།ཕྱོགས་བཅུའི་ཞིང་རྡུལ་སྙེད་དང་ལྷན་ཅིག་ཏུ། །སྐྱེས་བུ་དམ་པ་རྣམས་དང་ལྷགས་པར་གྱུར། །དེར་འདུས་གྱུར་ནས་འཇིག་རྟེན་ཕན་འདོད་པ། །འཇམ་དཔལ་གྲགས་པ་མཐའ་ཡས་ལྡན་རྣམས་ལ། །སེམས་ཅན་དམ་པ་བཟང་པོའི་དཔལ་གྱིས་དྲིས། །སངས་རྒྱས་སྲས་ཀྱི་སྤྱོད་གང་ཡོན་ཏན་ཅི། །དེ་ནས་སེམས་དཔའ་འཇམ་དཔལ་ཞེས་བྱ་བ། །རྙོག་པ་མེད་པས་བྱང་ཆུབ་ཡོན་ཏན་དང་། །བདེ་ཡངས་ཡོན་ཏན་ལྡན་གྱི་སྤྱོད་ཡུལ་གཙང་། །སེམས་ཅན་དམ་པ་བཟང་པོའི་དཔལ་ལ་དྲིས། །སངས་རྒྱས་སྲས་པོ་རྣམས་ཀྱི་སྤྱོད་ཡུལ་གཙང་། །རྒྱལ་བས་བསྟེན་པ་བདག་གིས་འདིར་སྨྲས་ཀྱིས། །ཁྱོད་ཀྱང་སངས་རྒྱས་སྲས་ཀྱི་ཡོན་ཏན་དང་། །སྤྱོད་པ་གང་དག་ཡིན་པ་བརྗོད་པར་གྱིས། །བཟང་པོའི་དཔལ་གྱིས་སྨྲས་པ་རྒྱལ་སྲས་ཉོན། །ཡོན་ཏན་མཐའ་ཡས་ལྡན་དང་ཡོན་ཏན་ལས། །དཔེ་ཚུལ་ཅུང་ཟད་ཙམ་ཞིག་བརྗོད་པར་བྱ། །རྒྱ་མཚོའི་ཐིགས་པ་བཞིན་དུ་ཤིན་དུ་ཆུང་། །བྱང་ཆུབ་གཞིར་གྱུར་པ་ཡི་རང་བྱུང་སེམས། །ཐོག་མ་ཉིད་དུ་བསྐྱེད་པ་གང་ཡིན་པ། །དེ་ཡི་ཡོན་ཏན་བསྔགས་པ་མཐའ་ཡས་ཏེ། །མཚུངས་མེད་ཀྱིས་ཀྱང་ཡོངས་སུ་བརྗོད་མི་སྤྱོད། །ཕ་རོལ་ཕྱིན་དང་ས་ཡི་ཡོན་ཏན་རྣམས། །བསྐལ་པ་མང་པོར་སྤྱད་པ་ཅི་སྨོས་ཏེ། །ཕྱོགས་བཅུའི་རྒྱལ་བ་ཀུན་གྱིས་དེ་དག་གི། །ཡོན་ཏན་ཆུ་བོ་ཟད་པར་མཛད་མི་སྤྱོད། །ཡོན་ཏན་མཐའ་ཡས་རྣམས་ཀྱི་ཡོན་ཏན་ལས། །དཔེ་ཚུལ་ཅུང་ཟད་ཙམ་ཞིག་བརྗོད་བྱ་སྟེ། །མཁའ་ལ་བྱ་རྗེས་འདྲ་བར་ཆུང་བ་དང་། །ས་ཆེན་རྣམས་ལས་རྡུལ་ཕྲན་གཅིག་དང་མཚུངས། །བྱང་ཆུབ་ཡོན་ཏན་གནས་ཀྱི་སེམས་སྐྱེ་བ། །རྒྱུ་མེད་མ་ཡིན་གྱི་ན་མ་ཡིན་གྱི། །རྒྱལ་དང་རྒྱལ་བའི་ཆོས་དང་དགེ་འདུན་ལ། །དད་དང་དང་བ་བསྐྱེད་ནས་སེམས་སྐྱེ་སྟེ། །དེ་ནི་འདོད་དང་ལོངས་སྤྱོད་རྒྱལ་སྲིད་དང་། །བདག་ལ་བདེ་དང་སྙན་དང་གྲགས་ཕྱིར་མིན། །འགྲོ་བའི་སྡུག་བསྔལ་མ་ལུས་ཞི་བྱའི་ཕྱིར། །འཇིག་རྟེན་ཕན་པ་བྱེད་པའི་སེམས་སྐྱེའོ། །རྟག་ཏུ་སེམས་ཅན་ཕན་པར་བྱ་ཕྱིར་དང་།