དེའི་ཚེ་བཅོམ་ལྡན་འདས་ཀྱིས་རྣམ་ཐོས་ཀྱི་བུ་ལ་སོགས་པ་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དག་སྐྱེས་པ་དང་། བུད་མེད་དང་ཁྱེའུ་དང་བུ་མོ་རྣམས་ལ་འཇིགས་པ་ཆེན་པོ་བཞི་པོ་འདི་དག་འབྱུང་ངོ་། །བཞི་གང་ཞེ་ན། འདི་ལྟ་སྟེ། རྒ་བ་དང་ན་བ་དང་རྒུད་པ་དང་འཆི་བའོ། །དེ་ལ་ཡང་འཇིགས་པ་ཆེན་པོ་གཅིག་སྟེ། འདི་ལྟར་འཆི་བདག་གི་འཇིགས་པ་ཆེན་པོ་སྟེ། བརྩམ་པ་མེད་པ། གཉེན་པོ་མེད་པ། རྟག་ཏུ་ཕྱི་བཞིན་འབྲང་བའོ། །རྒྱལ་པོ་ཆེན་པོ་དག་དེ་ལ་འཇིགས་པ་ཆེན་པོ་གཅིག་པོ་དེའི་གཉེན་པོ་ངས་འདིར་བརྗོད་པར་བྱའོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་བཞིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་སླད་དུ་བཅོམ་ལྡན་འདས་ཀྱིས་སྲོག་རབ་ཏུ་སྩལ་བས། སྐྱེ་དགུ་རྗེས་སུ་བཟུང་བ་འདི་ནི་དེང་བདག་ཅག་གིས་རྙེད་པ་ལེགས་པར་རྙེད་དོ། །དེ་ནས་བཅོམ་ལྡན་འདས་ཤར་ཕྱོགས་སུ་མངོན་དུ་ཕྱོགས་ཏེ་བཞུགས་ནས། སེ་གོལ་གྱི་སྒྲས་དེ་བཞིན་གཤེགས་པ་ཐམས་ཅད་ལ་བསྐུལ་ཏེ་འདི་སྐད་ཅེས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་སུ་དག་སེམས་ཅན་རྣམས་ལ་ཐུགས་བརྩེ་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ་དག་བདག་གི་གྲོགས་མཛོད་ཅིག །དེས་ན་བདག་འདིར་སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་ནས་སེམས་ཅན་ཐམས་ཅད་ཀྱི་དུས་མ་ཡིན་པར་འཆི་བ་རབ་ཏུ་བཟློག་པར་བགྱིའོ། །སྔོན་མ་བསྐོར་བའི་ཆོས་ཀྱི་འཁོར་ལོ་གཉིས་པ་ཡང་བསྐོར་བར་བགྱིའོ་ཞེས་གསུང་ངོ་། །དེ་བཞིན་དུ་ལྷོ་དང་ནུབ་དང་བྱང་དང་སྟེང་དང་འོག་གི་དེ་བཞིན་གཤེགས་པ་ཐམས་ཅད་ལ་བསྐུལ་ཏེ། འདི་སྐད་ཅེས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་སུ་དག་སེམས་ཅན་རྣམས་ལ་ཐུགས་བརྩེ་བའི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་དེ་དག་བདག་གི་གྲོགས་མཛོད་ཅིག་ཅེས་གསུང་ངོ་། །དེ་བཞིན་དུ་ཕྱོགས་མཚམས་རྣམས་སུ་ཡང་འདི་སྐད་ཅེས་གང་གི་ཕྱིར་འདི་དག་ཚེ་དང་སྟོབས་དང་ཁ་དོག་དང་ལྡན་པ་ཡོངས་སུ་འགྲུབ་ཅིང་དུས་མ་ཡིན་པར་འཆི་བའི་འཇིགས་པ་འབྱུང་བར་མི་འགྱུར་བར་སངས་རྒྱས་ཐམས་ཅད་བདག་གི་གྲོགས་མཛོད་ཅིག་ཅེས་གསུང་ངོ་།