Degé Kangyur volume 45, F.128.b

ཡབ་ཡིན་ཆོས་བཟང་ཡུམ། །​ལེགས་པའི་ལྷ་ཞེས་བྱ་བ་སྲས་ཡིན་ནོ། །​སྙིང་སྟོབས་མཆོག་ཅེས་བྱ་བ་རིམ་གྲོ་པ། །​ཟླ་སྡུག་ཅེས་ནི་བྱ་བ་ཤེས་རབ་ཅན། །​ཐུབ་མེད་སྟོབས་ཞེས་བྱ་བ་རྫུ་འཕྲུལ་ཅན། །​འདུས་པ་དང་པོར་འཇིགས་མེད་ཚོགས་པ་དག །​སྟོང་ཕྲག་ལྔ་བཅུ་རྩ་དྲུག་གཉིས་པར་ཡང་། །​དྲུག་ཅུ་གསུམ་པ་དག་ཏུ་དྲུག་ཅུ་ལྔ། །​སྐུ་ཚེ་ལོ་གྲངས་སྟོང་ཕྲག་ཉི་ཤུ་གཉིས། །​ས་བདག་ཡོངས་སུ་མྱ་ངན་འདས་ནས་ཀྱང་། །​དམ་ཆོས་ལོ་གྲངས་སྟོང་ཕྲག་བརྒྱད་ཅུར་གནས། །​མཆོད་རྟེན་བྱེ་བ་དྲུག་ཅུ་ཐམ་པ་ལ། །​གདུགས་དང་རྒྱལ་མཚན་ཟླ་གམ་དག་གིས་བརྒྱན། །​དེ་བཞིན་གཤེགས་པ་སྒྲོན་མ་ཆེན་པོ་ཡི། །​སྐྱེ་བའི་ཡུལ་ནི་དགའ་བ་བཟང་ཞེས་བྱ། །​དེའི་རིགས་བྲམ་ཟེ་ཡིན་ཏེ་འོད་ཀྱི་ཚད། །​དཔག་ཚད་བདུན་ཅུ་ཡབ་ནི་སྤྱན་ལེགས་ཡིན། །​དེ་ཡི་ཡུམ་ནི་ཡན་ལག་མཆོག་ཅེས་བྱ། །​སྲས་པོ་དབྱངས་སྙན་དགེ་བ་རིམ་གྲོ་པ། །​དོན་ལེགས་སྤྱོད་ཅེས་བྱ་བ་ཤེས་རབ་ཅན། །​དྲང་སྲོང་བྱིན་ཞེས་བྱ་བ་རྫུ་འཕྲུལ་མཆོག །​དྲང་སྲོང་དགེ་འདུན་བྱེ་བ་བརྒྱ་ཕྲག་གསུམ། །​གཉིས་པར་གཉིས་ཡོད་གསུམ་པར་གཅིག་ཡོད་དོ། །​དེ་ཚེ་མི་དེ་དག་གི་ཚེ་ཡི་ཚད། །​ལོ་གྲངས་སྟོང་ཕྲག་བརྒྱད་ཅུ་རྩ་ཡང་དྲུག །​དེ་ཡི་དམ་ཆོས་ལོ་གྲངས་བྱེ་བར་གནས། །​སྐུ་གདུང་རིལ་གཅིག་མཆོད་རྟེན་གཅིག་འབྱུང་ལ། །​དཔག་ཚད་གསུམ་ཙམ་ཁོར་ཡུག་གདུགས་སྟོང་གིས། །​བརྒྱན་ཅིང་རིན་ཆེན་དྲ་བ་དག་གིས་ཁྱབ། །​དེ་བཞིན་གཤེགས་པ་འཇིག་རྟེན་འོད་དག་གི། །​སྐྱེ་བའི་ཡུལ་ནི་འཇིག་རྟེན་དགའ་ཞེས་བྱ། །​རིགས་ནི་བྲམ་ཟེ་འོད་ནི་དཔག་ཚད་གཅིག །​དེ་ཡི་ཡབ་ནི་བཟང་པོ་དཔལ་ཞེས་བྱ། །​སྣ་མའི་མེ་ཏོག་དྲི་ལྡན་དེ་ཡི་ཡུམ། །​སྐྱེ་བོ་དགའ་བ་སྲས་མེ་རིམ་གྲོ་པ། །​ཚོགས་རྒྱལ་དགའ་བ་དྲང་སྲོང་ཤེས་རབ་ཅན། །བསྙེན་པར་གྲགས་ཞེས་བྱ་བ་རྫུ་འཕྲུལ་ཅན། །​རྐང་གཉིས་མཆོག་མའི་འདུས་པ་དང་པོར་ནི། །​དགེ་སློང་སྟོང་ཕྲག་དགུ་བཅུ་རྩ་དགུ་ཐམ། །​འདུས་པ་གཉིས་པར་དགུ་བཅུ་རྩ་བརྒྱད་དོ། །​གསུམ་པར་འཁོར་ནི་དགུ་བཅུ་རྩ་ཡང་བདུན། །​སྐུ་ཚེ་ལོ་གྲངས་སྟོང་ཕྲག་ཉི་ཤུ་



The English translation of this folio by 84000 Translating the words of the Buddha can be found at:
https://read.84000.co/translation/toh94.html?part=UT22084-045-001-14110#UT22084-045-001-14110