Degé Kangyur volume 45, F.32.a

ཞེ་ན། མུ་སྟེགས་ཅན་གྱི་ཤེས་པ་ཟིལ་གྱིས་གནོན་པ་ལས་སོ། །​ལམ་དང་བསམ་གཏན་ཤིན་ཏུ་ཟབ་པ་གང་ཡིན་པ་དེ་ནི་ཟབ་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །​ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་དགེ་བར་བཏགས་པ་དང་མི་འགལ་བར་ཐམས་ཅད་དུ་ཐོགས་པ་མེད་པས་ཕྱེ་བ་ཉེ་བར་ཞི་བ་དང་རྒྱུ་འཐུན་པ། སྤྲོས་པ་མེད་པ་ལ་གནས་པ་གང་ཡིན་པ་དེ་ནི་ཟབ་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་ཟབ་པའི་ཕ་རོལ་ཏུ་ཕྱིན་པ་དྲུག་གོ། །​དེ་ལ་སྣ་ཚོགས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྦྱིན་པའི་ཕ་རོལ་ཏུ་ཕྱིན་པ་སྣ་ཚོགས་སྟེར་བ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པ་སྟེ། དེའི་རྣམ་པར་སྨིན་པ་གང་ཞེ་ན། ལུས་ལ་དཔེ་བྱད་སྣ་ཚོགས་པ་དང་། སྤོབས་པ་ཕུན་སུམ་ཚོགས་པ་གང་ཡིན་པ་དེ་ནི་སྣ་ཚོགས་པའི་སྦྱིན་པའི་ཕ་རོལ་ཏུ་ཕྱིན་པའོ། །​སངས་རྒྱས་ཀྱི་ཞིང་ཡོངས་སུ་འཛིན་པར་བྱེད་ཅིང་བསམ་པ་རྫོགས་པ་ཉེ་བར་གནས་པ་གང་ཡིན་པ་དེ་ནི་སྣ་ཚོགས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །​སངས་རྒྱས་ཀྱི་ཞིང་སྐྱོན་དང་བྲལ་བ་དེ་ནི་སེམས་ཅན་རྣམས་ལ་གནོད་སེམས་མེད་པར་གྱུར་ཅིག་ཅེས་ཡོངས་སུ་བསྔོ་བ་གང་ཡིན་པ་དེ་ནི་སྣ་ཚོགས་པའི་བཟོད་པའི་ཕ་རོལ་ཏུ་ཕྱིན་པའོ། །​ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའི་འཁོར་སྨིན་པར་བྱེད་པ་གང་ཡིན་པ་དེ་ནི་སྣ་ཚོགས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །​འཁོར་དྲེགས་པ་དང་། འདོད་ཆགས་ཅན་གྱི་ནང་ན་གནས་ཀྱང་སེམས་ལ་བརྗེད་ངས་པ་མེད་ཅིང་དྲན་པར་ཡོངས་སུ་བསྔོ་བའི་སེམས་གང་ཡིན་པ་དེ་ནི་སྣ་ཚོགས་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །​ཐབས་མཁས་པས་ཡོངས་སུ་ཟིན་པའི་ཤེས་རབ་ཐམས་ཅད་དུ་བརྗེད་ངས་པ་མེད་ཅིང་ཆོས་ཟབ་མོ་སྟོན་པ་ལ་གཞན་ལ་རག་མ་ལས་པ་གང་ཡིན་པ་དེ་ནི་སྣ་ཚོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་སྣ་ཚོགས་པའི་ཕ་རོལ་ཏུ་ཕྱིན་པ་དྲུག་གོ། །​བཀོད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཡིད་ཀྱིས་སངས་རྒྱས་ཀྱི་ཞིང་བཟའ་བ་དང་བཏུང་བ་ཕུན་སུམ་ཚོགས་པ་གང་ཡིན་པ་དེ་ནི་བཀོད་པའི་སྦྱིན་



The English translation of this folio by 84000 Translating the words of the Buddha can be found at:
https://read.84000.co/translation/toh94.html?part=UT22084-045-001-13917#UT22084-045-001-13917