བདུད་སྡིག་ཅན་རྣམས་ཤིན་ཏུ་སྡུག་བསྔལ་ཞིང་ཡིད་མི་བདེ་བར་གྱུར་ནས་ཉམ་ཐག་གོ། །སེམས་ཅན་གང་དག་ས་ཆེན་པོ་གཡོས་པར་མཐོང་བ་དེ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ་ཞེས་ཆེད་དུ་བརྗོད་པ་ལན་གསུམ་ཆེད་དུ་བརྗོད་དོ། །ལྷ་གང་དག་སངས་རྒྱས་ལ་མངོན་པར་དད་པ་དེ་དག་གིས་ལྷའི་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོས་བཅོམ་ལྡན་འདས་ལ་གཏོར། མངོན་པར་གཏོར་ནས། གང་དག་སངས་རྒྱས་ལ་སྐྱབས་སུ་དོང་བ་དེ་དག་ཐམས་ཅད་རབ་ཏུ་དགའ་བ་སྐྱེས་སོ། །དེ་ལ་འདི་སྐད་ཅེས་བྱ་སྟེ། །ཤཱཀྱ་སེང་གེ་ཡང་དག་རྫོགས་པ་ཡི། །སངས་རྒྱས་སྐྱོབ་པས་སྐད་ཅིག་ཡུད་གང་ལ། །སངས་རྒྱས་ཐམས་ཅད་ཀྱི་ནི་སྙིང་པོ་ཡི། །གཟུངས་འདི་དག་ནི་རབ་ཏུ་བཤད་པ་ཡི། །སྐད་ཅིག་ཡུད་དེར་ས་ཡང་རྣམ་དྲུག་གཡོས། །རྒྱ་མཚོ་འཁྲུགས་ཤིང་བདུད་ཀྱི་གནས་ཀུན་ཀྱང་། རབ་ཏུ་གཡོས་ནས་བདུད་ཀྱི་རིས་རྣམས་ཀྱི། །ལྷ་དག་རབ་ཏུ་དངངས་ཤིང་འཁྲུགས་པར་འགྱུར། །བདུད་ཡིད་མི་བདེ་སྡུག་བསྔལ་མྱ་ངན་ནོན། །དེ་ཚེ་ལྷ་རྣམས་ངོ་མཚར་རབ་ཐོས་ནས། །འཇིག་རྟེན་མགོན་ལ་མཆོད་པ་བྱ་བའི་ཕྱིར། །ནམ་མཁར་གནས་ནས་མེ་ཏོག་མན་དཱ་འཐོར། །གང་དག་སངས་རྒྱས་མངོན་དད་གཞན་རྣམས་ཀྱི། །སེ་མོ་དོ་དང་དོ་ཤལ་སྤོས་རྣམས་དང་། །ཕྱེ་མ་དག་དང་བྱུག་པ་གོས་རྣམས་དང་། །རྒྱན་དང་དཔུང་རྒྱན་དག་ཀྱང་རབ་ཏུ་འབུལ། །བརྒྱད་པོ་འདི་དག་ནི་དེའི་ཡོན་ཏན་གྱི་ཕན་ཡོན་གྱི་རྒྱན་དུ་འགྱུར་བའོ། །བརྒྱད་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མི་བརྗེད་པའི་རྒྱན་དང་། ཐོས་པ་ཐམས་ཅད་ཡོངས་སུ་ཚོལ་བས་མི་ངོམས་པའི་རྒྱན་དང་། ཆོས་ཟབ་མོ་རྣམ་པར་ངེས་པ་རྟེན་ཅིང་འབྲེལ་པར་འབྱུང་བའི་རྒྱན་དང་། སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པའི་རྒྱན་དང་། ཇི་ལྟར་ཐོས་པ་དང་ཇི་ལྟར་ཁོང་དུ་ཆུད་པའི་ཆོས་རྣམས་ལ་ཚུལ་བཞིན་སོ་སོར་རྟོག་ཅིང་དཔྱོད་པའི་རྒྱན་དང་།