Degé Kangyur volume 46, F.117.b

རིང་པོ་ནས་འོང་བ་མཐོང་ནས་ངོ་མཚར་དུ་གྱུར་ཏེ་སློབ་མ་རྣམས་ལ་སྨྲས་པ། ཀྱེ་འདིའི་གཟུགས་ལ་ལྟོས་ཤིག །​དེ་དག་གིས་སྨྲས་པ། དེ་བཞིན་དུ་དེ་ལ་བལྟ་བར་བགྱིས་ཏེ་འདི་ནི་ཡ་མཚན་ཆེའོ། །​དགེ་སློང་དག་དེ་ནས་ང་སྒྱུ་རྩལ་ཤེས་ཀྱི་བུ་རིང་འཕུར་ག་ལ་བ་དེར་སོང་སྟེ། སྒྱུ་རྩལ་ཤེས་ཀྱི་བུ་རིང་འཕུར་ལ་འདི་སྐད་ཅེས་སྨྲས་སོ། །​ཀྱེ་སྒྱུ་རྩལ་ཤེས་ཀྱི་བུ་རིང་འཕུར་ཁྱོད་ལས་བདག་གིས་ཚངས་པར་སྤྱད་པ་སྤྱོད་དོ། །​དེས་སྨྲས་པ། ཀྱེ་གཽ་ཏ་མ་དད་པའི་རིགས་ཀྱི་བུས་གང་ལ་སྤྱད་ན་ཚེགས་ཆུང་ངུས་ཀུན་ཤེས་པ་ཐོབ་པར་འགྱུར་བའི་ཆོས་བསྟན་པ་དེ་ལྟ་བུ་ལ་སྤྱོད་ཅིག །​དགེ་སློང་དག་ངས་འདི་སྙམ་དུ་སེམས་ཏེ། ང་ལ་མོས་པ་ཡང་ཡོད། ང་ལ་བརྩོན་འགྲུས་ཀྱང་ཡོད། དྲན་པ་ཡང་ཡོད། ཏིང་ངེ་འཛིན་ཀྱང་ཡོད། ཤེས་རབ་ཀྱང་ཡོད་ཀྱིས། ཆོས་དེ་ཉིད་ཐོབ་པར་བྱ་བ་དང་། མངོན་དུ་བྱ་བའི་ཕྱིར་བདག་གཅིག་པུ་བག་ཡོད་པ་དང་། བརྟུན་པ་དང་དབེན་པར་གནས་པར་བྱའོ་སྙམ་ནས། དགེ་སློང་དག་དེ་ནས་ང་གཅིག་པུ་བག་ཡོད་པ་དང་། བརྟུན་པ་དང་། དབེན་པར་གནས་ནས། ཚེགས་ཆུང་ངུས་ཆོས་དེ་ཁོང་དུ་ཆུད་ཅིང་མངོན་དུ་གྱུར་ཏོ། །​དགེ་སློང་དག་དེ་ནས་ང་སྒྱུ་རྩལ་ཤེས་ཀྱི་བུ་རིང་འཕུར་ག་ལ་བ་དེར་སོང་སྟེ། འདི་སྐད་ཅེས་སྨྲས་སོ། །​ཀྱེ་རིང་འཕུར་ཁྱོད་ཀྱིས་ཆོས་འདི་ཙམ་ཞིག་ཁོང་དུ་ཆུད་ཅིང་མངོན་དུ་གྱུར་ཏམ། དེས་སྨྲས་པ། ཀྱེ་གཽ་ཏ་མ་དེ་དེ་བཞིན་ནོ། །​ངས་སྨྲས་པ། ཀྱེ་ཁོ་བོས་ཀྱང་ཆོས་དེ་མངོན་དུ་བྱས་ཤིང་ཁོང་དུ་ཆུད་དོ། །​དེས་སྨྲས་པ། ཀྱེ་གཽ་ཏ་མ་དེ་བས་ན་ཆོས་གང་ཁོ་བོས་ཤེས་པ་དེ་ཁྱོད་ཀྱིས་ཤེས་ལ་གང་ཁྱོད་ཀྱིས་ཤེས་པ་དེ་ཡང་ཁོ་བོས་ཤེས་ཏེ། དེ་བས་ན་བདག་ཅག་གཉི་གས་སློབ་མའི་ཚོགས་འདི་ལ་བསྟན་ཏོ། །​དགེ་སློང་དག་དེ་ནས་སྒྱུ་རྩལ་ཤེས་ཀྱི་བུ་རིང་འཕུར་གྱིས་ང་ལ་མཆོད་པ་དམ་པས་མཆོད་དེ། ང་སློབ་མ་རྣམས་ལ་ཡང་དོན་འཐུན་པར་བྱེད་དུ་བཅུག་གོ། །​དགེ་སློང་དག་ངས་འདི་སྙམ་དུ་བསམས་ཏེ། རིང་འཕུར་གྱི་ཆོས་འདི་ནི་ངེས་པར་འབྱུང་བ་མ་ཡིན་ཏེ། དེ་བྱེད་པ་ཡང་དག་པར་སྡུག་བསྔལ་ཟད་པར་ངེས་པར་འབྱུང་བ་མ་ཡིན་གྱིས། བདག་གིས་དེ་ལས་ལྷག་པ་ཞིག་བཙལ་ཞིང་



The English translation of this folio by 84000 Translating the words of the Buddha can be found at:
https://read.84000.co/translation/toh95.html?part=UT22084-046-001-4294#UT22084-046-001-4294