།འདི་དག་ནི་སྙིང་རྗེས་ཡོངས་སུ་བསྔོས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་དགའ་བས་ཡོངས་སུ་བསྔོས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། མཆོག་ཏུ་དགའ་བའི་སྔོན་དུ་འགྲོ་བའི་སྦྱིན་པ་གང་ཡིན་པ་དེ་ནི་དགའ་བའི་སྦྱིན་པའི་ཕ་རོལ་ཏུ་ཕྱིན་པའོ། །ཤིན་ཏུ་སྦྱངས་པའི་བསྒྲུབ་པའི་ཚུལ་ཁྲིམས་གང་ཡིན་པ་དེ་ནི་དགའ་བའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །ངོ་ཚ་ཤེས་པ་དང་ཁྲེལ་ཡོད་པ་ལས་བྱུང་བའི་བཟོད་པ་གང་ཡིན་པ་དེ་ནི་དགའ་བ་ལ་དམིགས་པའི་བཟོད་པའི་ཕ་རོལ་ཏུ་ཕྱིན་པའོ། །གནོད་སེམས་མེད་པར་བདག་དང་གཞན་བདེ་བར་བྱེད་ལ་ཉེས་པར་མི་སེམས་ཤིང་ལེགས་པར་སེམས་པ་དང་། འགྱོད་པ་དང་། གདུང་བ་མེད་པ་གང་ཡིན་པ་དེ་ནི་དགའ་བ་ལ་དམིགས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །མི་དགའ་བ་རབ་ཏུ་ཞི་བར་འགྱུར་བ་དང་། སེམས་རྣམ་པར་དག་པར་འགྱུར་བ་དང་། ཀུན་ནས་དཀྲིས་པ་སེལ་བར་འགྱུར་བ་དང་། འདོད་ཆགས་སྤོང་བར་འགྱུར་བ་གང་ཡིན་པ་དེ་ནི་དགའ་བ་ལ་དམིགས་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །བཏང་སྙོམས་བྱང་ཆུབ་ཀྱི་ཡན་ལག་ཡོངས་སུ་བཟུང་ཞིང་ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང་མཚུངས་པར་ལྡན་པ་རྣམ་པར་ཐར་པའི་སྒོ་སྨོན་པ་མེད་པའི་བྱིན་གྱི་རླབས་ཀྱིས་གནས་ཞི་བ་ཐོགས་པ་མེད་པ་ཕྱིན་ཅི་མ་ལོག་པ་གང་ཡིན་པ་དེ་ནི་དགའ་བ་ལས་བྱུང་བའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་བྱང་ཆུབ་སེམས་དཔའི་དགའ་བས་ཡོངས་སུ་བསྔོས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བཏང་སྙོམས་ཀྱིས་ཡོངས་སུ་བསྔོས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཆོས་མཉམ་པ་ཉིད་ཀྱི་རྣམ་པར་སྨིན་པ་ལམ་གྱི་རྒྱུད་བཅད་ཅིང་སེམས་མ་གཏུགས་པའི་སྦྱིན་པ་གང་ཡིན་པ་དེ་ནི་བཏང་སྙོམས་ཀྱིས་ཡོངས་སུ་བསྔོས་པའི་སྦྱིན་པའི་ཕ་རོལ་ཏུ་ཕྱིན་པའོ། །གདུང་བ་མེད་ཅིང་སྙིང་བརྩེ་བའི་སེམས་ཀྱིས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་དང་མཚུངས་པར་ལྡན་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་བཏང་སྙོམས་ཀྱིས་ཡོངས་སུ་བསྔོས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ།