།སྐུ་ཚེ་ལོ་གྲངས་སྟོང་ཕྲག་ཉི་ཤུ་གཅིག །མྱ་ངན་འདས་ནས་དམ་ཆོས་ལོ་ལྔར་བསྒྱུར། །རྐང་གཉིས་མཆོག་མ་མྱ་ངན་འདས་པ་ཡི། །མཆོད་རྟེན་བྱེ་བ་བརྒྱ་ཕྲག་དགུ་བཅུ་དྲུག །གསུང་རབ་དག་ནི་འདི་འདྲར་འགྱུར་བ་སྟེ། །སྐྱེ་བོ་སུ་ཡང་ངན་འགྲོར་འགྲོ་མི་འགྱུར། །དེ་བཞིན་གཤེགས་པ་འོད་ལྡན་ཉི་ཟླ་ཡི། །སྐྱེ་བའི་ཡུལ་ནི་འབྱོར་པའི་སྒྲ་ཞེས་བྱ། །དེ་རིགས་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བཅྭ་བརྒྱད་ཡབ་ནི་ཟླ་བ་ཡིན། །ཏོག་གི་འོད་ཅེས་བྱ་བ་དེ་ཡུམ་ཡིན། །སྲས་པོ་ལེགས་སེམས་ཚོགས་ཅན་རིམ་གྲོ་པ། །སྲིད་མཐར་བྱེད་ཅེས་བྱ་བ་ཤེས་རབ་ཅན། །མེ་ཏོག་འོད་ཅེས་བྱ་བ་རྫུ་འཕྲུལ་ཅན། །འདུས་པ་དང་པོར་དགྲ་བཅོམ་ཚོགས་བྱེ་བ། །གཉིས་པར་བྱེ་ལྔ་གསུམ་པར་བྱེ་བ་བཅུ། །སྐུ་ཚེ་ལོ་གྲངས་སྟོང་ཕྲག་བདུན་ཅུ་དྲུག །འདྲེན་པ་མྱ་ངན་འདས་ནས་དམ་ཆོས་དག །ལོ་གྲངས་བྱེ་བ་ཕྲག་གཉིས་བར་དུ་གནས། །དེ་ཡི་སྐུ་གདུང་དག་ཀྱང་རྒྱས་འགྱུར་ལ། །ཕྱོགས་རྣམས་མཆོད་རྟེན་འབུམ་ཕྲག་དགུ་བཅུ་དགུ། །མཆོད་རྟེན་རེ་རེར་གདུགས་ནི་སྟོང་སྟོང་ཡོད། །རྒྱལ་བ་ཉི་མའི་འོད་ཅེས་བྱ་བ་ཡི། །སྐྱེ་བའི་ཡུལ་ནི་འོད་ཟེར་བཅུ་ཞེས་བྱ། །དེ་རིགས་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་བརྒྱད་ཅུ་རྩ་བརྒྱད་སྐྱེ་དབང་ཡབ། །དེའི་ཡུམ་གསེར་མདོག་ཅེས་ནི་བྱ་བ་ཡིན། །མཆོད་པ་སྲས་ཡིན་ལྷུན་པོ་རིམ་གྲོ་པ། །བསོད་ནམས་འབྱུང་གནས་ཞེས་བྱ་ཤེས་རབ་ཅན། །བཟང་པོ་དགའ་ཞེས་བྱ་བ་རྫུ་འཕྲུལ་ཅན། །འདུས་པ་དང་པོར་དགྲ་བཅོམ་དགེ་སློང་ཚོགས། །ཁྲི་ཕྲག་བདུན་ཅུ་རྩ་དྲུག་གཉིས་པར་ཡང་། །ཁྲི་ཕྲག་བརྒྱད་ཅུ་གསུམ་པར་ཁྲི་དགུ་བཅུ། །སྐུ་ཚེ་ལོ་གྲངས་སྟོང་ཕྲག་དགུ་བཅུ་གཉིས། །རྐང་གཉིས་མཆོག་མ་མྱ་ངན་འདས་ནས་ཀྱང་། །དམ་པའི་ཆོས་ནི་ལོ་གྲངས་བྱེ་བར་གནས། །མཆོད་རྟེན་གཅིག་ཏུ་ཟད་ལ་གདུགས་ཀྱི་གྲངས། །སྟོང་ཕྲག་བརྒྱད་ཅུས་དཔག་ཚད་བཞིར་ཡང་ཁྱབ། །མི་ཡི་འདྲེན་པ་སྐར་མཁན་ཞེས་བྱ་བའི། །སྐྱེ་ཡུལ་དེ་ཚེ་དགའ་བས་ལྟ་ཞེས་བྱ། །དེ་བཞིན་གཤེགས་རིགས་རྒྱལ་རིགས་འོད་ཀྱི་ཚད། །དཔག་ཚད་དགུ་ཡོད་ཡབ་ནི་ལེགས་པའི་ལྷ། །བསོད་ནམས་བློ་གྲོས་ཞེས་བྱ་སྐྱེད་པའི་ཡུམ།