Degé Kangyur volume 46, F.113.b

འདུན་པ་རྟ་བསྔགས་ལྡན་ཁྲིད་དེ་འོང་གིས་དེ་ལ་མ་དྲིས་ཀྱི་བར་དུ་ཧུར་འདུམས་མ་བྱེད་ཅིག་ཅེས་སྨྲས་ནས། དེ་དག་གིས་འདུན་པ་ལ་དྲིས་པ། ཀྱེ་འདུན་པ་གོས་ཀ་ཤི་པ་འདི་དག་གི་ཕྱིར་མི་འདིས་གཞོན་ནུ་བཀྲོངས་པར་མ་གྱུར་གྲང་། འདུན་པས་སྨྲས་པ། དེ་ལྟ་ནི་མ་ཡིན་ཏེ་འདིས་ཀྱང་གཞོན་ནུ་ལ་གོས་ངུར་སྨྲིག་རྣམས་ཕུལ་ལོ། །​གཞོན་ནུས་ཀྱང་ན་བཟའ་ཀ་ཤི་པ་འདི་རྣམས་འདི་ལ་བྱིན་ནོ། །​དེ་ནས་ལྷའི་བུ་དེས་དེ་དག་མཆོད་པའི་ཕྱིར་གོས་དེ་རྣམས་ལག་པ་གཉི་གས་སྤྱི་བོ་ལ་ཐོགས་ཏེ། དེ་ཉིད་ནས་ལྷའི་འཇིག་རྟེན་དུ་སོང་ངོ་། །​དེ་དག་གིས་ཡང་འདུན་པ་ལ་དྲིས་པ། འདི་ལ་ཇི་སྙམ་དུ་སེམས། ཁོ་བོ་ཅག་ཤཱཀྱ་གཞོན་ནུ་ཟློག་ཏུ་དོང་ན་ནུས་སམ། དེས་སྨྲས་པ་མི་ནུས་སོ། །​གཞོན་ནུ་ནི་བརྩོན་འགྲུས་དང་བརྟུལ་བ་བརྟན་པ་ཡིན་ཏེ། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་ང་སེར་སྐྱའི་གནས་ཀྱི་གྲོང་ཁྱེར་ཆེན་པོར་མི་འཇུག་གོ་ཞེས་དེ་སྐད་གསུང་བས་ཕྱིར་མི་ལྡོག་སྟེ། གཞོན་ནུས་ཇི་སྐད་གསུངས་པ་དེ་དེ་བཞིན་དུ་འགྱུར་རོ། །​དེ་ཅིའི་ཕྱིར་ཞེ་ན། གཞོན་ནུ་ནི་བརྩོན་འགྲུས་དང་བརྟུལ་བ་བརྟན་པས་སླར་མི་ལྡོག་གོ། །​དེ་ནས་འདུན་པ་རྟ་བསྔགས་ལྡན་དང་རྒྱན་རྣམས་ཁྱེར་ཏེ་བཙུན་མོའི་འཁོར་གྱི་ནང་དུ་ཕྱིན་ཏོ། །​དེ་ནས་རིང་བ་ཞིག་ལོན་པ་དང་། རྒྱན་དེ་དག་ཤཱཀྱ་གཞོན་ནུ་བཟང་པོ་དང་། མིང་ཆེན་དང་། མ་འགགས་པས་བཏེག་པ་དང་། སྲེད་མེད་ཀྱི་བུ་ཆེན་པོ་ལྟར་མཁྲེགས་པ་དང་། སྲེད་མེད་ཀྱི་བུ་ཕྱེད་ལྟར་མཁྲེགས་པའི་རྒྱན་དེ་རྣམས་དེ་དག་གིས་མ་ཐེག་གོ། །​གང་གི་ཚེ་དེ་དག་གང་གིས་ཀྱང་ཐེག་པར་མ་ནུས་པ་དེའི་ཚེ། སྐྱེ་དགུའི་བདག་མོ་ཆེན་མོ་གཽ་ཏ་མཱི་འདི་སྙམ་དུ་སེམས་ཏེ། བདག་གིས་ཇི་སྲིད་དུ་རྒྱན་འདི་དག་མཐོང་བ་དེ་སྲིད་དུ་བདག་གི་སྙིང་ལ་མྱ་ངན་དུ་འགྱུར་གྱིས། བདག་གིས་རྒྱན་འདི་དག་རྫིང་དུ་དོར་རོ་སྙམ་མོ། །​དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་རྒྱན་དེ་དག་རྫིང་དུ་བོར་ཏེ། དེང་སང་དུ་ཡང་རྒྱན་གྱི་རྫིང་ཞེས་མིང་དུ་ཆགས་སོ། །​དེ་ལ་འདི་སྐད་ཅེས་བྱ་སྟེ། གང་ཚེ་བྱང་ཆུབ་སེམས་དཔའ་མཁས་པ་དཔའ་བོ་བྱུང་། །​དེ་ཚེ་སེར་སྐྱའི་གྲོང་ཁྱེར་བ་དག་མཐའ་དག་སད། །​ཀུན་གྱི་སྙིང་ལ་གཞོན་ནུ་མལ་ན་ཉལ་སྙམ་



The English translation of this folio by 84000 Translating the words of the Buddha can be found at:
https://read.84000.co/translation/toh95.html?part=UT22084-046-001-4286#UT22084-046-001-4286