Degé Kangyur volume 45, F.308.b

དེ་ལ་ནི། །​བསོད་སྙོམས་དང་པོ་དག་ནི་དབུལ་བ་བྱས་ནས་ཀྱང་། །​དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །​དེ་བཞིན་གཤེགས་པ་ངོས་བཟངས་ཕྱུགས་རྫིའི་ཚེ། །​དེ་བཞིན་གཤེགས་པ་མེ་ཏོག་འོད་དེ་ལ། །​ཞུན་མར་དག་ནི་དབུལ་བ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་བློ་བཟངས་ཕྱུག་པོའི་བུ་ཚེ་སངས་རྒྱས་ཀྱི། །​དགེ་སློང་ཁ་ཏོན་འདོན་པར་བཟའ་བ་བྱིན་ནས་ཀྱང་། །​དེ་བཞིན་གཤེགས་པ་བློ་གྲོས་མཆོག་མ་དེ་ལ་ནི། །​དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཀུན་གཟིགས་རབ་བྱུང་ཞག་བདུན་དགེ་སློང་ཚེ། །​དེ་བཞིན་གཤེགས་པ་སྤོས་ཀྱི་ངད་ལྡན་བཅོམ་ལྡན་གྱིས། །​ལེགས་པར་གསུངས་ལ་རྗེས་སུ་ཡི་རང་ཕུལ་ནས་ཀྱང་། །​དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཡེ་ཤེས་མཆོག་ནི་དགེ་སློང་ཚེ། །​ཏིང་འཛིན་འདི་ལ་ཡི་རང་བྱས་ནས་ཀྱང་། །​དེ་བཞིན་གཤེགས་པ་ཡོན་ཏན་མཐུ་རྩལ་ལ། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​དེ་བཞིན་གཤེགས་པ་ཚངས་གནས་རྒྱལ་བུའི་ཚེ། །​དེ་བཞིན་གཤེགས་པ་བློ་གྲོས་ཁྱད་པར་ལ། །​ཡན་ལག་ལྔ་ལྡན་སིལ་སྙན་དག་གིས་མཆོད། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​དེ་བཞིན་གཤེགས་པ་བདེན་གསུང་ཁྱིམ་བདག་ཚེ། །​དེ་བཞིན་གཤེགས་པ་དྲང་སྲོང་གསལ་དེ་ལ། །​ལྷུང་བཟེད་འོ་མས་བཀང་སྟེ་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​དེ་བཞིན་གཤེགས་པ་བློ་བཟངས་སྨན་པའི་ཚེ། །​དེ་བཞིན་གཤེགས་པ་རིན་ཆེན་སྒྲོན་དེ་ལ། །​ཨ་རུ་ར་ཡི་འབྲས་བུ་དགུ་ཕུལ་ནས། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་སྟོབས་བྱིན་ཚོང་དཔོན་བུར་གྱུར་ཚེ། །​དེ་བཞིན་གཤེགས་པ་གཟི་བརྗིད་འབར་བ་ཡི། །​གཙུག་ལག་ཁང་དག་སྐྱོང་ནུལ་བྱུགས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་སེང་གེ་སྟབས་ནི་རྒྱ་མཚོའི་ཚོང་པའི་ཚེ། །​དེ་བཞིན་གཤེགས་པ་གཟིགས་པ་ཐ་མ་དེ་ལ་ནི། །​བྱི་རུ་སྤར་བ་བཀང་སྟེ་གཏོར་བ་བྱས་ནས་ཀྱང་། །​དང་པོ་ཉིད་དུ་བྱང་ཆུབ་ཏུ་ནི་



The English translation of this folio by 84000 Translating the words of the Buddha can be found at:
https://read.84000.co/translation/toh94.html?part=UT22084-045-001-14470#UT22084-045-001-14470