།བསོད་ནམས་བློ་གྲོས་ཞེས་བྱ་སྐྱེད་པའི་ཡུམ། །དེའི་སྲས་སྐྱེ་དབང་མཆོག་མ་རིམ་གྲོ་པ། །ལྷ་དགའ་ཞེས་ནི་བྱ་བ་ཤེས་རབ་ཅན། །རྫུ་འཕྲུལ་ཅན་གྱི་མཆོག་མ་ལེགས་བཟངས་ཡིན། །འདུས་པ་དང་པོར་ཉན་ཐོས་ཐེར་འབུམ་ཕྲག །ཁྲི་ཕྲག་དགུ་བཅུ་རྩ་དགུ་འབྱུང་བར་འགྱུར། །དེ་ཡི་ཕྱིན་ཆད་ཉན་ཐོས་ཚོགས་མཐའ་ཡས། །སྐུ་ཚེའི་ཚད་ནི་ལོ་གྲངས་བྱེ་བ་ཡིན། །འདྲེན་པ་ཡོངས་སུ་མྱ་ངན་འདས་ནས་ཀྱང་། །དམ་ཆོས་ལོ་གྲངས་བྱེ་བ་གསུམ་དུ་གནས། །མི་ཡི་འདྲེན་པའི་མཆོད་རྟེན་གཅིག་འབྱུང་ལ། །གདུགས་ནི་བརྒྱ་ཕྲག་ཉི་ཤུ་གཉིས་ཀྱིས་ཁྱབ། །དེ་བཞིན་གཤེགས་པ་སེང་གེའི་ཏོག་དག་གི། །སྐྱེ་བའི་ཡུལ་ནི་དགའ་བའི་རྒྱུད་ཅེས་བྱ། །དེའི་རིགས་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་རི་དགས་འཛིན། །དེ་ཡི་ཡུམ་ནི་པད་མ་དཀར་ཞེས་བྱ། །མཛེས་པ་ཞེས་བྱ་དེ་ཡི་སྲས་པོ་ཡིན། །གཟི་བརྗིད་འོད་འཕྲོ་ཞེས་བྱ་རིམ་གྲོ་པ། །མྱ་ངན་མེད་པའི་རི་བོ་ཤེས་རབ་ཅན། །དགེ་བའི་དཔལ་ཞེས་བྱ་བ་རྫུ་འཕྲུལ་ཅན། །འདུས་པ་དང་པོར་ཉན་ཐོས་དྲུག་སྟོང་ཡོད། །གཉིས་པར་ལྔ་སྟོང་གསུམ་པར་བཞི་སྟོང་ཡོད། །ཚེ་ཚད་ལོ་གྲངས་སྟོང་ཕྲག་བདུན་ཅུ་གཅིག །མྱ་ངན་འདས་ནས་དེ་ཡི་དམ་ཆོས་དག །ལོ་གྲངས་བྱེ་བ་ཕྱེད་དང་གཉིས་སུ་གནས། །རྒྱལ་བ་དེ་ཡི་སྐུ་གདུང་རྒྱས་འགྱུར་ལ། །མཆོད་རྟེན་བྱེ་བ་བརྒྱ་ཕྲག་དགུ་བཅུ་གཉིས། །མི་ཡི་བདག་པོ་དུས་མཁྱེན་རྒྱལ་པོ་ཡི། །སྐྱེ་བའི་ཡུལ་ནི་མཐོང་ན་དགའ་ཞེས་བྱ། །དེ་བཞིན་གཤེགས་རིགས་བྲམ་ཟེ་འོད་ཀྱི་ཚད། །དཔག་ཚད་དྲུག་ཡོད་ཡབ་ནི་ལྷས་བྱིན་ཡིན། །དེ་ཡི་ཡུམ་ནི་མ་སྨད་པ་ཞེས་བྱ། །སྲས་པོ་སྤྲིན་ཡིན་དཔལ་ནི་རིམ་གྲོ་པ། །འབར་བ་ཞེས་བྱ་མཁས་པའི་མཆོག་མ་སྟེ། །བསམ་གཏན་སྟོབས་ཞེས་བྱ་བ་རྫུ་འཕྲུལ་ཅན། །འདུས་པ་དང་པོར་དགྲ་བཅོམ་ཟག་ཟད་པ། །ཉོན་མོངས་མེད་པ་བྱེ་བ་ཉི་ཤུ་གཉིས། །གཉིས་པར་ཉི་ཤུ་གསུམ་ཡོད་གསུམ་པར་ཡང་། །གཉིས་ཡོད་མི་རྣམས་ཚེ་ཚད་ལོ་ལྔ་བརྒྱ། །འཁོར་བ་འཇིག་མཛད་མྱ་ངན་འདས་ནས་ཀྱང་། །དམ་ཆོས་ལོ་གྲངས་ཉིས་སྟོང་བར་དུ་གནས།