དཔག་ཚད་བཅུ་ཡོད་ཡབ་ནི་མྱ་ངན་མེད། །དགའ་བ་རྒྱ་མཚོ་ཞེས་བྱ་ཡུམ་ཡིན་ནོ། །སྲས་ནི་ཡིད་གཞུངས་ལེགས་བྱིན་རིམ་གྲོ་པ། །ཡེ་ཤེས་ཡང་དག་འཕགས་པ་མཁས་པ་སྟེ། །བསོད་ནམས་དགའ་ཞེས་བྱ་བ་རྫུ་འཕྲུལ་ཅན། །འདུས་པ་དང་པོར་བྱེ་བ་ཕྲག་སྟོང་ཡོད། །གཉིས་པར་བྱེ་བརྒྱད་གསུམ་པར་བྱེ་བ་བདུན། །སྐུ་ཚེ་ལོ་གྲངས་སྟོང་ཕྲག་བརྒྱད་ཅུ་སྟེ། །ལྔ་འགྱུར་དག་ཏུ་དམ་པའི་ཆོས་ཀྱང་གནས། །རྒྱལ་བ་དེ་ཡི་སྐུ་གདུང་རྒྱས་འགྱུར་ལ། །སྐད་ཅིག་དེ་ལ་བདེ་བར་གཤེགས་པ་དེའི། །མཚན་ནི་གང་དག་ཉན་པར་བྱེད་པ་རྣམས། །བྱང་ཆུབ་ལ་ནི་མྱུར་དུ་རེག་པར་འགྱུར། །དེ་བཞིན་གཤེགས་པ་ཡོན་ཏན་འོད་འཕྲོ་ཡི། །སྐྱེ་བའི་ཡུལ་ནི་གྲོང་ཁྱེར་སྨན་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བཅུ་ཡོད་ཡུལ་འཁོར་བཟང་པོ་ཡབ། །མྱ་ངན་མེད་ལྡན་ཡུམ་ཡིན་གྲགས་པ་སྲས། །མཛེས་དང་ལྡན་ཞེས་བྱ་བ་རིམ་གྲོ་པ། །ཏོག་མཁས་ཐོས་རིག་རབ་གསལ་རྫུ་འཕྲུལ་ཅན། །འདུས་པ་དང་པོར་བྱེ་སྟོང་བརྒྱད་ཅུ་སྟེ། །གཉིས་པར་བྱེ་སྟོང་བདུན་ཅུ་རྩ་བརྒྱད་ཡོད། །འདུས་པ་གསུམ་པར་བྱེ་སྟོང་བདུན་ཅུ་ལྔ། །མི་རྣམས་དག་གི་ཚེ་ལོ་བྱེ་བ་ཕྲག །སྟོང་དུ་ཚང་བ་ཉི་ཤུ་རྩ་གཉིས་ཡོད། །དམ་ཆོས་ལོ་གྲངས་སྟོང་ཕྲག་བདུན་ཅུ་གསུམ། །གནས་འགྱུར་འཇིག་རྟེན་སྒྲོན་མ་མཛད་པ་པོ། །གྲགས་པ་མཐའ་ཡས་དེ་ཡི་སྐུ་གདུང་དག །རྣམ་པར་རྒྱས་པ་དག་ཏུ་འགྱུར་བ་ཡིན། །བདེ་བར་གཤེགས་པ་ཚངས་པས་བྱིན་པ་ཡི། །སྐྱེ་ཡུལ་གྲོང་ཁྱེར་དགའ་བ་སྒྲོགས་ཞེས་བྱ། །རྒྱལ་བ་དེ་ཡི་རིགས་ནི་བྲམ་ཟེ་ཡིན། །འོད་ནི་དཔག་ཚད་བདུན་ཅུ་རྩ་དྲུག་ཡོད། །ཚངས་པ་ཡབ་ཡིན་ཡུམ་ནི་ཚངས་བླ་མ། །སྲས་པོ་དགའ་བྱེད་རིམ་གྲོ་ན་ཚོད་བཟང་། །ཟླ་བའི་འོད་ཅེས་བྱ་བ་མཁས་པ་སྟེ། །སྦྱིན་པ་སྒྲོགས་ཞེས་བྱ་བ་རྫུ་འཕྲུལ་ཅན། །འདུས་པ་དང་པོར་དགྲ་བཅོམ་པ་ཡི་ཚོགས། །བྱེ་བ་སྟོང་ཕྲག་དགུ་བཅུ་རྩ་དགུ་ཡོད། །གཉིས་པར་བྱེ་བ་སྟོང་ཕྲག་དགུ་བཅུ་དྲུག །གསུམ་པར་བྱེ་བ་སྟོང་ཕྲག་དགུ་བཅུ་ལྔ། །རྒྱལ་བ་དེ་ཡི་སྐུ་ཚེའི་ལོ་གྲངས་ནི། །སྟོང་ཕྲག་བདུན་ཅུ་རྩ་གཉིས་དག་ཏུ་འགྱུར།