།དེ་བཞིན་དུ་དེ་བཞིན་གཤེགས་པའི་སྐུ་ལ་ཡང་རྣམ་པར་རྟོག་པ་མེད་ཅིང་སྤྲོས་པ་མེད་དོ། །འོན་ཀྱང་སེམས་ཅན་རྣམས་དང་མཐུན་པར་དེ་བཞིན་གཤེགས་པ་རྣམས་མཐུན་པར་མཛད་དེ། སེམས་ཅན་རྣམས་ཇི་ལྟར་འདུལ་བར་འགྱུར་བ་དེ་བཞིན་དུ་དེ་བཞིན་གཤེགས་པ་རྣམས་མཐུན་པར་འཇུག་གོ། །ཤ་ར་དྭ་ཏིའི་བུ་དེ་བཞིན་གཤེགས་པ་ལ་འཁྲུལ་པ་མི་མངའོ། །དེ་བཞིན་གཤེགས་པ་ལ་མི་མཁྱེན་པ་མི་མངའོ། །དེ་བཞིན་གཤེགས་པ་ལ་བསྙེལ་བ་མི་མངའོ། །ཤ་ར་དྭ་ཏིའི་བུ་ང་ནི་ལྷ་དང་བཅས་པའི་འཇིག་རྟེན་གྱི་ཐུ་བོ་དང་། གཙོ་བོ་དང་། རབ་དང་། མཆོག་དང་། ཕུལ་དང་། བླ་མ་དང་། བླ་ན་མེད་པ་དང་། གོང་ན་མེད་པ་དང་། མི་མཉམ་པ་དང་མཉམ་པ་ཡིན་ཏེ། ཤ་ར་དྭ་ཏིའི་བུ་ཚིག་སྨྲས་པ་འདི་ནི་བདེན་པའི་རྗེས་སུ་མཐུན་པའོ། །རབ་ཏུ་བྱུང་བའམ། ཁྱིམ་པ་ཡང་རུང་སྟེ། སེམས་ཅན་གང་དག་ཆོས་ཀྱི་རྣམ་གྲངས་འདི་སྤོང་བ་དེ་དག་ཐམས་ཅད་ནི་སེམས་ཅན་དམྱལ་བའི་སྡུག་བསྔལ་འདི་ལྟ་བུ་དག་རྙེད་པར་འགྱུར་རོ། །དེ་ནས་ཚེ་དང་ལྡན་པ་རབ་འབྱོར་གྱིས་བཅོམ་ལྡན་འདས་ཀྱིས་བསྟན་པ་འདི་ཐོས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་དེ་དག་གིས་ནི་རྙེད་པ་ནོངས་པར་རྙེད་དོ། །གང་དག་ཆོས་ཀྱི་རྣམ་གྲངས་འདི་སྤོང་བར་འགྱུར་བ་དེ་དག་ལྕེ་ཅི་འདྲ་བ་ཞིག་ཏུ་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་དག་གི་ལྕེ་ནི་དཔག་ཚད་འབུམ་པར་འགྱུར་ཏེ། དེ་ལ་ལྕགས་ཀྱི་ཐོང་གཤོལ་འབར་བ་རབ་ཏུ་འབར་བ། ཀུན་ཏུ་རབ་ཏུ་འབར། ཀུན་ཏུ་རབ་ཏུ་འཆེད་ཅིང་འབར་བ། མེ་ལྕེ་གཅིག་ཏུ་གྱུར་པ་བྱེ་བ་ཕྲག་ལྔ་བརྒྱས་རྨོ་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེས་ངག་མ་བསྲུངས་པའི་ཕྱིར་ཏེ། རབ་འབྱོར་མི་གཏི་མུག་པ་དེ་དག་གི་ལས་ཀྱི་སྒྲིབ་པ་ནི་དེ་ལྟ་བུར་འགྱུར་རོ། །དེ་ནས་སངས་རྒྱས་ཀྱི་མཐུས་ཐམས་ཅད་དང་ལྡན་པའི་འཁོར་དེས་དེ་བཞིན་གཤེགས་པས་བསྟན་པ་ནི་རྨད་དུ་བྱུང་བ་ཆེན་པོ་ལགས་སོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ།