Degé Kangyur volume 46, F.74.b

ཀུན་ཀྱང་བསོག་ཏུ་གསོལ། དེ་དག་གི་མདུན་དུ་བདག་གིས། སྒྱུ་རྩལ་བསྟན་པར་བགྱིའོ། །​དེ་ནས་རྒྱལ་པོ་ཟས་གཙང་མས་སེར་སྐྱའི་གནས་ཀྱི་གྲོང་ཁྱེར་ཆེན་པོར་དྲིལ་གྱི་སྒྲ་བསྒྲགས་ཏེ། དེང་ནས་ཞག་བདུན་ན་གཞོན་ནུ་རང་གི་སྒྱུ་རྩལ་སྟོན་གྱིས། དེར་སྒྱུ་རྩལ་ཤེས་པ་ཐམས་ཅད་ཤོག་ཤིག་ཅེས་བསྒོའོ། །​དེ་ནས་ཞག་བདུན་ལོན་པ་དང་། ཤཱཀྱ་གཞོན་ནུ་ལྔ་བརྒྱ་ཙམ་ཚོགས་པར་གྱུར་ཏོ། །​དེ་ནས་ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་རྒྱལ་བའི་རུ་མཚོན་དུ་བཞག་སྟེ། འདིར་རལ་གྲིའི་ཐབས་དང་འཕོང་དང་། སྟོབས་དང་། གྱད་ཀྱི་འཛིན་སྟངས་ཀྱིས་སུ་རྒྱལ་བ་དེ་ནི་འདི་ཁྱེར་ཅིག་ཅེས་དམ་བཅས་ནས། དེའི་ཚེ་ཐམས་ཅད་ཀྱི་ཐོག་མ་ལ་གཞོན་ནུ་ལྷ་སྦྱིན་གྲོང་ཁྱེར་ནས་བྱུང་ངོ་། །​དེའི་ཚེ་བྱང་ཆུབ་སེམས་དཔའི་བཞོན་པར་གླང་པོ་དཀར་པོ་བོང་ཤིན་ཏུ་ཆེ་བ་ཞིག་གྲོང་ཁྱེར་དུ་ཁྲིད་པ་གཞོན་ནུ་ལྷ་སྦྱིན་གྱིས་མཐོང་ནས་ཕྲག་དོག་དང་། ཤཱཀྱའི་ང་རྒྱལ་དང་། སྟོབས་ཀྱི་ང་རྒྱལ་གྱིས་དྲེགས་ནས། དེས་གླང་པོ་དེ་ལག་པ་གཡོན་པས་སྣ་ནས་བཟུང་སྟེ། ལག་པ་གཡས་པས་ཐལ་མོ་ལན་ཅིག་བསྣུན་པས་བསད་པར་གྱུར་ཏོ། །​དེའི་འོག་ཏུ་གཞོན་ནུ་མཛེས་དགའ་བོ་བྱུང་བ་དང་། དེས་གླང་པོ་ཆེན་པོ་དེ་གྲོང་ཁྱེར་གྱི་སྒོར་བསད་པ་མཐོང་ནས། སུས་བསད་ཅེས་དྲིས་པ་དང་། སྨྲས་པ། ལྷ་སྦྱིན་གྱིས་བསད་དོ། །​སྨྲས་པ། ལྷ་སྦྱིན་གྱིས་དེ་ནི་མ་ལེགས་པ་ཞིག་བྱས་སོ་ཞེས། དེས་གླང་པོ་དེའི་མཇུག་མ་ནས་བཟུང་སྟེ། གྲོང་ཁྱེར་གྱི་སྒོ་ནས་གུད་དུ་བོར་རོ། །​དེའི་འོག་ཏུ་བྱང་ཆུབ་སེམས་དཔའ་ཤིང་རྟ་ལ་ཞོན་ཏེ་བྱུང་བ་དང་། བྱང་ཆུབ་སེམས་དཔས་གླང་པོ་དེ་ལྟར་བསད་པ་མཐོང་ངོ་། །​མཐོང་ནས་ཀྱང་སུས་བསད་ཅེས་དྲིས་པ་དང་། སྨྲས་པ། ལྷ་སྦྱིན་གྱིས་བསད་དོ། །​སྨྲས་པ། ལྷ་སྦྱིན་གྱིས་དེ་ནི་མ་ལེགས་པ་ཞིག་བྱས་སོ། །​གྲོང་ཁྱེར་འདིའི་སྒོ་ནས་སུས་བོར་ཞེས་དྲིས་པ་དང་སྨྲས་པ། མཛེས་དགའ་བོས་བོར་རོ། །​སྨྲས་པ། མཛེས་དགའ་བོས་དེ་ལྟར་བྱས་པ་ཡང་ལེགས་ན། སེམས་ཅན་འདི་ནི་ལུས་ཆེན་པོ་དང་ལྡན་པ་སྟེ། རུལ་ན་གྲོང་ཁྱེར་ཐམས་ཅད་དྲི་མི་ཞིམ་པས་གང་བར་འགྱུར་རོ་ཞེས་ནས། དེ་ནས་བྱང་ཆུབ་སེམས་དཔས་ཤིང་རྟ་ལ་འདུག་



The English translation of this folio by 84000 Translating the words of the Buddha can be found at:
https://read.84000.co/translation/toh95.html?part=UT22084-046-001-4208#UT22084-046-001-4208