།བདེན་པ་བཞི་རབ་ཏུ་ཤེས་པ་གང་ཡིན་པ་དེ་ནི་རྒྱུན་ཆད་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་རྒྱུན་ཆད་པ་མེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་འདོད་པའི་ཡོན་ཏན་ཡོངས་སུ་སྨིན་པར་བསྔོས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། བདོག་པ་ཐམས་ཅད་ཡོངས་སུ་གཏོང་བའི་སྦྱིན་པ་གང་ཡིན་པ་དེ་ནི་འདོད་པའི་ཡོན་ཏན་ཡོངས་སུ་སྨིན་པར་བསྔོས་པའི་སྦྱིན་པའི་ཕ་རོལ་ཏུ་ཕྱིན་པ་ཡིན་ལ། དེ་རྣམ་པར་ཐར་པའི་སྒོ་སྟོང་པ་ཉིད་ལ་བལྟ་བར་བྱ་བ་དེ་ཡང་འདོད་པའི་ཡོན་ཏན་ཡོངས་སུ་སྨིན་པར་བསྔོས་པའི་སྦྱིན་པའི་ཕ་རོལ་ཏུ་ཕྱིན་པའོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་ཕན་པའི་སེམས་ཀྱིས་གང་སྐྱེ་བ་དང་། འདོད་པ་ན་སྤྱོད་པར་ཡོངས་སུ་བསྔོས་པའི་ཚུལ་ཁྲིམས་གང་ཡིན་པ་དེ་ནི་འདོད་པའི་ཡོན་ཏན་ཡོངས་སུ་སྨིན་པར་བསྔོས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །ཡོངས་སུ་བརྟུལ་ན་རྗེས་སུ་འཐུན་པའི་ཡུལ་ལ་དང་དུ་ལེན་པའི་བཟོད་པ་གང་ཡིན་པ་དེ་ནི་འདོད་པའི་ཡོན་ཏན་ཡོངས་སུ་སྨིན་པར་བསྔོས་པའི་བཟོད་པའི་ཕ་རོལ་ཏུ་ཕྱིན་པའོ། །འཇིག་རྟེན་པའི་སེམས་ཀྱི་མོས་པ་ཇི་ལྟ་བ་བཞིན་དུ་ཡོངས་སུ་སྨིན་པར་བྱས་པའི་བརྩོན་འགྲུས་གང་ཡིན་པ་དེ་ནི་འདོད་པའི་ཡོན་ཏན་ཡོངས་སུ་སྨིན་པར་བསྔོས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །དུས་ཤེས་པ་དང་རབ་ཏུ་ལྡན་པའི་ཚད་མེད་པ་བྱམས་པ་དང་སྙིང་རྗེ་གཉིས་པོ་འདི་དག་གིས་ཕ་རོལ་སྡུག་བསྔལ་བདག་བདེ་བར་བྱེད་པ་གང་ཡིན་པ་དེ་ནི་འདོད་པའི་ཡོན་ཏན་ཡོངས་སུ་སྨིན་པར་བསྔོས་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །དཔྱོད་པ་ལ་རབ་ཏུ་སྦྱོར་ཞིང་དུས་དང་དུས་མ་ཡིན་པ་ལ་ལྟོས་པ་བྱམས་པ་དང་། སྙིང་རྗེའི་བདག་ཉིད་གང་ཡིན་པ་དེ་ནི་འདོད་པའི་ཡོན་ཏན་ཡོངས་སུ་སྨིན་པར་བསྔོས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་འདོད་པའི་ཡོན་ཏན་ཡོངས་སུ་སྨིན་པར་བསྔོས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བསམ་གཏན་ཡོངས་སུ་བསྔོས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྦྱིན་པས་བྱིན་གྱིས་བརླབས་པས་གང་དང་གང་དུ་འདོད་པར་འགྱུར་བ་གང་ཡིན་པ་དེ་ནི་བསམ་གཏན་ཡོངས་སུ་བསྔོས་པའི་སྦྱིན་པའི་ཕ་རོལ་ཏུ་ཕྱིན་པའོ། །སེམས་དང་རབ་ཏུ་ལྡན་པའི་ཚུལ་ཁྲིམས་གང་ཡིན་པ་དེ་ནི་བསམ་གཏན་གྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ།