མི་སྐྱེ་བའི་ཆོས་ལ་བཟོད་པར་ཡོངས་སུ་བསྔོས་པའི་སྦྱིན་པ་གང་ཡིན་པ་དེ་ནི་འཁོར་བར་ཡུན་རིང་བར་ཡོངས་སུ་བསྔོས་པའི་སྦྱིན་པའི་ཕ་རོལ་ཏུ་ཕྱིན་པའོ། །སྙིང་རྗེ་ཆེན་པོས་རྣམ་པར་ཐོ་འཚམ་པ་མེད་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་འཁོར་བར་ཡུན་རིང་བར་ཡོངས་སུ་བསྔོས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །སྨོན་ལམ་གྱི་ཡོངས་སུ་བསྔོས་པའི་བཟོད་པ་གང་ཡིན་པ་དེ་ནི་འཁོར་བར་ཡུན་རིང་བར་ཡོངས་སུ་བསྔོས་པའི་བཟོད་པའི་ཕ་རོལ་ཏུ་ཕྱིན་པའོ། །ཐོས་པར་ཡོངས་སུ་བསྔོས་པའི་བརྩོན་འགྲུས་གང་ཡིན་པ་དེ་ནི་འཁོར་བར་ཡུན་རིང་བར་ཡོངས་སུ་བསྔོས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །བདག་མེད་པའི་རྣམ་པར་ཡོངས་སུ་བསྔོས་པའི་བསམ་གཏན་གང་ཡིན་པ་དེ་ནི་འཁོར་བར་ཡུན་རིང་བར་ཡོངས་སུ་བསྔོས་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །ཕྱིར་མི་ལྡོག་པའི་སའི་ཤེས་རབ་གང་ཡིན་པ་དེ་ནི་འཁོར་བར་ཡུན་རིང་བར་ཡོངས་སུ་བསྔོས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་འཁོར་བར་ཡུན་རིང་བར་ཡོངས་སུ་བསྔོས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྒྱུན་ཆད་པ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། བསྡུ་བའི་དངོས་པོ་བཞི་སྦྱིན་པའི་ཕ་རོལ་ཏུ་ཕྱིན་པ་གང་ཡིན་པ་དེ་ནི་རྒྱུན་ཆད་པ་མེད་པའི་སྦྱིན་པའི་ཕ་རོལ་ཏུ་ཕྱིན་པའོ། །ལེགས་པར་སྤྱོད་པ་རྣམ་པ་གསུམ་གྱིས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་རྒྱུན་ཆད་པ་མེད་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །ལུས་དང་སེམས་དང་། སོ་སོར་བརྟགས་པའི་བཟོད་པ་དང་། ཆོས་ལ་བཟོད་པ་ནི་བཟོད་པ་བཞི་པོ་སྟེ། བཟོད་པ་གང་ཡིན་པ་དེ་དག་ནི་རྒྱུན་ཆད་པ་མེད་པའི་བཟོད་པའི་ཕ་རོལ་ཏུ་ཕྱིན་པའོ། །ཡང་དག་པའི་སྤོང་བ་བཞིས་མ་ཐོགས་ཤིང་ཀུན་ནས་དཀྲིས་པ་མེད་པ་གང་ཡིན་པ་དེ་ནི་རྒྱུན་ཆད་པ་མེད་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །དྲན་པ་ཉེ་བར་གཞག་པ་བཞིས་བསམ་གཏན་གྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་རྒྱུན་ཆད་པ་མེད་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །བདེན་པ་བཞི་རབ་ཏུ་ཤེས་པ་གང་ཡིན་པ་དེ་ནི་རྒྱུན་ཆད་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ།