།དཔག་ཚད་དགུ་བཅུ་གཉིས་ཡོད་འབྱོར་ལྡན་ཡབ། །དེ་ཡི་ཡུམ་ནི་བཟང་ལྡན་མ་ཞེས་བྱ། །དབྱངས་སྙན་སྲས་པོ་གསལ་བ་རིམ་གྲོ་པ། །ཆོས་དཔལ་འོད་ཅེས་བྱ་བ་མཁས་པ་སྟེ། །དོན་སྨྲ་ཞེས་ནི་བྱ་བ་རྫུ་འཕྲུལ་ཅན། །འདུས་པ་དང་པོར་རྫུ་འཕྲུལ་སྟོབས་ཅན་དག །དགྲ་བཅོམ་སྟོང་ཕྲག་དྲུག་ཅུ་རྩ་གསུམ་ཡོད། །གཉིས་པར་དྲུག་ཅུ་རྩ་གཉིས་ཐམ་པར་ཡོད། །འདུས་པ་གསུམ་པར་དྲུག་ཅུ་རྩ་ཡང་གཅིག །དེ་ཚེ་ལོ་ནི་སྟོང་ཕྲག་དགུ་བཅུ་དྲུག །དེ་སྲིད་དུས་སུ་དམ་པའི་ཆོས་ནི་ལོ། །བྱེ་ཕྲག་གཉིས་གནས་སྟོན་པ་མྱ་ངན་འདས། །སྐུ་གདུང་རིལ་གཅིག་མཆོད་རྟེན་གཅིག་བྱུང་ངོ་། །དེ་བཞིན་གཤེགས་པ་བདུད་རྩི་འཆང་བ་ཡི། །སྐྱེ་བའི་ཡུལ་ནི་བཟང་དང་ལྡན་ཞེས་བྱ། །དེའི་རིགས་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་བཅུ་དྲུག་ཡབ་ནི་ཚངས་བཟངས་ཡིན། །མེ་ཏོག་ཅན་ཞེས་བྱ་བ་ཡུམ་ཡིན་ནོ། །སྲས་པོ་ཟླས་བྱིན་རྒྱལ་དབང་རིམ་གྲོ་པ། །ཡེ་ཤེས་འོད་གསལ་ཞེས་བྱ་མཁས་པ་སྟེ། །འོད་པོ་ཆེ་ཞེས་བྱ་བ་རྫུ་འཕྲུལ་ཅན། །འདུས་པ་དང་པོར་དགྲ་བཅོམ་ཐེར་འབུམ་དགུ། །གཉིས་པར་བརྒྱད་ཡོད་གསུམ་པ་དག་ཏུའང་བརྒྱད། །དེ་ཚེ་སངས་རྒྱས་མཆོག་མའི་སྐུ་ཚེའི་ཚད། །ལོ་གྲངས་སྟོང་ཕྲག་བདུན་ཅུ་རྩ་དྲུག་ཡིན། །བདེ་གཤེགས་ཡོངས་སུ་མྱ་ངན་འདས་ནས་ཀྱང་། །དམ་པའི་ཆོས་ནི་ལོ་གྲངས་བྱེ་བར་གནས། །མཆོད་རྟེན་བྱེ་བ་སྟོང་ཕྲག་དགུ་བཅུ་དགུ། །རིན་པོ་ཆེ་ཡི་གདུགས་ཀྱིས་བརྒྱན་པར་འགྱུར། །དེ་བཞིན་གཤེགས་པ་མི་ཡི་ཟླ་བ་ཡི། །སྐྱེ་བའི་ཡུལ་ནི་དགའ་བ་སྩོགས་ཞེས་བྱ། །དེའི་རིགས་བྲམ་ཟེ་འོད་ནི་དཔག་ཚད་གཅིག །བདེ་བར་གཤེགས་པའི་ཡབ་ནི་བཟང་པོ་ཡིན། །སྤྲིན་ལྡན་མ་ཞེས་བྱ་བ་ཡུམ་ཡིན་ནོ། །སྲས་པོ་ལེགས་མཐོང་ལྷུན་པོ་རིམ་གྲོ་པ། །རིན་ཆེན་མཆོག་མ་ཤེས་རབ་གཏམ་ལྡན་ཏེ། །འཛམ་བུའི་ཆུ་བོ་ཞེས་བྱ་རྫུ་འཕྲུལ་ཅན། །དགྲ་བཅོམ་བྱེ་བ་སྟོང་ཕྲག་བཅུ་ཡོད་དེ། །གཉིས་པར་བརྒྱད་ཡོད་གསུམ་པར་དགྲ་བཅོམ་པ། །དེ་དག་བྱེ་བརྒྱ་ལྔ་བཅུ་རྩ་ལྔ་ཡོད། །སྐུ་ཚེ་ལོ་གྲངས་སྟོང་ཕྲག་བརྒྱ་དྲུག་ཅུ། །བདེ་བར་གཤེགས་པ་མྱ་ངན་འདས་ནས་ཀྱང་།