།མེ་ཏོག་དག་གི་ཕུར་མ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མེ་ཏོག་བཟང་པོ་ཡིག་མཁན་ཚེ། །དེ་བཞིན་གཤེགས་པ་སྣ་ཚོགས་གསུང་དེ་ལ། །གྲོ་བའི་གླེགས་མ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་མཐོན་པོ་ཤལ་ཁྱེར་ཚེ། །དེ་བཞིན་གཤེགས་པ་ཟླ་བ་སྡུག་དེ་ལ། །མར་མེ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྒྱ་མཚོ་རོལ་མོ་མཁན་གྱི་ཚེ། །རྔ་བོ་ཆེ་དག་བརྡུང་བ་བྱས་ནས་ཀྱང་། །དེ་བཞིན་གཤེགས་པ་ཟླ་བའི་གདུགས་དེ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ས་འཛིན་མགར་བའི་ཚེ། །དེ་བཞིན་གཤེགས་པ་ཀུན་ཏུ་གཟིགས་དེ་ལ། །མཚོན་ཆ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དོན་བློ་ལྷའི་བུ་ཉི་མའི་ཚེ། །དེ་བཞིན་གཤེགས་པ་གོས་པ་མེད་དེ་ལ། །མེ་ཏོག་མན་ད་ར་བ་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་བསགས་པ་སྨན་པའི་ཚེ། །དེ་བཞིན་གཤེགས་པ་གྲགས་བླ་བཞུད་པ་ན། །འདམ་རྫབ་དག་ཏུ་རྡོ་ལེབ་ཟམ་བཙུགས་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་ཚོགས་ནི་སྨན་པའི་ཚེ། །དེ་བཞིན་གཤེགས་པ་ཟླ་བའི་ཞལ་དེ་ལ། །སྐྱུ་རུ་ར་ཡི་འབྲས་བུ་གཅིག་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་མེ་ནི་དེད་དཔོན་ཚེ། །དེ་བཞིན་གཤེགས་པ་ཀླུ་ཡི་ལྷ་དེ་ལ། །བཻ་དཱུརྱའི་སྣོད་ཆུ་ཡིས་བཀང་སྟེ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འཇིག་རྟེན་འདས་པ་ཚོང་འདུས་པ། །བྱེད་ཚེ་དགེ་འདུན་དག་ལ་འོད་སྒྲོན་ཕུལ། །དེ་བཞིན་གཤེགས་པ་ཡོན་ཏན་ཕུང་པོ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འཇིག་རྟེན་ཟླ་བ་འཁོར་སྒྱུར་ཚེ། །དེ་བཞིན་གཤེགས་པ་ཡོན་ཏན་བློ་དེ་ལ། །གཙུག་ལག་ཁང་ནི་སྟོང་སྙེད་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དབྱངས་སྙན་རྒྱལ་པོ་བྲམ་ཟེའི་ཚེ། །ཕྱོགས་བཞིའི་དགེ་འདུན་དག་གི་བསམ་གཏན་ཁང་བརྩིགས་ནས།