལ་གཞོན་ནུར་གྱུར་པ་ལ་བསྐོར་བ་བྱས་ནས། ཚོང་དཔོན་གྱི་བུ་འཇིགས་བྱིན་དང་། ལྷན་ཅིག་ཏུ་ཤིང་རྟ་ལ་ཞོན་ཏེ། དེ་ལྟ་བུའི་འབྱོར་པ་ཉིད་ཀྱིས་སྐྱེད་མོས་ཚལ་གྱི་སར་སོང་ངོ་། །​འཇམ་དཔལ་གཞོན་ནུར་གྱུར་པས་ཀྱང་ཐམས་ཅད་དང་ལྡན་པའི་འཁོར་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །​ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་སོ། །​ཡང་དག་པར་བསྟན། ཡང་དག་པར་འཛིན་དུ་བཅུག །​ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས། དེ་དག་ལ་འདི་སྐད་ཅེས་སྨྲས་སོ། །​གྲོགས་པོ་དག་གང་དག་ཆོས་ཉན་པར་དགའ་བ་རྣམས་དེ་ཡང་ཕྱི་དྲོའི་དུས་ཀྱི་ཚེ། དེ་བཞིན་གཤེགས་པའི་སྤྱན་སྔར་དེང་ཤིག །​དེ་སྐད་ཅེས་སྨྲས་ནས། ས་ཕྱོགས་དེ་ནས་ལངས་ཏེ། རང་རང་གི་གནས་ག་ལ་བ་དེ་ལོགས་སུ་



The English translation of this folio by 84000 Translating the words of the Buddha can be found at:
https://read.84000.co/translation/toh96.html?part=UT22084-046-002-617#UT22084-046-002-617